"Latifýndister shetel azamattyǵyn alyp alǵan". Dairabaev dabyl qaqty
Qazaqstan fermerler odaǵynyń tóraǵasy Jigýli Dairabaevtyń aitýynsha, búginde aýyl sharýashylyǵy jerlerin kepilge qoivp, kreditke qyrýar aqsha alǵan adamdar az emes. Al olardyń ishinde Qazaqstan azamattyǵynan shyǵyp ketkender de bar.
"Jer sheteldikterge berilmesin!" dep dabyl qaǵyp júrgende qazirgi jer paidalanýshylardyń Qazaqstan rezidenttiginen shyǵyp, shetel azamattyǵyn alyp jatqanyn baiqamai qaldyq. Ókinishke qarai, ondai faktiler bar. Jaqyn arada tiisti materialdardy komissiia nazaryna usynamyz. Olardyń qolyndaǵy myńdaǵan gektar jer telimin bankke kepilge qoiyp, qyrýar qarjy alyp, keiin qaitara almai, shetelge qashyp ketpeýine kim kepil?", – dedi Dairabaev jer komissiiasynyń birinshi otyrysynda.
Qoǵam qairatkeri Muhtar Taijan da kepildikte turǵan jer máselesin kóterdi.
Onyń sózine qaraǵanda, sheteldik bankterge salynǵan aýyl sharýashylyǵy jerleri de bar.
"Ókinishke qarai, myńdaǵan, milliondaǵan jerler bankterde kepilde tur. Ásirese, sheteldiń bankterinde kepilde turǵan jerler máselesi – úlken problema. Menińshe, úkimet osy kelisimsharttardy birjaqty buzyp, ol jerlerdi memleket menshigine qaitarýy qajet", – dep atap kórsetti Taijan.
Aita keteiik, ótken aptada premer-ministr "Jer reformasy boiynsha komissiia qurý týraly" ókimge qol qoiǵan bolatyn. Qujatta komissiianyń jalpy erejeleri, mindetteri, komissiia jumysyn uiymdastyrý jáne onyń tártibi kórsetilgen. Komissiianyń quramy da jariialandy.
Derekkóz: sputnik.kz
