تالعاردا ءبىر توپ بۇزاقىنىڭ قولىنان قازا تاپقان 16 جاستاعى شەرزات بولاتتىڭ اتا-اناسى مەن قوس قورعاۋشىسى كوپشىلىككە مالىمدەمە جاسادى، دەپ حابارلايدى Dalanews.kz.
ولار ءىستىڭ ءمان-جايىن Airan YouTube ارناسىنا باياندادى.
“قازىرگى كەزدە اتا-انامىزبەن تۇرىپ جاتىرمىز. ورتەنىپ كەتكەن ۇيىمىزگە وتەماقى تولەنبەدى. اكىمدىكتەن ەشقانداي كومەك بولمادى. ادامدار اراسىندا وتباسىمىز جىلۋ جيناپ جاتىر دەگەن سىبىس تارادى. ءبىزدىڭ بۇعان ەش قاتىسىمىز جوق. مەن بۇعان بايلانىستى تۇسىنىكتەمە بەردىم. سونداي-اق بۇعان دەيىن كورسەتىلگەن قىسىم توقتادى. قازىرگى كەزدە قورقىتىپ-ۇركىتۋ جوق. بارلىعى تىنىش ”، - دەيدى مارقۇمنىڭ اكەسى قارجاۋباي نۇرىموۆ.
قازىرگى كەزدە نۇرىموۆتاردىڭ شاعىن دۇكەندەرى جۇمىسىن توقتاتقان. ايتۋلارىنشا، جاقىندا ەت دۇكەنىن اشىپ، ءىس باستاۋدى قايتا قولعا العان.
“قازىرگى تاڭدا مەن اقشا تولەنبەيتىن ۋاقىتشا ەڭبەك دەمالىسىندامىن. دۇكەنىمىز جۇمىس ىستەپ تۇرعان جوق. الايدا بىزدە شاعىن كاسىبىمىز بار. كەشەلى بەرى ەت دۇكەنىن اشىپ، سونى جۇرگىزىپ جاتىرمىز”، - دەيدى مارقۇمنىڭ اكەسى.
مارقۇمنىڭ اتا-اناسى شەرزاتتىڭ قازاسى ورنى تولماس قايعى ەكەنىن اتاپ ءوتتى.
“ءبىز كۇن سايىن شەرزاتتى ەسكە الامىز. ونىڭ ورنى ەرەكشە ەدى. سول ءۇشىن دە قازاسى اۋىر سوققى بولىپ ءتيدى. شەرزات ەركىندىككە جانى قۇشتار، ەرجۇرەك، قولى اشىق جان ەدى”، - دەيدى مارقۇمنىڭ اناسى گۇلبارا بەيشىمبايەۆا.
مارقۇمنىڭ اكەسى دە بالاسىنىڭ كوپشىل بولعانىن ايتادى.
“شەرزات تۋرالى كوپ ايتۋعا بولادى. مەكتەپتە جاقسى وقىدى. قىرسىق بولسا دا، مىنەزى سابىرلى ەدى. دوستارى دا كوپ بولدى. مەنەن ءبىر ايىرماشىلىعى، ونى كوبى تانيتىن، بارىنە كومەكتەسىپ جۇرەتىن. ول ءومىردى قاتتى جاقسى كوردى. 16 جىل عۇمىر كەشسە دە، وسى جىلدار ارالىعىندا بىزگە كوپتەگەن قۋانىش سىيلاي ءبىلدى. جاقىندارى ءۇشىن جانىن بەرۋگە دايىن تۇراتىن”، - دەيدى ول.
مارقۇمنىڭ اتا-اناسى قايعىلى وقيعا بولعان ءتۇندى دە ەستەرىنە الدى.
“شەرزات قازا تاپقان ءتۇنى ءبىز سول ورىنعا اجەسى ەكەۋىمىز باردىق. مەن انا رەتىندە ولاردان ولتىرمەۋىن سۇرادىم. ولار مەنىڭ سوزىمە قۇلاق اسپادى. شەرزات پەن جولداسىمنىڭ ءىنىسىن اياۋسىز سوققىعا جىقتى”، - دەيدى اناسى گۇلبارا بەيشىمبايەۆا.
اكەسى كۇدىكتىنىڭ الاۋىزدىق تۋدىرعانىن ايتادى.
“سول ءتۇنى دۇكەنگە دارحان دەگەن جىگىت كەلىپ، سىرا الدى. مەن ول جىگىتكە بالامنىڭ كىشكەنتاي ەكەنىن ايتىپ، تيىسپەۋىن سۇرادىم. دارحان بوقاۋىز ءسوز ايتىپ، ءوزى الاۋىزدىق تۋدىردى. شەرزات ونىڭ جاعىن سىندىرمادى. سەبەبى ولاردى بىردەن اجىراتىپ الدىم. ۇلىما دا ەسكەرتۋ جاساپ، انا جىگىتتى دە تىنىشتاندىرعىم كەلدى. ول مەنى تىڭدامادى. دوستارىن شاقىرا باستادى. مەن دە ەركەكپىن، مەنىڭ دە دوستارىم بار. ءدال سول سەكىلدى نۇرقانات پەن شەرزاتتىڭ دا دوستارى كوپ. الايدا ءبىز ولاردى شاقىرمادىق”، — دەيدى ول.
ال كۇدىكتىلەردىڭ اتا-انالارى مارقۇمنىڭ وتباسىنا كىنا تاعىپ جاتقان كورىنەدى.
“ولار بارلىعىن ادەيى ىستەدى. ءتىپتى شەرزاتتىڭ ءجاسوسپىرىم ەكەنىن دە ەلەمەدى. ءقازىر كۇدىكتىلەردىڭ اتا-انالارى سول ورىندا بولعانداي كەيىپ تانىتىپ جاتىر. ولار بالالارىنىڭ قانداي ەكەنىن بىلمەيدى جانە بىزگە كىنا ارتىپ جاتىر. كۇدىكتىلەردى ءومىر بويىنا باس بوستاندىعىنان ايىرۋدى تالاپ ەتەمىز”، — دەيدى مارقۇمنىڭ اناسى.
قارجاۋباي نۇرىموۆ ءتىپتى ولاردىڭ كوڭىل ايتىپ كەلمگەندەرىن دە العا تارتتى.
“مەن ولارعا اۋىر ءسوز ايتقىم كەلمەيدى. ءبىراق ولاردىڭ اكەلەرىنە ايتقىم كەلەدى، ولاردىڭ دا بالالارى بار. اكە بالاسى ءۇشىن جاۋاپ بەرەدى. ءتىپتى ولار كوڭىل ايتۋعا دا كەلمەدى”، - دەيدى ول.
قارجاۋباي نۇرىموۆ وتباسىنىڭ بولاشاعىنا الاڭدايدى. قازىرگى تاڭدا ولار تالعاردان كوشۋدى جوسپارلاپ ءجۇر.
“ءبىزدى تەك تالعارلىقتار قانا ەمەس، باسقا ءوڭىردىڭ تۇرعىندارى مەن باسقا ەلدىڭ ازاماتتارى دا قولداپ جاتىر. مەن بارىنە العىس ايتامىن. نەگىزى تالعاردان كەتكىم كەلەدى. سەبەبى شەرزاتتان باسقا بالالارىم بار. ءبىراق قاي قالاعا، قاي ايماققا كوشەتىنىمدى ايتقىم كەلمەيدى”، — دەدى ول.
ال كۇدىكتىلەرگە قاتىستى تەرگەۋ جالعاسۋدا. مارقۇمنىڭ قورعاۋشىلارى سايدا تاۋەكەلوۆا مەن كارينا كوشەربايەۆانىڭ ايتۋىنشا، قىلمىستىق ءىس بىرنەشە باپ بويىنشا قارالىپ جاتىر. جاقىندا تەرگەۋ اياقتالىپ، ءىس سوتقا جىبەرىلەدى.
“ءالى دە تەرگەۋ جۇرگىزىلىپ جاتىر. مەنىڭ توپشىلاۋىمشا، جاقىن ارادا اياقتالۋى مۇمكىن. زاڭ بويىنشا بەلگىلى ءبىر مەرزىمى بار. اتالعان باپتار بويىنشا ەگجەي-تەگجەيلى جۇمىس جۇرگىزىلىپ جاتىر. ەكى اپتادان كەيىن تەرگەۋ اياقتالادى دەپ ويلايمىز. سودان سوڭ ول پروكۋراتۋراعا جولدانىپ، ءىس قارالادى. ءسويتىپ قاڭتار ايىنىڭ ورتاسىندا سوتتىڭ قاي ۋاقىتتا وتەتىنى بەلگىلى بولادى. ءقازىر شەرزاتتىڭ باۋىرلارىمەن جانە اتا-اناسىمەن ەكى پسيحولوگ جۇمىس ىستەپ جاتىر. ءقازىر اتا-اناسىنا وڭاي ەمەس. جاقىندا عانا قىرقىن وتكىزدى”، — دەيدى سايدا تاۋەكەلوۆا.
ايتۋىنشا، مارقۇمنىڭ وتباسىنا ءالى باسپانا بەرىلمەگەن.
“ءۇي ورتەنگەننەن كەيىن اۋدان اكىمى مەن وبلىس اكىمى كەلىپ، ءۇي تابىستالاتىنىن ايتتى. وكىنىشكە قاراي، بۇگىنگى كۇنگە دەيىن قانداي دا ءبىر ءۇي بەرىلەتىنى تۋرالى ەشقانداي اقپارات جوق. مارقۇمنىڭ اكە-شەشەسى ءالى كۇنگە دەيىن اتا-اناسىنىڭ ۇيىندە تۇرىپ جاتىر. ال بىزگە ءالى ەشتەڭە انىق ەمەس”، — دەيدى قورعاۋشى.
ال كارينا كوشەربايەۆا تەرگەۋدىڭ كەڭەيتىلگەن تۇردە قارالىپ جاتقانىن جەتكىزدى.
“باسىندا قىلمىستىق ءىس تەك 7 ادامعا قوزعالدى. قازىرگى تاڭدا 11 ادام ۇستالدى. سونىمەن قاتار كۋاگەر رەتىندە قارالىپ جاتقان ادامدار دا بار. قازىرگى ۋاقىتتا بىرنەشە باپ بويىنشا ءىس قارالىپ جاتىر”، - دەپ اتاپ ءوتتى قورعاۋشى.
ەسكە سالايىق، بۇعان دەيىن تالعاردا جاپپاي توبەلەس بولىپ، سالدارىنان 16 جاستاعى ءجاسوسپىرىم كوز جۇمدى. جانجال جىگىتتىڭ وتباسى جالعا الاتىن دۇكەننەن باستالعان. تۋىستارىنىڭ ايتۋىنشا، ساۋدا نۇكتەسىنە كەلگەن ساتىپ الۋشى سىرا الىپ، اقشاسىن تولەۋدەن باس تارتقان. وسى جاعدايدان كەيىن توبەلەس باستالعان.
كامەلەتكە تولماعان بالانى ءولتىرۋ فاكتىسى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى.
قازىرگى تاڭدا كىنالى دەپ تانىلعان 11 ادام ۇستالىپ، ۋاقىتشا ۇستاۋ يزولياتورىنا قاماۋعا الىنعان.
سونىمەن قاتار، الماتى وبلىستىق پوليسيا دەپارتامەنتى باستىعىنىڭ مىندەتىن اتقارۋشى شالقاروۆ توبەلەستەن كەيىن قانشا قارۋ تاركىلەنگەنىن ايتتى.
ودان كەيىن شەرزاتتىڭ ۇيىنە كۇزەت قويىلدى.
كوپ ۇزاماي مارقۇم شەرزاتتىڭ ءۇيى ورتەندى.
