قوعام بەلسەندىسى، بلوگەر جان احمادييەۆ شەرزات بولاتتىڭ ولىمىنە قاتىستى قوزعالعان قىلمىستىق ىسكە كۇمانمەن قارايتىنىن جەتكىزدى. ايتۋىنشا، بارلىق كۇدىكتىگە اۋىر قىلمىس بويىنشا ايىپ تاعىلماعان، دەپ حابارلايدى Dalanews.kz.

“سوتتىڭ ءادىل وتەتىنىنە جارتىلاي سەنىمدىمىن. ويتكەنى ءبىز ادىلەت جوق “ادىلەتتى قازاقستاندا” ءومىر ءسۇرىپ كەلەمىز. مەن كەشە ءوزىمنىڭ ينستاگرام پاراقشامدا ايتقانداي، بۇل ىستە 13 ادام ەمەس، 9 ادام كۇدىكتى رەتىندە تانىلعان. 2 قىز جوق. سول 9 ادامنىڭ ەكەۋىنە عانا اۋىر قىلمىس بويىنشا ايىپ تاعىلىپ وتىر. ءبىرى – قىلمىستىق كودەكستىڭ 99-بابى (كىسى ءولتىرۋ) بويىنشا، ەكىنشىسى – قىلمىس جاساۋدى جوسپارلاۋ بابى بويىنشا كۇدىكتى. ال قالعان التاۋىنا بۇزاقىلىق بابى بويىنشا (6 جىلعا دەيىن باس بوستاندىعىنان ايىرۋ) جازا قاراستىرىلعان بولۋى مۇمكىن. تاعى ءبىر كۇدىكتى كامەلەت جاسىنا تولماعان. وعان قىلمىس تۋرالى حابارلاماعانى ءۇشىن ايىپ تاعىلىپ وتىر. بۇل باپ بويىنشا وعان ايىپپۇل سالىنۋى مۇمكىن نەمەسە 5 جىلعا دەيىن باس بوستاندىعىنان ايىرىلۋى ىقتيمال”، — دەدى ول.

بەلسەندىنىڭ ايتۋىنشا، باستاپقىدا اتالعان ءىس بويىنشا بارلىق كۇدىكتى ادام ءولتىرۋ بابىمەن جاۋاپقا تارتىلۋى مۇمكىن دەپ بولجاعان.

“وكىنىشكە قاراي، تەرگەۋ ناتيجەسى ءبىز ويلاعانداي بولمادى”، — دەپ قوستى ول.

العاشقى سوت وتىرىسى 10 ساۋىردە وتەدى

ايتا كەتەيىك، كۇنى كەشە شەرزات بولاتتىڭ ءىسى بويىنشا العاشقى سوت وتىرىسى 10 ساۋىردە وتەتىنى بەلگىلى بولدى. بۇل تۋرالى ادۆوكات مەيىرمان شەكەيەۆ مالىمدەدى. ونىڭ ايتۋىنشا، ءىس تالدىقورعان قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قارالادى. سەبەبى كۇدىكتىلەردىڭ كوپشىلىگى قازىرگى ۋاقىتتا وسى قالاداعى ۋاقىتشا ۇستاۋ يزولياتورىندا وتىر.

وقيعا ورنىندا بولعان ەكى قىز قايدا؟

ادۆوكات قوعامدا قىزۋ تالقىلانعان ماڭىزدى سۇراقتاردىڭ بىرىنە دە جاۋاپ بەردى.

“حالىقتى الاڭداتىپ وتىرعان باستى ماسەلەلەردىڭ ءبىرى – وقيعا ورنىندا بولعان ەكى قىزدىڭ تاعدىرى. ولار الەۋمەتتىك جەلىلەردە كۇدىكتى رەتىندە كورسەتىلگەنىمەن، ءىس ماتەريالدارىنا سايكەس، تەك كۋاگەر رەتىندە جاۋاپ بەردى”، — دەدى قورعاۋشى.

مەيىرمان شەكەيەۆتىڭ ايتۋىنشا، قىلمىستىق ءىس بويىنشا 9 ادام كۇدىكتى رەتىندە تانىلعان. ولاردىڭ بىرەۋى – كامەلەت جاسىنا تولماعان. وعان قىلمىستىق كودەكستىڭ 434-بابى (قىلمىس تۋرالى حابارلاماۋ) بويىنشا ايىپ تاعىلعان. ال جابىرلەنۋشىلەر سانى – التى. ولاردىڭ ەكەۋى – شەرزات بولات پەن نۇرقانات.

ەسكە سالايىق، بۇعان دەيىن تالعارداعى جانجال كەزىندە كوز جۇمعان شەرزات بولاتتىڭ اكەسى قارجاۋباي نۇرىموۆ ۇلىنىڭ ولىمىنە قاتىستى كۇدىكتىلەرگە قوسىمشا ايىپ تاعۋ تۋرالى ارىز دايىنداپ جاتقانىن حابارلاعان ەدى. جاڭادان ىسكە قوسىلعان ادۆوكاتتىڭ ايتۋىنشا، بۇل تالاپ ارىز سوتتالۋشىلاردىڭ مەرزىمىنەن بۇرىن بوساپ كەتپەۋى ءۇشىن ازىرلەنىپ جاتىر.