Qoǵam belsendisi, bloger Jan Ahmadiev Sherzat Bolattyń ólimine qatysty qozǵalǵan qylmystyq iske kúmánmen qaraitynyn jetkizdi. Aitýynsha, barlyq kúdiktige aýyr qylmys boiynsha aiyp taǵylmaǵan, dep habarlaidy Dalanews.kz.
“Sottyń ádil ótetinine jartylai senimdimin. Óitkeni biz ádilet joq “Ádiletti Qazaqstanda” ómir súrip kelemiz. Men keshe ózimniń instagram paraqshamda aitqandai, bul iste 13 adam emes, 9 adam kúdikti retinde tanylǵan. 2 qyz joq. Sol 9 adamnyń ekeýine ǵana aýyr qylmys boiynsha aiyp taǵylyp otyr. Biri – Qylmystyq kodekstiń 99-baby (kisi óltirý) boiynsha, ekinshisi – qylmys jasaýdy josparlaý baby boiynsha kúdikti. Al qalǵan altaýyna buzaqylyq baby boiynsha (6 jylǵa deiin bas bostandyǵynan aiyrý) jaza qarastyrylǵan bolýy múmkin. Taǵy bir kúdikti kámelet jasyna tolmaǵan. Oǵan qylmys týraly habarlamaǵany úshin aiyp taǵylyp otyr. Bul bap boiynsha oǵan aiyppul salynýy múmkin nemese 5 jylǵa deiin bas bostandyǵynan aiyrylýy yqtimal”, — dedi ol.
Belsendiniń aitýynsha, bastapqyda atalǵan is boiynsha barlyq kúdikti adam óltirý babymen jaýapqa tartylýy múmkin dep boljaǵan.
“Ókinishke qarai, tergeý nátijesi biz oilaǵandai bolmady”, — dep qosty ol.
Alǵashqy sot otyrysy 10 sáýirde ótedi
Aita keteiik, kúni keshe Sherzat Bolattyń isi boiynsha alǵashqy sot otyrysy 10 sáýirde ótetini belgili boldy. Bul týraly advokat Meiirman Shekeev málimdedi. Onyń aitýynsha, is Taldyqorǵan qalasynyń qylmystyq ister jónindegi mamandandyrylǵan aýdanaralyq sotynda qaralady. Sebebi kúdiktilerdiń kópshiligi qazirgi ýaqytta osy qaladaǵy ýaqytsha ustaý izoliatorynda otyr.
Oqiǵa ornynda bolǵan eki qyz qaida?
Advokat qoǵamda qyzý talqylanǵan mańyzdy suraqtardyń birine de jaýap berdi.
“Halyqty alańdatyp otyrǵan basty máselelerdiń biri – oqiǵa ornynda bolǵan eki qyzdyń taǵdyry. Olar áleýmettik jelilerde kúdikti retinde kórsetilgenimen, is materialdaryna sáikes, tek kýáger retinde jaýap berdi”, — dedi qorǵaýshy.
Meiirman Shekeevtiń aitýynsha, qylmystyq is boiynsha 9 adam kúdikti retinde tanylǵan. Olardyń bireýi – kámelet jasyna tolmaǵan. Oǵan Qylmystyq kodekstiń 434-baby (qylmys týraly habarlamaý) boiynsha aiyp taǵylǵan. Al jábirlenýshiler sany – alty. Olardyń ekeýi – Sherzat Bolat pen Nurqanat.
Eske salaiyq, buǵan deiin Talǵardaǵy janjal kezinde kóz jumǵan Sherzat Bolattyń ákesi Qarjaýbai Nurymov ulynyń ólimine qatysty kúdiktilerge qosymsha aiyp taǵý týraly aryz daiyndap jatqanyn habarlaǵan edi. Jańadan iske qosylǵan advokattyń aitýynsha, bul talap aryz sottalýshylardyń merziminen buryn bosap ketpeýi úshin ázirlenip jatyr.
