Prezident Qasym-Jomart Toqaev Elena Rybakinamen kezdesti, dep habarlaidy dalanews.kz.
Memleket basshysy Qasym-Jomart Toqaev Elena Rybakinany AQSh ashyq chempionatyndaǵy jarqyn jeńisimen jáne tennisten álemniń birinshi raketkasy mártebesine ie bolýymen quttyqtady. Prezident tarihi máni zor osynaý tabys otandyq sporttyń damýyna ólsheýsiz úles qosqanyn atap ótti.
"Sizdiń jeńisterińizden keiin balalardyń tenniske qyzyǵýshylyǵy artyp, sektsiialarǵa kóptep jazylady. Olar da chempion bolǵysy keledi. Jas órenderge ónege kórsetip otyrsyz. Bul – óte oń úrdis. Óskeleń urpaqty sportqa baýlý kerek, óitkeni bul olardyń keleshegi úshin óte mańyzdy. Úsh birdei Úlken dýlyǵa týrnirindegi jeńisińiz tennis jylnamasyna óshpestei bolyp jazyldy. Munymen toqtamai, alda áli talai asýdy baǵyndyrasyz dep senemin", – dedi Memleket basshysy.
Prezident Elena Rybakinanyń adami qasietterine airyqsha toqtaldy.
"Siz kortta da, jurtshylyq ortasynda da baiyptylyǵyńyzdy baiqatasyz. Ishki mádenietińiz joǵary ekenin únemi aityp júremin. Qazaqstandy sportqa, ásirese, tenniske qoldaý kórsetetin órkenietti ári damyǵan memleket retinde tanytý turǵysynan munyń mańyzy óte zor", – dedi Qasym-Jomart Toqaev.
Elena Rybakina Memleket basshysyna ózin udaiy qoldaǵany, sondai-aq, Qazaqstanda úlken tennis damýyna airyqsha qamqorlyq kórsetkeni úshin shynaiy rizashylyǵyn bildirdi.
Álemniń birinshi raketkasy Qazaqstan atynan óner kórsetýdi maqtan tutatynyn málimdedi. Tennisshi aldaǵy ýaqytta da joǵary nátijege qol jetkizip, jankúierlerin jańa jeńistermen qýanta berýge nietti.
Prezident Qasym-Jomart Toqaev sporttaǵy eren jetistikteri jáne Qazaqstanda tennistiń damýy men nasihattalýyna qosqan úlken úlesi úshin Elena Rybakinany III dárejeli "Barys" ordenimen marapattady.
