قازاقستاندا تۇرعىندارعا ساتىلاتىن كومىر باعاسىنىڭ قىمباتتاۋىنا تاسىمالداۋ تاريفتەرى مەن دەلدالداردىڭ كوپتىگى كادىمگىدەي اسەر ەتىر وتىر دەپ مالىمدەدى بەيسەنبىدە ەنەرگەتيكا مينيسترىگىنىڭ باسپا ءسوز قىزمەتى.



مينيسترلىك اقپاراتىنا قاراعاندا، بيىل توعىز ايدا كوممۋنالدىق جانە تۇرمىستىق قاجەتتىلىككە 8 ميلليون توننا كومىر جونەلتىلگەن جانە بۇل وتكەن جىلعى كورسەتكىشتەن 1،5 ميلليون تونناعا كوپ.

مينيسترلىك ءقازىر كومىر قويمالارىندا قور جەتكىلىكتى ەكەنىن جانە كارەردەن نەمەسە شاحتادان شىعارىلاتىن كومىر باعاسى "ايتارلىقتاي قىمبات ەمەس" ەكەنىن ايتادى. ءبىراق ۆەدومستۆو كومىردىڭ كەنىشتەن ساتىپ العانداعى باعاسى قانشا ەكەنىن ايتپايدى.

"وڭتۇستىك قازاقستان وبلىسى بويىنشا كەنتاۋ قالاسىنداعى كومىر قورى 37 مىڭ توننا، تۇركىستان قالاسىنداعى كومىر قورى 5 مىڭ توننانى قۇرايدى. شۇباركول كومىرىنىڭ تونناسى 12،5 مىڭ تەڭگە، مايكۇبى كومىرى 8،5 مىڭ تەڭگە تۇرادى" دەلىنگەن مينيسترلىك اقپاراتىندا.

ال قاراعاندىدا ءبىر توننا كومىردىڭ باعاسى 6 مىڭ تەڭگەدەن باستاپ (سارىادىر كومىرى) 11 مىڭ تەڭگەگە دەيىن (شۇباركول كومىرى) جەتەدى.

استاناداعى ەكى كومىر قويماسىندا شۇباركول كومىرىنىڭ ەڭ جوعارعى باعاسى 14 مىڭ تەڭگە، مايكۇبى كومىرى 8،5 مىڭ تەڭگەنى قۇرايدى.

ەنەرگەتيكا ميينسترلىگى الماتىدا ءبىر توننا كومىردىڭ باعاسى 15 مىڭ تەڭگەدەن باستاپ (قاراجىرا كومىرى) 23 مىڭ تەڭگەگە دەيىن (شۇباركول كومىرى) جەتەتىنىن ايتادى.

رەسمي تۇسىندىرمەگە ساي، تۇتىنۋشىلار ساتىپ الاتىن كومىر باعاسىنىڭ وسۋىنە تەمىرجول تاريفتەرى، دەلدالداردىڭ كوپتىگى جانە ولاردىڭ ءوز باعاسىن قويۋى ايتارلىقتاي اسەر ەتەدى.

مينيسترلىك كومىر باعاسىن بەلگىلەۋ، ساتىلىمدى رەتتەۋ جانە دەلدالداردى جويۋ ءوز قۇزىرەتىنە كىرمەيتىنىن، ساتىپ الۋ مەن حالىققا تاراتۋ جەرگىلىكتى اتقارۋ ورگاندارىنىڭ مىندەتىنە جاتاتىنىن ايتادى.