Mınıstrlik aqparatyna qaraǵanda, bıyl toǵyz aıda komýnaldyq jáne turmystyq qajettilikke 8 mıllıon tonna kómir jóneltilgen jáne bul ótken jylǵy kórsetkishten 1,5 mıllıon tonnaǵa kóp.
Mınıstrlik qazir kómir qoımalarynda qor jetkilikti ekenin jáne karerden nemese shahtadan shyǵarylatyn kómir baǵasy "aıtarlyqtaı qymbat emes" ekenin aıtady. Biraq vedomstvo kómirdiń kenishten satyp alǵandaǵy baǵasy qansha ekenin aıtpaıdy.
"Ońtústik Qazaqstan oblysy boıynsha Kentaý qalasyndaǵy kómir qory 37 myń tonna, Túrkistan qalasyndaǵy kómir qory 5 myń tonnany quraıdy. Shubarkól kómiriniń tonnasy 12,5 myń teńge, Maıkúbi kómiri 8,5 myń teńge turady" delingen mınıstrlik aqparatynda.
Al Qaraǵandyda bir tonna kómirdiń baǵasy 6 myń teńgeden bastap (Saryadyr kómiri) 11 myń teńgege deıin (Shubarkól kómiri) jetedi.
Astanadaǵy eki kómir qoımasynda Shubarkól kómiriniń eń joǵarǵy baǵasy 14 myń teńge, Maıkúbi kómiri 8,5 myń teńgeni quraıdy.
Energetıka mıınstrligi Almatyda bir tonna kómirdiń baǵasy 15 myń teńgeden bastap (Qarajyra kómiri) 23 myń teńgege deıin (Shubarkól kómiri) jetetinin aıtady.
Resmı túsindirmege saı, tutynýshylar satyp alatyn kómir baǵasynyń ósýine temirjol tarıfteri, deldaldardyń kóptigi jáne olardyń óz baǵasyn qoıýy aıtarlyqtaı áser etedi.
Mınıstrlik kómir baǵasyn belgileý, satylymdy retteý jáne deldaldardy joıý óz quzyretine kirmeıtinin, satyp alý men halyqqa taratý jergilikti atqarý organdarynyń mindetine jatatynyn aıtady.
