وسىنى تۇسىنگەن الماتى وبلىسىنىڭ بيزنەسمەندەرى باسقا وڭىرلەرگە ۇلگى بولارلىق يگى ءىستى قولعا العانعا ۇقسايدى. وبلىستاعى كاسىپكەرلەر كوپبالالى جانە الەۋمەتتىك جاعىنان از قامتىلعان وتباسىلارعا قامقورلىق كورسەتىپ جاتىر.
سونداي شاراپاتى مول شارانىڭ ءبىرى – تەكەلى قالاسىندا بولدى.
37 جاستاعى «كۇمىس القا» يەگەرى نازگۇل قوجىكەيەۆا وسى ۋاقىتقا دەيىن بالالارىن ءوزى ءوسىرىپ، ءوزى تاربيەلەپ كەلدى.
ون جىلدان بەرى جالدامالى پاتەردە تۇرىپ كەلە جاتقان اناعا تالدىقورعان قالاسىنىڭ اكىمى قامقورلىق كورسەتتى.
قالا اكىمى باحتيار ونەربايەۆ جەرگىلىكتى كاسىپكەرلەردىڭ كومەگىمەن جالعىزباستى اناعا 4 بولمەلى ءۇيدىڭ كىلتىن تابىس ەتتى. ايتا كەتەتىن ءبىر جايت، وتباسىنداعى ەڭ كىشكەنتاي ءسابي –سەگىز ايلىق. اتى –ينابات. كىشكەنتاي ءسابي ءبىر جاسقا تولعاندا اناسى نازگۇلگە «التىن القا» بەلگىسى تاپسىرىلاتىن بولدى.
قازىرگى ۋاقىتتا وتباسى مەملەكەتتەن اتاۋلى الەۋمەتتىك كومەك الىپ، بالالاردىڭ جاردەماقىسىمەن كۇنەلتىپ وتىر.
ەندى ولار 1 ساۋىردەن باستاپ كوپ بالالى انالارعا بەرىلەتىن مەملەكەتتىك 165997 تەڭگە جاردەماقى الادى.
–ون جىلدان بەرى پاتەر جالداپ تۇردىق. «ءوزىمىزدىڭ پاتەرىمىز قاشان بولادى؟» دەپ ارماندادىق. قايىرىمدى جاندار قوعامدا بار ەكەن. ەڭ الدىمەن قالا اكىمى باحتيار ونەربايەۆقا جانە ءۇيدى اپەرۋگە قولۇشىن سوزعان كاسىپكەر ازاماتتارعا مىڭ العىس. مەكتەپ تە – جانىمىزدا. بالالارىم ەندى الاڭسىز ۇيىقتايتىن بولدى. سوعان قۋانامىن،–دەيدى جالعىزباستى، كوپ بالالى انا.
ايتا كەتۋ كەرەك، قازىرگى ۋاقىتتا تەكەلى قالاسىندا 415 كوپ بالالى وتباسى تۇرادى. قالا اكىمى باحتيار ونەربايەۆتىڭ ايتۋىنشا، ولاردىڭ 170 -نە باسپانا كەرەك.
ال رەسمي تۇردە كەزەكتە تۇرعانى – 55 وتباسى عانا. ۇلتجاندى ازامات، قالا باسشىسى بۇل رەتتە كاسىپكەرلەر تاراپىنان جاسالىنىپ جاتقان يگى قادامداردىڭ جالعاساتىنىن اتاپ ءوتتى. ارنايى قۇرىلعان قايىرىمدىلىق قورىنان مامىر ايىندا تاعى دا كوپ بالالى ءبىر وتباسىعا باسپانا ساتىپ اپەرىلمەك.
–مەملەكەتتىك قولداۋدىڭ ارقاسىندا تەكەلى قالاسىنىڭ كاسىپكەرلەرى قايىرىمدىلىقتان سىرت قالا المادى. كاسىپكەر ۆيكتور سىچيەۆ ءبىزدىڭ باستامامىزدى قولداپ، نازگۇل قوجىكەيەۆاعا جەكە ءۇي ساتىپ الۋعا قولداۋ كورسەتتى. الەۋمەتتىك جاعىنان از قامتىلعان وتباسىلارعا ارناپ، ارنايى قور اشتىق. قورداعى قارجى سونداي مۇقتاج جاندارعا جۇمسالادى. بۇل ورايدا قايىرىمدىلىق شارالارى جالعاسىن تاباتىن بولادى،–دەيدى تەكەلى قالاسىنىڭ اكىمى باحتيار ونەربايەۆ.
دەرەككوز: qamshy.kz
