Fincraft Group باسشىسى كەڭەس راقىشيەۆتىڭ سوڭعى ءۇش جىل بويىندا تاۋ-كەن سالاسىنداعى اكتيۆتەرىن بىرتىندەپ ساتىپ، اقشاسىن مۇناي-گاز كومپانيالارىنا ينۆەستيسيالاپ جاتىر. سونىڭ ىشىندە كاسىپكەردىڭ تابىسىنان گورى شىعىنى كوپ تيمۋر قۇلىبايەۆقا تيەسىلى "شۇباركول پرەميۋمدى" ساتىپ الۋى، سونداي-اق بتا-نىڭ ەنشىلەس كومپانياسى بتا ۋكرايناداعى ۇلەسىن ساتقانى تۋرالى سىبىس ىسكەرلىك ورتادا ءبىرشاما سۇراق تۋعىزعان ەدى، دەپ حابارلايدى Dalanews.kz.
بۇل سۇراقتارعا Kapital.kz سايتىندا بۇگىن جاريالانعان كاسىپكەردىڭ سۇقباتىندا جاۋاپتار بەرىلىپتى.
"مامىلە بويىنشا "شۇباركول پرەميۋمىنىڭ» 50% ۇلەسى ءقازىر ماعان، 50% - شۋحرات يبراگيموۆقا تيەسىلى. ءبىراق جوبانى شۋحراتتىڭ كومانداسى تولىعىمەن باسقارادى، ويتكەنى ولاردىڭ بۇل باعىتتا كوبىرەك تاجىريبەسى بار. قازاقستانداعى ەڭ ءىرى ەنەرگەتيكالىق كومىر ءوندىرۋشى - "شۇباركول كومىر" يبراگيموۆتىڭ ERG توبىنا كىرەدى. مەنىڭ "شۇباركول پرەميۋمداعى" مىندەتىم - بولاشاقتا بۇل كومپانياعا ينۆەستورلار تارتۋ. بولاشاقتا ءبىز وندىرىسكە ارنالعان جاڭارتىلعان جابدىقتاردى الىپ كەلىپ، تاعى تاسقا تىڭ دۇنيەلەردى ەنگىزگىمىز كەلەدى"، - دەگەن ول بۇل اكتيۆتى قانشاعا ساتىپ العانىن اشىپ ايتپاۋدى ءجون كورىپتى.
- 2024 جىلدىڭ ماۋسىم ايىندا ءسىز "SNRG Capital Eurasia" ج ش س ارقىلى قازاقستاندىق كاسىپكەر سۇلتان مارەنوۆكە بتا-نىڭ ەنشىلەس كومپانياسى - بتا بەلارۋستى ساتتىڭىز. ءبىراق، ازىرگە ءسىزدىڭ اكتيۆىڭىزدە بتا ۋكراينا ءالى دە قالىپ وتىر. قىركۇيەك ايىندا بۇل اكتيۆ ءۇشىن 4 ميلليارد 546 ميلليون تەڭگە قولىڭىزعا تيگەنىن ايتتىڭىز. ونى ساتىپ جاتىرسىز عوي؟
"ءبىز ورتالىق بانكتىڭ جانە مونوپولياعا قارسى كوميتەتتىڭ (ۋكراينا) رۇقساتىن كۇتىپ وتىرمىز. وسى رۇقساتتى الا سالىسىمەن، ءبىز رەسمي تۇردە اتالعان مامىلە تۋرالى جاريالايمىز"، - دەپ جاۋاپ بەرىپتى كەڭەس راقىشيەۆ.
سۇقبات سوڭىندا ول ساتقان اكتيۆتەرىنەن تۇسكەن اقشانى مۇناي-گاز سەكتورىنا ينۆەستيسيالاۋعا مۇددەلى ەكەنىن ايتىپتى.
ايتا كەتسەك،كاسىپكەر كەڭەس راقىشيەۆتىڭ دا ۇلەسى بار EQUUS Petroleum Limited مۇناي-گاز كومپانياسىنىڭ اكسيالارى 2 قازاننان باستاپ استانا قور بيرجاسى (AIX) تىزىمىنەن الىنىپ تاستالدى. Fincraft Group 2022 جىلدىڭ قىركۇيەگىنەن باستاپ Equus Petroleum Limited كومپانياسىنىڭ 50%-ىنا يەلىك ەتەدى. راقىشيەۆتىڭ حولدينگى بۇل ۇلەستى بايقادام ابلاسانوۆ پەن نۇرلان جۇمانوۆتىڭ International Petroleum Holding B. V. كومپانياسىنان ساتىپ الدى. ولار 37،67% اكسيانى وزدەرىنە قالدىردى.
