رەسەي فەدەراسياسىنىڭ تەرگەۋ كوميتەتى كاسپيي قۇبىر كونسورسيۋمى - ازاماتتىق نىسانىنا جاسالعان شابۋىل فاكتىسى بويىنشا قىلمىستىق ءىس قوزعادى. بۇل تۋرالى كونسورسيۋمنىڭ باسپا ءسوز قىزمەتى مالىمدەدى، دەپ جازادى Dalanews.kz.
"2025 جىلدىڭ 17 اقپانىندا رەسەي فەدەراسياسى تەرگەۋ كوميتەتىنىڭ باس تەرگەۋ باسقارماسى رف قىلمىستىق كودەكسىنىڭ 205-بابىنىڭ 2-بولىگىنىڭ "ا"، "ۆ" تارماقتارىندا قاراستىرىلعان قىلمىس بەلگىلەرى بويىنشا قىلمىستىق ءىس قوزعاۋ تۋرالى شەشىم قابىلدادى. ءىس ۋكراينا قورعانىس مينيسترلىگىنىڭ جانە باسقا دا اسكەري قۇرىلىمداردىڭ اسكەري قىزمەتشىلەرىنە قارسى قوزعالدى، ولار ۋكراينانىڭ باقىلاۋىنداعى اۋماقتا ورناسا وتىرىپ، قىلمىستىق بۇيرىقتاردى ورىنداۋدا ازاماتتىق ينفراقۇرىلىم نىساندارىنا ۇشقىشسىز ۇشۋ اپپاراتتارىن قولدانا شابۋىل جاسادى"، دەلىنگەن كومپانيا حابارلاماسىندا.
ايتا كەتسەك، 2025 جىلدىڭ 17 اقپانىندا كراسنودار ولكەسىنىڭ كاۆكاز اۋدانىندا ورنالاسقان كروپوتكينسكايا مۇناي ايداۋ ستانساسى دروندار شابۋىلىنا ۇشىرادى. قازا تاپقاندار مەن زارداپ شەككەندەر جوق، الايدا مۇناي تاسىمالداۋ نىسانى ءبۇلىنىپ، قولدانىستان شىعىپ قالدى.
"18 اقپاندا وقيعا ورنىندا كقك باسشىلىق توبى جانە كونسورسيۋمنىڭ باتىس ءوڭىرىنىڭ وكىلدەرى بولىپ، تەرريتوريانى شولىپ شىقتى. مامانداردىڭ الدىنا قىسقا مەرزىمدە مەردىگەرلەرمەن بىرلەسىپ، ستانسيانىڭ بارلىق قوسالقى وبەكتىلەرىنىڭ جۇمىسقا قابىلەتتىلىگىن قالپىنا كەلتىرۋ ءۇشىن جوندەۋ جۇمىستارىن جۇرگىزۋ مىندەتى قويىلدى"، - دەپ اتاپ ءوتتى كونسورسيۋمداعىلار.
سونداي-اق "ترانسنەفت" جاق كاسپيي قۇبىر كونسورسيۋمىنىڭ (كقك) "كروپوتكينسكايا" مۇناي ايداۋ ستانسياسىنا جاسالعان دروندار شابۋىلىنىڭ سالدارىنان قانشا شىعىن بولاتىنىن جاريالادى.
"كقك ماماندارىنىڭ پىكىرىنشە، اتالعان سوققىنىڭ سالدارىنان بولعان اقاۋلاردى جويۋعا 1،5 ايدان 2 ايعا دەيىن ۋاقىت كەتەدى، بۇل قازاقستاننىڭ مۇناي ايداۋ كولەمىنىڭ شامامەن 30%-عا تومەندەۋىنە اكەلىپ سوقتىرۋى مۇمكىن"، - دەپ ءتۇسىندىردى كومپانياداعىلار.
ايتا كەتەيىك، كقك تەڭىز – نوۆوروسسييسك باعىتى بويىنشا مۇناي تاسىمالداۋدى جالعاستىرۋدا. جۇك جونەلتۋشىلەردەن مۇناي قابىلداۋ شاراسى مۇنايدى ايداۋ بويىنشا ناقتىلانعان تەحنيكالىق مۇمكىندىكتەر بويىنشا جۇزەگە اسىرىلادى.
كاسپيي قۇبىرى كونسورسيۋمىنىڭ كۋباننىڭ كاۆكاز اۋدانىنداعى "كروپوتكينسكايا" مۇناي ايداۋ ستانساسى رف تەرريتورياسىندا ورنالاسقان ەڭ ءىرى نىسان بولىپ تابىلادى. كقك قۇبىر جەلىلەرى جۇيەسى - تمد تەرريتورياسىنداعى ەنەرگەتيكالىق سالاداعى ءىرى جوبالاردىڭ ءبىرى. تەڭىز-نوۆوروسسييسك قۇبىرىنىڭ ۇزىندىعى 1 511 شاقىرىمدى قۇرايدى. بۇل باعىت بارلىق ەكسپورتقا باعىتتالاتىن مۇنايدىڭ ۇشتەن ەكىسىنەن استامىن قامتيدى. مۇناي سالاسىنىڭ مامانى ولجاس ءبايدىلدينوۆتىڭ ناقتىلاۋىنشا، بۇل قۇبىرمەن ايدالاتىن 63 ملن توننا مۇنايدىڭ 53،8 ملن تونناسى – قازاقتىكى، ناقتىراق ايتقاندا، تەڭىز، قاراشىعاناق جانە قاشاعان مۇنايى (بۇكىل كولەمنىڭ 86%)، سونىمەن قاتار باسقا دا قازاقستاندىق كومپانيالاردىڭ دا شيكىزاتى بار. سوندىقتان ول قازاقستان دا بۇل رەتتە رەسمي ۇستانىمىن ءبىلدىرىپ، ءوز اكتيۆىن قورعاۋ كەرەكتىگىن ايتادى. ال الدا دا بۇل قۇبىرعا شابۋىل جاسالىپ، ول بۇلىنەتىن بولسا، ساراپشىنىڭ ايتۋىنشا، ونداي جاعدايدا قازاقستان مۇنايىنىڭ ەكسپورتى كۇرت قىسقارىپ، ءوز كەزەگىندە ول بيۋدجەت تۇسىمدەرىنە، ودان ءارى تەڭگە باعامىنا كەرى اسەر ەتۋى ىقتيمال.
كقك اكسيونەرلەرى: رەسەي فەدەراسياسى -2 4%، "كقك كومپانياسى" مك (جشق) – 7%، "قازمۇنايگاز" ۇك" اق - 19%، Kazakhstan Pipeline Ventures LLC - 1،75%، Chevron Caspian Pipeline Consortium Company - 15%، لۋكويل ينتەرنەشنل گمبح – 12،5%، Mobil Caspian Pipeline Company – 7،5%، Rosneft-Shell Caspian Ventures Limited – 7،5%، BG Overseas Holdings Limited-2%، Eni International N. A. N. V. S. ar. l. - 2% جانە Oryx Caspian Pipeline LLC – 1،75%.
بۇعان دەيىن سايتىمىزدا "مۇناي قۇبىرىنا جاسالعان شابۋىل: مامان ۋكرايناداعى ەلشىنى الدىرتىپ، ماسەلە قوزعاۋدى ۇسىنادى" دەگەن ماقالا جاريالانعان بولاتىن.
