كەشە ورىس ينتەرنەتىن شولىپ شىققان ەدىم، رەسەيدىڭ ماقتالى توك-شوۋلارىندا ويبايلاعان جيرينوۆسكييدىڭ بايبالامىن كورىپ ايىزىم قانىپ قالدى. كەيدە بۇلاردىڭ كۇل مەن قوقىسىنىڭ اراسىنان ساف التىنداي ءبىر اقيقات جىلت ەتە قالادى...

مەن ءوزىمدى جالىندى پانتۇركيستەر قاتارىنا قوسا المايمىن، ءبىراق جيريكتىڭ تومەندەگى ءسوز ۇنادى. سونداعى جيرينوۆسكيي ءسوزىنىڭ قىسقاشا ماعىناسى مىناداي:

«تۇركىلەردىڭ سانى 200 ميلليون، ولار ارمەندەردى قايتسىن،  تەگىستەپ وتەدى، ودان سوڭ بۇلار كەلەشەكتە اسكەري وداق قۇرىپ، ىرگەمىزگە كەلەدى. كەيىن ولار قىتايدىڭ باتىس ولكەسىنە باسىپ كىرىپ، قىتايدى تاس-تالقانىن شىعارادى. تۇركىلەردىڭ ورتاق ءتىلى بار. تۇرىك ءتىلى دەگەنىمىز – ءازىربايجان ءتىلى،  تۇرىكپەن ءتىلى، قازاق ءتىلى، باشقۇرت ءتىلى، وزبەك پەن تاتار ءتىلى، بۇلاردى تاعى ءدىن بىرىكتىرەدى» دەپ وڭدى-سولدى ويبايلادى جيرينوۆسكيي. 

رەسەيدەگى جيرينوۆسكيي دەگەنىمىز كىم؟ ول – ءومىرى ىشتەن تىنىپ ۇندەمەي وتىراتىن كرەملدىڭ ويىن سىرتقا لاق ەتكىزىپ شىعارا سالاتىن بالابولداردىڭ بىرەۋى. ول وسى سوزدەرىمەن مىنا جەردە كرەملدىڭ قازىرگى  جاي-كۇيىن كورسەتىپ وتىر.

مەنىڭشە، ماسكەۋ تاۋلى قاراباقتاعى قورقىنىش پەن ۇرەيدەن ءالى وز-وزىنە كەلە الماي وتىر. پۋتين ءبىر شىقتى دا «ءبىز جانجالعا كيلىگەتىندەي سوعىس ارمەنيا تەرريتورياسىندا بوپ جاتقان جوق قوي» دەدى. ونى ەستىپ پاشينيان ءتىپتى ءتۇڭىل كەتكەنى انىق.

ماسكۇنەم، القاش ەلسيننىڭ ءوزى كەزىندە ارمەنياعا تاۋلى قاراباقتى تارتىپ الىپ بەرگەن بولاتىن. ال مىنا جەردە  «ماڭگىلىك»، «قۇدىرەتتى»   پۋتين... تومەن قاراپ وتىرىپ قالدى.

ءسوز جوق، انادولىنى ارقالانعان ءازىربايجان الەمگە جاڭا سوعىس تاكتيكاسىن كورسەتتى. بۇنداي سوعىستى بۇرىن سوڭدى كىم كورگەن ءوزى..

سوعىس باستالا سالىسىمەن العاشقى كۇندەرى بۇكىل اسكەري تەحنيكاسىنان ايىرىلىپ قالىپ، ءتىپتى ساربازدارىن دا تاسىمالداي قالۋعا شاماسى كەلمەي قالۋ دەگەن سۇمدىق قوي. ارمەندەر ءقازىر ءسويتىپ كۇيرەپ وتىر.

ءازىربايجان اسكەرى جىلت ەتكەندى، قىلت ەتكەندى دروندارىمەن قاعىپ تاستاپ باس كوتەرتپەي جاتىر. ال قارسىلاسىنا ول درونداردى اتىپ ءتۇسىرۋ دەگەن ءتىپتى مۇمكىن ەمەس نارسە.

21 عاسىردىڭ سوعىسى شامامەن وسىنداي بولماق... تانكىمەن ميتىڭداپ، بتر-دى جاعالاپ،  ونىڭ ارتىنان ۋرالاپ جۇگىرىپ، قىراتقا تالاسۋ دەگەنىڭىز ارتتا قالدى (ءبىراق ورىستار ءالى سولاي سوعىسادى).

قازىرگى سوعىستاردا كىم زاماناۋي تەحنولوگيا يەلەنىپ كوك اسپاندى بيلەيدى، سول سوعىستىڭ تاعدىرىن شەشەدى.

كالاشنيكوۆ دەگەن ورىستىڭ تمد ىستەرى جونىندەگى ءبىر دەپۋتاتى بار-تىن.

ول بۇرىن ۋكراين جانجالى كەزىندە وزدەرىنىڭ ماقتالى توك شوۋلارىندا اۋىزدارى كوبىكتەنىپ جۇرتتى سويلەتپەي بايبالام سالاتىن وڭباعان يمپەرشىلەردىڭ  ءبىرى ەدى. سول كەشە جۋاسىپ قالىپتى.

"ءبىر ۇلكەن سوعىس كەلە جاتقان سياقتى ەلىمىزگە، ءبىراق... ودان سوڭ ءبىز ەل رەتىندە تارقاپ كەتەمىز بە، باياعىدا سوۆەت ۇكىمەتى كۇيرەمەي تۇرعاندا، كىم ويلاعان ونى تارقايدى دەپ، قازىرگى جاعدايىمىز سوعان ۇقساپ بارادى. ءبىزدى ءبىر مەزەتتە جان-جاقتان قىسا باستادى. بەلارۋس، ءازىربايجان - ارمەنيا، قىرعىزستان... بۇنى كەزدەيسوقتىق دەپ ايتۋعا بولمايدى، تەگىن ەمەس» دەپ جەلكەسىن قاسىدى ورىستىڭ يمپەرشىل دەپۋتاتى.

قىسقاسى، ورىس ءقازىر كادىمگىدەي ساسقالاقتاپ وتىر.

ولجاس ءابىل