اقتوبە اكىمى ازامات بەكەتتىڭ قولاستىندا ىستەگەن شەنەۋنىك ابزال تيلماگامبەتوۆ جول تاڭبالارى ءۇشىن 272 ملن تەڭگە كولەمىندە اقشا قولدانعانى ءۇشىن سوت الدىندا جاۋاپ بەرەدى، دەپ حابارلايدى Dalanews.kz Halyqstan-عا سىلتەمە جاساپ.
41 جاستاعى ابزال تيلماگامبەتوۆ وسى ۋاقىتقا دەيىن اقتوبە جول قوزعالىسىنىڭ قاۋىپسىزدىگىن قامتاماسىز ەتۋ جانە سيفرلىق تەحنولوگيالار ورتالىعىنىڭ ديرەكتورى قىزمەتىن اتقارعان.
بۇل ۇيىم تىكەلەي قالا اكىمدىگىنىڭ تۇرعىن ۇي-كوممۋنالدىق شارۋاشىلىعى، جولاۋشىلار كولىگى جانە اۆتوموبيل جولدارى بولىمىنە، ياعني قالا اكىمدىگىنە قارايدى.
"ورتالىقتىڭ نەگىزگى مىندەتتەرىنىڭ ءبىرى – قالا كوشەلەرىنە جول تاڭبالارىن سىزۋ. سيفرلىق تەحنولوگيالار ورتالىعى بۇل جۇمىسپەن اكىمدىك بەينەروليكتەرىنىڭ اسەرلى مونتاجى مەن كوركەمدىگىنە قاراعاندا، كۇندىز-تۇنى اينالىسقانداي كورىندى. قالادا بوياۋ بۇرىككىش قۇرال تيمەگەن اسفالت قالماعانداي اسەر قالدىرعان"، دەلىنگەن جازبادا.
الايدا جەرگىلىكتى پروكۋراتۋرانىڭ بۇگىنگى مالىمدەمەلەرى بۇل تەك كوزبوياۋشىلىق بولعانىن كورسەتەدى. تەرگەۋ مالىمەتىنشە، تيلماگامبەتوۆ «قىزمەتتىك جاعدايىن پايدالانا وتىرىپ، مەملەكەتتىك ساتىپ الۋ كەلىسىمشارتتارى اياسىندا جول تاڭبالارىن سىزۋ بويىنشا ناقتى ورىندالماعان جۇمىستار ءۇشىن 272 ملن تەڭگە كولەمىندەگى اكتىلەرگە قول قويعان».
جۋىردا تيلماگامبەتوۆ قاماۋعا الىندى. ول سەنىپ تاپسىرىلعان بوتەن مۇلىكتى يەمدەنۋ نەمەسە ىسىراپ ەتۋ بابى بويىنشا ايىپتالۋدا.
وسى باپ بويىنشا تاعى ءبىر ادام – كاسىپكەر اسلان كۋسۋموۆ تا ايىپتالىپ وتىر، الايدا ول ءۇيقاماقتا.
قىلمىستىق ءىس سوتقا جولداندى.
