ماجىلىستە جول-كولىك وقيعاسىنان زارداپ شەككەن تاراپقا بەرىلۋى ءتيىس ساقتاندىرۋ تولەمدەرىنىڭ جاڭا مولشەرلەمەلەرىن قاراستىراتىن قۇجات قارالۋدا. ونىڭ كولەمى ەكى ەسە ءوسۋى مۇمكىن. ماسەلەن، قازىرگى جاعدايدا كولىككە زاقىم كەلگەن كەزدە مىندەتتى اۆتوساقتاندىرۋ بويىنشا تولەمنىڭ ەڭ جوعارى سوماسى 600 ايلىق ەسەپتىك كورسەتكىشتى (اەك)، ياعني 2025 جىلى 2 359 200 تەڭگەنى قۇرايدى. الايدا، كوپ ۇزاماي بۇل سوما ەكى ەسە ارتۋى ىقتيمال، دەپ جازادى Dalanews.kz.
ءقازىر ق ر پارلامەنتى ءماجىلىسىنىڭ دەپۋتاتتارى كولىك قۇرالدارى يەلەرىنىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋ تۋرالى زاڭعا (ءمجا) ەنگىزىلگەن وزگەرىستەر مەن تۇزەتۋلەر جونىندەگى زاڭ جوباسىن قاراۋدا.
قۇجاتتا دەنساۋلىققا زيان كەلتىرگەنى ءۇشىن جول-كولىك وقيعاسىنان (جكو) زارداپ شەككەندەرگە تولەنەتىن ساقتاندىرۋ تولەمدەرىنىڭ مىناداي شەكتى مولشەرىن بەلگىلەۋ ۇسىنىلادى:
- مۇگەدەكتىككە اكەلىپ سوقتىرماعان جاراقاتتار – 300 اەك دەيىن (2025 جىل بويىنشا 1 179 600 تەڭگە)؛
- ءىىى- توپتاعى مۇگەدەكتىككە ۇشىراتۋ - 1 000 اەك دەيىن (3 932 000 تەڭگە)؛
- ءىى-توپتاعى مۇگەدەكتىككە ۇشىراتۋ - 2 400 اەك دەيىن (9 436 800 تەڭگە)؛
- ءى-توپتاعى مۇگەدەكتىككە ۇشىراتۋ - 3 200 اەك دەيىن (12 582 400 تەڭگە)؛
- بالانىڭ مۇگەدەكتىككە ۇشىراۋى - 2 000 اەك دەيىن (7 864 000 تەڭگە)؛
- كىسى قازاسى - 4 000 اەك دەيىن (15 728 000 تەڭگە)؛
زارداپ شەككەن ادامنىڭ ستاسيوناردا ەمدەلگەن ءاربىر كۇنى ءۇشىن ساقتاندىرۋ كومپانياسى كەم دەگەندە 2 اەك (7 864 تەڭگە) تولەۋگە ءتيىس. ءبىراق جابىرلەنۋشىنىڭ مۇلكىنە زيان كەلتىرگەنى ءۇشىن ساقتاندىرۋ تولەمىنىڭ سوماسىن 1 200 اەك (4 718 400 تەڭگە) دەيىن ۇلعايتۋ جوسپارلانۋدا.
ەگەر زارداپ شەككەن ادام بىرنەشەۋ بولسا، وندا ءارقايسىسىنا بەرىلەتىن تولەم 1200 اەك بولۋى مۇمكىن. الايدا زارداپ شەككەندەردىڭ سانىنا قاراماستان جالپى شەكتى كولەم بار – بارلىعىنا 4 000 اەك، ياعني 2025 جىلعى ەسەپ بويىنشا 15 728 000 تەڭگە. تولەم الىنعان زالالعا قاراي پروپورسيونالدى تۇردە تاعايىندالادى.
