جىل باسىنان بەرى شەتەلدە ىزدەۋدە جۇرگەن 264 قىلمىسكەر قازاقستاندا ۇستالدى، دەپ حابارلايدى Dalanews.kz.
ق ر ىشكى ىستەر مينيسترلىگىنىڭ رەسمي ينتەرنەت-رەسۋرسىنىڭ مالىمەتىنشە، 2025 جىلدىڭ العاشقى ءتورت ايىندا ق ر ءىىم قىلمىستىق پوليسيا دەپارتامەنتىنىڭ ۇيلەستىرۋىمەن اۋماقتىق پوليسيا دەپارتامەنتتەرىنىڭ جەدەل قىزمەتكەرلەرى ءتۇرلى قىلمىس جاساعانى ءۇشىن شەت مەملەكەتتەردىڭ ىشكى ىستەر ورگاندارى ىزدەستىرىپ جاتقان 264 ادامدى ۇستاعان.
ماسەلەن، جامبىل وبلىسىندا وزبەكستان رەسپۋبليكاسىنىڭ 48 جاستاعى ازاماتى قولعا ءتۇستى. تەرگەۋ دەرەكتەرىنە سۇيەنسەك، ول بيىل اقپاندا تاشكەنت وبلىسىندا وتباسىلىق جانجال كەزىندە ايەلىنە اۋىر دەنە جاراقاتىن سالىپ، ونىڭ ولىمىنە سەبەپكەر بولعان.
سونداي-اق تۇركىستان وبلىسىندا 2003 جىلدان بەرى كىسى ءولتىردى دەگەن كۇدىكپەن حالىقارالىق ىزدەۋدە جۇرگەن 71 جاستاعى ەر ادام ۇستالىپ، قاماۋعا الىندى.
الماتى قالاسىندا مەملەكەتارالىق ىزدەۋدە جۇرگەن وزبەكستاندىق ازامات تا قولعا ءتۇسىپ، ۋاقىتشا ۇستاۋ يزولياتورىنا قامالدى. ول 2012 جىلى چيرچيك قالاسىندا ازاماتتىق نەكەدەگى ايەلىن ۇرىپ-سوعىپ، بۋىندىرىپ ولتىرگەن.
وعان قوسا، جامبىل وبلىسىندا قىرعىزستان ازاماتى ۇستالدى. تەرگەۋ مالىمەتتەرى بويىنشا، ول 2022 جىلى رەسەيدىڭ ليپەسك قالاسىندا تانىسىن پىشاقتاپ ولتىرگەن.
سونىمەن قاتار ءىىم حابارلاۋىنشا، قازاقستان تاراپىنىڭ سۇرانىسى بويىنشا شەتەلدە 57 قىلمىسكەر انىقتالىپ، ۇستالعان.
