ال سارقاندىق نازيگۇل باتىرحان العاشقى تىگىن ونەرىن قۇراق كوپەدەن باستاپ، ءقازىر ءوز قولىمەن تىگىلگەن ءۇي ينتەرەرىن بەزەندىرۋگە ارنالعان ءستيلدى اكسەسسۋارلارىن تۇتىنۋشىلارعا ۇسىنا باستادى. تىگىن شەبەرلەرى جەكە ءىس اشۋدىڭ العاشقى باسپالداقتارى قالاي باستالعانىن ايتىپ بەردى.
– قۇراق قۇراۋ، تەكەمەت باسۋ، سىرماق تىگۋ سىندى ۇلتتىق ءداستۇرىمىزدى بالا كەزدەن بويىمىزعا ءسىڭىرىپ وستىك. اپالارىمىزعا قولعابىس ەتىپ، تىگىن تەحنيكاسىن ۇيرەندىك. جالپى تىگىن تىگۋ شەبەرلىگى – ماعان انامنان دارىعان ونەر. العاشىندا تەك ۇيدە تاپسىرىس قابىلداپ، كەيىن حالىقتىڭ كوڭىلىنەن شىعىپ، سۇرانىس ۇلعايعان سوڭ تىگىن شەبەرحاناسىن اشۋ تۋرالى وي كەلدى.
قىزىم دا مەنىڭ باستامامدى قولداپ، ءوز كاسىبىمىزدى جولعا قويۋ ءۇشىن مەملەكەتتىك باعدارلامالارعا قاتىسۋعا سۇرانىس بىلدىردىك. ۇسىنعان جوبامىز جەڭىسكە جەتىپ، ءوز ءىسىمىزدى باستاپ كەتتىك. شەبەرحانادا 6 ادام جۇمىس ىستەيمىز. قۇراقتىڭ ءتۇرلى ورنەكتەرىن ايشىقتاپ، تۇتىنۋشىنىڭ تالعامىنا ساي تاپسىرىستار قابىلدايمىز. قازىرگى تاڭدا ۇلتتىق ناقىشتاعى بۇيىمدارىمىزعا، اسىرەسە، قىز جاساۋى مەن كورپەشە، جاستىق، قورجىندارعا سۇرانىس جوعارى، – دەيدى قارلىعاش دولاشيەۆا.
اناسىنا قولداۋ ءبىلدىرىپ، ءبىر جاعىنا شىعىسقان جۇرگەن جاس كاسىپكەر جازەركە ناعىزبەك قىزى:
– جاڭادان كاسىبىن اشىپ، بيزنەس-يدەيانى تاڭداۋ، بيزنەس-جوسپار ازىرلەۋ، ساتۋدى جولعا قويۋ – مۇنىڭ ءبارى وڭاي شارۋا ەمەس. كاسىپپەن اينالىسۋ ۇلكەن تاۋەكەلدىلىكتى تالاپ ەتەدى. بىزدە اناممەن بىرگە كاسىپ اشۋ تۋرالى شەشىمگە كەلىپ، ءوز ءىسىمىزدى اشتىق.
ارينە، العاشقى ايلاردا ءبىرقاتار قيىندىقتارمەن كەزىگىپ، سول ارقىلى ءبىراز تاجىربيە جينادىق. ءقازىر جاڭا تەحنولوگيالاردىڭ زامانى. مەن اناما تەك تىگىن تىگۋ جاعىنان عانا ەمەس، دايىن ونىمدەرىن الەۋمەتتىك جەلىلەرگە ورنالاستىرۋعا دا كومەكتەسەمىن.
جارناما نارىعىن دا زەرتتەپ، حالىققا قولايلى قىزمەت ءتۇرىن ۇسىنۋعا كۇش سالۋدامىز. قولونەر ورتالىعىمىزدا ءتۇرلى زاماناۋي ۇلگىدەگى ماتەريالداردى پايدالانا وتىرىپ، توي-تومالاقتارعا ارنالعان سىي-سىياپاتتاردى دا دايىنداۋعا مۇمكىندىگىمىز بار. سونداي-اق تىگىنشىلەرىمىزدىڭ جۇمىسىن جەڭىلدەتۋ ماقساتىندا قۇرال-جابدىقتارىمىزدىڭ قورىن كەڭەيتۋ قاجەتتىلىگى دە تۋىنداپ وتىر.
سەحتا ءارتۇرلى بۇيىمداردى جەدەل ازىرلەۋ ءۇشىن جاڭا ستانوكتار مەن دانەكەرلەۋشى لازەر قۇرىلعىلارى قاجەت. سول ماقساتتا تاعى ءبىر مەملەكەتتىك باعدارلاماعا قاتىسىپ، ناتيجەسىن كۇتىپ وتىرمىز. حالىق العىسىن الۋ، ءوز ءىسىمىزدىڭ ناعىز شەبەرى اتانۋ – باستى ماقساتىمىز. سول باعىتتا ايانباي ەڭبەك ەتۋگە ءازىرمىز، – دەيدى.
شەبەرحانا ۇجىمىنىڭ ونىمدەرى تەك تەكەلىدە عانا ەمەس، تۋريستەردىڭ دە اراسىندا سۇرانىسقا يە. ماسەلەن تۇركيا، گەرمانيادان كەلگەن قوناقتار قازاقي ناقىشتاعى بۇيىمدارعا تاپسىرىس بەرىپ، قىزىعۋشىلىق تانىتقان. شەت ەلدەرگە كادەسىي رەتىندە ۇلتتىق بۇيىمدارىن الاتىن تۇراقتى تۇتىنۋشىلارى دا از ەمەس.
نارىقتا وزدەرىن ورنىقتىرىپ كەلە جاتقان قولونەر شەبەرحاناسىنىڭ ۇجىمى جۋىردا وبلىس ورتالىعىندا وتكەن ىسكەر ايەلدەردىڭ ءوڭىرارالىق فورۋمىنا قاتىسىپ، «قۇراق كورپە» نوميناسياسى بويىنشا ارنايى ديپلوممەن جانە اقشالاي سىيلىقپەن ماراپاتتالعان.
ءدال وسى فورۋمدا «قۇراق كورپە» اتالىمى بويىنشا ماراپات العان قولونەرشىنىڭ تاعى ءبىرى – سارقاندىق نازيگۇل باتىرحان. العاشقى تىگىن جۇمىستارىن قۇراق كورپە تىگۋدەن باستاعان كوپ بالالى انا تاۋار تۇرلەرىن بىرتە-بىرتە كوبەيتە ءتۇستى. ءقازىر تۇتىنۋشىلارعا ءۇي ينتەرەرىن بەزەندىرۋگە ارنالعان ءستيلدى اكسەسسۋارلار ۇسىنا باستادى.
سولاردىڭ ءبىرى – «ءۇي تۇمارى». ۇلتتىق تۇمارلار نازيگۇلدىڭ تىگىن ونەرىندەگى وزىنە ءتان ەرەكشەلىگى دەسە دە بولادى. ولاردىڭ ءارقايسىسى تەك ءتۇس ۇيلەسىمىنە عانا ەمەس، سونىمەن قاتار سەمانتيكالىق مازمۇنىمەن دە وزگەشەلەنەدى.
الدىمەن نازيگۇل تەك ءوزىنىڭ وتباسى مەن تۋىستارى ءۇشىن تىگەتىن، بىرتە-بىرتە سۇيىكتى ءىسى تابىس اكەلەتىن شاعىن بيزنەسكە ۇلاستى. ازىرگە تاپسىرىستار ءوزى تۇراتىن سارقان قالاسىنى تۇرعىندارىنان تۇسەدى، ءبىراق ءىسىن جاڭا باستاعان ايەل مۇنىمەن شەكتەلمەكشى ەمەس. ءبىرىنشى كەزەكتە سارقان اۋدانىنىڭ ىسكەر ايەلدەر كەڭەسىنىڭ قۇرامىنا كىرىپ، ارىپتەستەرىن ناتيجەسىمەن قۋانتتى. جاقىندا تالدىقورعاندا وتكەن «ءوڭىردىڭ تۇراقتى دامۋىنداعى ايەلدەر باستامالارى» اتتى ءوڭىرارالىق ىسكەر ايەلدەر فورۋمىنا قاتىسىپ، ءوز جۇمىستارىن تانىستىرىپ، فورۋم اياسىندا ۇيىمداستىرىلعان «قۇراق كورپە» بايقاۋىنىڭ جەڭىمپازى اتاندى. 100 مىڭ تەڭگەنىڭ سەرتيفيكاتى مەن ديپلومىن الىپ، لايىقتى ماراپاتقا يە بولدى. جالپى بۇل بايقاۋعا جەتىسۋ وبلىسى مەن الماتى وبلىسىنىڭ 57 قولونەرشىسى قاتىسىپ، 150-دەن استام جۇمىس ۇسىنىلعان بولاتىن.
– تىگىن سەحىن اشۋدى ارماندايمىن، وندا كورپەدەن بولەك ءتۇرلى ۇلتتىق كيىمدەر مەن ۇيگە ارنالعان اشەكەيلەر جاسايتىن بولامىن. وسىلايشا ءداستۇرلى قازاق قولونەرىن ساقتاۋعا جانە قۇراق تىگۋدى ناسيحاتتاۋعا ۇلەس قوسسام دەيمىن.
ءقازىر بالالارعا ارنالعان ۇلتتىق كيىمدەر مەن ۇيگە ماتادان جاسالعان تۇمارلار تىگەمىن. ولار ۇلتتىق ورنەكتەرمەن، اشىق ءتۇستى مونشاقتارمەن، ۇكى قاۋىرسىندارىمەن بەزەندىرىلگەن ءتۇرلى پىشىندە، ءارقيلى تۇستە دايىندالادى. مىسالى، شاڭىراق نەمەسە دومبىرا تۇرىندەگىسى دە بار. بۇل جاي عانا بەزەندىرۋ ەمەس، تابىسقا جەتكىزەتىن، وركەندەۋگە باستايتىن، سونداي-اق جاعىمسىز ەنەرگيادان قورعايتىن تۇمارلار دەۋگە بولادى. سەبەبى ادامنىڭ ءوز قولىمەن جاساعان زاتتارىندا قول ەڭبەگى عانا ەمەس، ونەرپازدىڭ رۋحاني ەنەرگياسى دا مورلەنىپ تۇرادى، – دەيدى نازيگۇل باتىرحان.
