كۇنى كەشە قازاقستان پرەزيدەنتى قاسىم-جومارت توقايەۆ جۇرتپەن جاقىنداسۋ ءۇشىن بيلىك بۇتاعىنداعى بارلىق ازاماتتاردىڭ الەۋمەتتىك جەلىگە تىركەلۋى ماڭىزدى ەكەنىن ايتقان.
تۆيتتەرىندە ەل ومىرىندەگى وزگەرىستەر مەن الەم نازارىنداعى تاقىرىپتاردان تىس قالماي، ويىن ورتاعا سالىپ ۇيرەنگەن توقايەۆ الەۋمەتتىك جەلىنىڭ قوعامدىق پىكىردى توقايلاستىراتىن الاڭعا اينالعانىنا الدەقاشان كوزى جەتكەن.
پرەزيدەنت تاپسىرماسىنان كەيىن وڭىرلەردەگى بارلىق اكىمدەر الەۋمەتتىك جەلىگە تىركەلىپ، رەسمي پاراقشالارىن اشتى. بۇعان اۋدان-اۋىل اكىمدەرى قوسىلىپ، باسقارما باسشىلارى قوستاپ، اينالاسى ءبىر اپتانىڭ ىشىندە جەلىگە تىركەلدى.
پوليسيا باسشىلارىنىڭ اراسىنداعى العاشقى بولىپ الماتى وبلىستىق پوليسيا دەپارتامەنتىنىڭ باسشىسى، گەنەرال-مايور مۇرات ۇرۇمحانوۆ الەۋمەتتىك جەلىدەن ءوز پاراقشاسىن اشىپ، وزگە ارىپتەستەرىنە ۇلگى كورسەتتى.
پاراقشانى تىركەپ قويۋ بولەك، ونى جۇرگىزۋ، جۇرتتىڭ ساۋالىنا جاۋاپ بەرۋ – ۇلكەن جاۋاپكەرشىلىك.
گەنەرال ۇرۇمحانوۆتىڭ بۇل ورايدا رەسميلىككە ۇرىنباي، الماتى ءوڭىرىنىڭ تۇرعىندارىن اشىق ديالوگقا شاقىرعانى جەلىدەگى جۇرتتىڭ كوڭىلىنەن شىقتى.
مۇرات ۇرۇمحانوۆ قىزمەتتىك تىكەلەي تەلەفون ءنومىرىن جاريالاپ، «تىكەلەي جەلىدە» ازاماتتاردىڭ وتىنىشتەرى مەن ۇسىنىستارىن تىڭداۋعا دايىن ەكەنىن جەتكىزدى.
«ءححى عاسىر – جاڭا تەحنولوگيالار مەن ينتەرنەت عاسىرى. بارلىعىمىز دا ۋاقىت تالابىنا سايكەس ارەكەت ەتۋىمىز قاجەت. بەلسەندى بولۋ، ازاماتتارمەن ديالوگ قۇرۋ، اسىرەسە الەۋمەتتىك جەلىلەردە بايلانىس ورناتۋ – زاماناۋي تالاپ.
وسىعان وراي، Facebook جەلىسىندەگى مەنىڭ اتىما اشىلعان پاراقشا اشىق ديالوگ قۇرۋعا جانە حالىقپەن كەلەلى بايلانىس ورناتۋعا كومەكتەسەتىنى انىق.
سونداي-اق تىعىز قارىم-قاتىناس ورناتۋ ءۇشىن ازاماتتار پوليسيا قىزمەتىن ودان ءارى جاقسارتۋ تۋرالى ۇسىنىستارىن 8-7282-608001 ءنومىرى ارقىلى ماعان تىكەلەي قوڭىراۋ سوعۋ ارقىلى ايتا الادى»، – دەپ جازدى مۇرات ۇرۇمحانوۆ پاراقشاسىنداعى العاشقى پوستىندا.
بۇدان بولەك، پوليسيا باسشىسى ءوزىنىڭ جانە ورىنباسارلارىنىڭ دەپارتامەنتتەگى، قۇقىق قورعاۋ قىزمەتى ورتالىعىنداعى جانە «نۇر وتان» پارتياسىنداعى ازاماتتاردى قابىلداۋ كەستەسى تۋرالى جازعان.
