رەسپۋبليكالىق وليمپيادا ق ر ءبىلىم جانە عىلىم مينيستىرلىگىنىڭ №99 بۇيرىعىنا سايكەس ۇيىمداستىرىلۋدا. جىل سايىن وتەتىن سايىستىڭ بيىلعى ەرەكشەلىگى، «Ustudy» ورتالىقتارىنىڭ بازاسىندا وتكىزىلۋى.
بۇگىنگى كۇنى، ءبىلىم سايىسىنا ەل اۋماعىندا 1582 بالا قاتىسىپ، باعىن سىناۋدا، سونىڭ ىشىندە الماتى وبلىسىنان 81 وقۋشى ۇزدىك شىعۋعا كۇرەسىپ باقپاق.
وقۋشىلار، قوعامدىق گۋمانيتارلىق جانە جاراتىلىستانۋ باعىتى بويىنشا ءبىلىم دەڭگەيلەرىن بايقاپ كورمەك. 33 بالا گۋمانيتارلىق، 48 وقۋشى جاراتىلىستانۋ باعىتىندا سىناق تاپسىرادى. ايتا كەتەيىك، وليمپياداعا 9-11 سىنىپ وقۋشىلارى قاتىسۋدا.
– جالپى ءبىلىم بەرەتىن پاندەر نەگىزىندە جاساقتالعان جارىس 4 كەزەڭنەن تۇرادى. ولار، مەكتەمىشىلىك، اۋداندىق، وبلىستىق، رەسپۋبليكالىق. بۇگىن وبلىس كولەمىندە توپ جارعان جاس دارىندار باقتارىن سىناعالى وتىر. تەستىلەۋ ەكى كۇنگە جالعاسادى. 29 ءساۋىر كۇنى بارلىق قورىتىندىلار شىعىپ، قاتىسۋشىلار ناتيجەلەرىن بىلەتىن بولادى. وليمپيادانىڭ جەڭىمپازدارى حالىقارالىق دەڭگەيدەگى جارىستارعا قاتىسۋعا مۇمكىندىك الادى، – دەيدى «جەتىسۋ دارىنى» كمم-نىڭ باسشىسى اليشەر باشاروۆ.
وليمپيادا «ءبىر قاتىسۋشى – ءبىر كومپيۋتەر – ءبىر كامەرا» قاعيداسى مەن پروكتورينگ جۇيەسىن قولدانۋ ارقىلى وتەدى.
سىناق تاپسىرمالارى «دارىن» رعپو ينتەرنەت رەسۋرسى ارقىلى ءار تۋردىڭ باسىنا ءبىر ۋاقىتتا ۇسىنىلادى جانە ءاربىر قاتىسۋشىنىڭ الدىن الا بەرىلگەن جەكە قول جەتكىزۋ كودى بولادى. تۋر اياقتالعاننان كەيىن قاتىسۋشىلاردىڭ سكانەرلەنگەن جۇمىستارى شيفرلانادى جانە قازىلار القاسىنىڭ مۇشەلەرىنە تەكسەرۋگە جىبەرىلەدى. تاپسىرمالار بويىنشا دۇرىس جاۋاپتار جانە تۋرلاردىڭ ناتيجەلەرى بار حاتتامالار دا «دارىن» رعپو سايتىندا جاريالانادى.
انار سابىروۆا، الماتى وبلىسى.
