پانفيلوۆ اۋدانىنا جاساعان ساپارىندا وبلىس باسشىسى الدىمەن ورتتە جانقيىرلىقپەن قازا تاپقان ەركىنبەك وسپانوۆتىڭ شاڭىراعىندا بولىپ، وتباسىنا كوڭىل ايتىپ، بارىنشا قولداۋ شارالارى كورسەتىلەتىنىن جەتكىزدى.
– ەركىنبەك باۋىرىمىز قىزمەتتىك مىندەتىن اتقارۋدا ەرەن ەرلىك كورسەتتى. سوندىقتان ەسىمىن ەل ءبىلسىن، كەيىنگىلەرگە ۇلگى بولسىن دەپ مەملەكەت باسشىسى «ەرلىگى ءۇشىن» مەدالىن بەرۋ تۋرالى جارلىققا قول قويدى، وسى ماراپاتتاردى تابىستاۋدى ماعان تاپسىردى. سىزدەرگە بارشا جەتىسۋ جۇرتشىلىعىنىڭ اتىنان قايعىرىپ كوڭىل ايتامىن. ارتىندا قالعان ۇرپاقتارىنا ۇزاق عۇمىر بەرسىن، – دەگەن وبلىس اكىمى ا. باتالوۆ مەدالدى مارقۇمنىڭ اكەسى ءابىلحان وسپانوۆقا ۇسىندى. ەركىنبەكتىڭ اناسى ەرالحان:
– ۇلىمىزدىڭ ەرلىگىن ەسكەرىپ، ماراپات بەرىپ جاتقاندارىڭىزعا راحمەت. اكىمدىك العاشقى قيىن ساتتەن باستاپ بارىنشا كومەك كورسەتىپ جاتىر. ەندىگى كوڭىلىمىزگە مەدەۋ بولاتىنى – سوڭىندا قالعان بالالارى. مۇنداي قايعىنى ەشكىمنىڭ باسىنا بەرمەسىن، – دەدى.
بۇدان كەيىن وبلىس باسشىسى ورتالىق اۋداندىق اۋرۋحاناعا بارىپ، ورتتەن زارداپ شەككەن عابيت ماقۇستوۆتىڭ دەنساۋلىق جاعدايىن سۇراپ ءبىلدى. تەز قاتارعا قوسىلىپ، اياعىنان تىك تۇرۋىنا تىلەكتەستىگىن ءبىلدىرىپ، وعان قاجەتتى بارلىق مەديسينالىق مۇمكىندىكتەر جاسالاتىنىن اتاپ ءوتتى.
مۇنان سوڭ اۋدان اكىمدىگىندە جيىن وتكىزىپ، ءورت ءسوندىرۋ كەزىندە ەرلىك كورسەتكەن ازاماتتاردى ماراپاتتادى.
تالدى اۋىلدىق وكرۋگىنىڭ اۋماعىنداعى ورشىگەن ءتىلسىز جاۋدى ءوشىرۋ كەزىندەگى جۇمىلدىرۋ شارالارىنا توقتالا كەلە، وبلىس اكىمى ا. باتالوۆ قىزىل جالىنمەن كۇرەستە ەرەن ەرلىك كورسەتكەن ازاماتتاردىڭ ەسىمدەرى ماڭگى ەستە قالاتىنىن اتاپ ءوتتى.
– قاتتى ىستىقتان بولعان الاپات ءورتتى توعىز كۇن دەگەندە وشىردىك. اپات ارامىزدان 3 باۋىرىمىزدى الىپ كەتتى. ءبىراز ادام زارداپ شەكتى. سول ءورت كەزىندە ەرەن ەرلىك كورسەتكەن ازاماتتاردى ەستە قالدىرۋ، ۇرپاققا ۇلگى ەتۋ – ءبىزدىڭ پارىزىمىز. قازا تاپقان ازاماتتاردىڭ وتباسىلارىنا، تۋعان-تۋىستارىنا جاقسىلىق، ەل-جۇرتقا اماندىق تىلەيمىن. ءبىز ءوز تاراپىمىزدان بارىنشا قولداۋ كورسەتەمىز، جاردەمىمىزدى ايامايمىز. وسىنداي باتىر ۇلدار تاربيەلەگەن، ەلىن، جەرىن سۇيەتىن ۇل وسىرگەن اتا-انالارىنا العىس ايتىپ، ازاماتتاردىڭ رۋحىنىڭ الدىندا باسىمىزدى يەمىز، – دەدى ا. باتالوۆ ءوز سوزىندە.
كورسەتىلەتىن كومەك تۋرالى ايتىپ وتسەك، مەرت بولعان ازاماتتار – ۇسەنبەكوۆ قاناتتىڭ وتباسىنا - سوڭىندا قالعان 5 بالاسىنا جەرۇيىق اۋىلىنان تۇرعىن ءۇي الىپ بەرىلسە، نەمەلبايەۆ ايتقازىنىڭ جانۇياسىنا باسپانا سالۋعا كومەك كورسەتىلەدى. سول سياقتى 5 بالالى وسپانوۆ ەركىنبەكتىڭ وتباسىنا دا ءۇي سالۋعا ورمان شارۋاشىلىعى مەن كاسىپكەرلەر بىرلەسىپ جاردەمدەسپەك.
وسى جيىندا ءورتتى اۋىزدىقتاۋ كەزىندە مەرت بولعان اۋىل تۇرعىندارى ايتقازى نەمەلتايەۆ پەن قانات ۇسەمبەكوۆكە مەملەكەت باسشىسىنىڭ جارلىعىمەن بەرىلگەن «ەرلىگى ءۇشىن» مەدالى مارقۇمداردىڭ جاقىندارىنا تابىستالدى. سول سياقتى اپاتپەن كۇرەسۋگە بەلسەنە قاتىسقان ازاماتتارعا ىشكى ىستەر ءمينيسترىنىڭ بۇيرىعىمەن «ورتتە كورسەتكەن قايسارلىعى ءۇشىن» مەدالى بەرىلدى. ولاردىڭ قاتارىندا جاركەنت ورمان شارۋاشىلىعى باسشىسىنىڭ ورىنباسارى باۋىرجان تۇيەبايەۆ، ورمانشىلار باقتىباي راحيمجانوۆ، عابيت ماقسۇتوۆ، باۋىرجان تورعايەۆ، ورمان شارۋاشىلىعىنىڭ جۇمىسشىلارى لەنۋرا يمانبايەۆ، رۋسلان مەيىرمانوۆ، اۋدان تۇرعىنى ساكەن قايراتوۆ بار.
وسى جيىندا ەركىنبەك وسپانوۆتىڭ اعاسى ەرلەن وسپانوۆ، پانفيلوۆ اۋدانىنىڭ قۇرمەتتى ازاماتى، ارداگەر ءشارىپحان تۇرعانوۆ جانە باسقا ازاماتتار ءسوز الىپ، ەلى مەن جەرىن، ورمان-توعايىن قورعاۋدى ازاماتتىق پارىزىم دەپ بىلگەن ەرلەردىڭ ەسىمدەرى مەن ەرلىكتەرىن ەستە ساقتايتىندىعىن ايتتى.
ەسكە سالساق، 5 تامىز كۇنى تالدى اۋىلدىق وكرۋگىندە بولعان الاپات ءورتتى ءوشىرۋ كەزىندە پانفيلوۆ اۋدانىنىڭ 3 ازاماتى مەرت بولىپ، 7 ادام زارداپ شەككەن بولاتىن. اۋرۋحاناعا جەتكىزىلگەن 7-ەۋدىڭ بەسەۋى امبۋلاتوريالىق ەم الۋ ءۇشىن ۇيلەرىنە بوساتىلعان، 1-ەۋى الماتى قالاسىندا، تاعى بىرەۋى جاركەنت قالاسىندا اۋرۋحانادا ەم قابىلداۋدا.
الماتى وبلىسى اكىمىنىڭ باسپا ءسوز قىزمەتى
