شارۋا قوجالىعىنىڭ جەتەكشىسى مانشۇك جەكسەمبەكوۆانىڭ ايتۋىنشا، شارۋاشىلىق ورمان جاڭعاعىن وسىرۋگە 2017 جىلدان باستاپ دەن قويعان. العاشىندا 2018 جىلى 10 گەكتارعا وتىرعىزىلعان قارقىندى ب ا ق كەلەسى جىلى العاشقى ءونىمىن بەرگەن. ەندى قوجالىق باقتىڭ كولەمىن ۇلعايتىپ، تاعى 20 گەكتارعا جاس كوشەت ەگۋگە نيەتتەنىپ وتىر. كوشەتتەر 2 جىل بۇرىن اكەلىنگەن، ءقازىر جىلىجايدا، بيىلعى كۇزدە وتىرعىزىلادى.
– ءبىز جۇمىس بارىسىندا زاماناۋي تەحنولوگيالاردى قولدانامىز. تامشىلاتىپ سۋارۋدىڭ تيىمدىلىگىن كورىپ وتىرمىز. ءوزىمىزدىڭ مەتەوستانسامىز بار، سونىڭ ارقاسىندا اۋا رايىنىڭ قالاي قۇبىلاتىنىن، اۋا تەمپەراتۋراسى مەن ىلعالدىعىن بىلە الامىز. 1 گەكتاردان 4 تونناداي جاڭعاق الامىز دەپ جوسپارلاپ وتىرمىز، – دەدى م. جەكسەمبەكوۆا.
الماتى وبلىستىق اۋىل شارۋاشىلىعى باسقارماسىنىڭ مالىمەتىنە سۇيەنسەك، بيىل ەسكى باقتاردى جاڭارتۋ ەسەبىنەن الماتى وبلىسىندا 520 گەكتار جەرگە كوشەت وتىرعىزۋ جوسپارلانعان، ونىڭ 20 گەكتارىنا جاڭعاق وتىرعىزىلادى، 500 گەكتارى جەمىس-جيدەك بولماق، سونىڭ 120 گەكتارى – قارقىندى ب ا ق. 157،6 مىڭ توننا جەمىس-جيدەك الۋ جوسپارلانسا، 115،2 مىڭ تونناسى الما بولماق.
ەسكە سالساق، وتكەن جىلدىڭ قورىتىندىسى بويىنشا وڭىردەگى باقتاردىڭ جالپى الاڭى 23،7 مىڭ گەكتارعا جەتتى، سونىڭ ىشىندە الما باعى – 14،2 مىڭ گا. جەمىس-جيدەك پەن ءجۇزىمنىڭ جالپى ءونىمىنىڭ كولەمى 151،1 مىڭ تونننى قۇرادى، سول قاتاردا المانىڭ كولەمى 107،8 مىڭ تونناعا جەتتى.
