رەسمي دەلەگاسيانى جىلى قابىلداعان وبلىس اكىمى ا. باتالوۆ ولاردى ءوڭىردىڭ الەۋمەتتىك-ەكونوميكالىق دامۋ جايىنان حاباردار ەتتى. اسىرەسە، وبلىستىڭ ينۆەستيسيالىق تارتىمدىلىعىنا، تۋريستىك الەۋەتتىڭ مولدىعىنا ەرەكشە ەكپىن ءتۇسىردى.
– جەتىسۋ جەرىنە قوش كەلدىڭىزدەر! الماتى وبلىسى – رەسپۋبليكانىڭ كليماتى قولايلى، تابيعاتى كوركەم، تابيعي رەسۋرستارعا باي، ينۆەستيسيالىق پوتەنسيالى جوعارى ولكەسى. وبلىس اگرارلىق سالاعا نەگىزدەلگەنىمەن، ءوندىرىستىڭ دامۋىنا، سونىڭ ىشىندە اۋىلشارۋاشىلىعى ونىمدەرىن وڭدەۋ ىسىنە دە ەرەكشە باسىمدىق بەرە باستادىق. ايماقتاعى ءىرى ءوندىرىس ورىندارىنان «فۋد ماستەر»، «دانون بەركۋت»، «كوكا كولا بوتلەرس» جانە باسقا دا الەمدىك برەند ونىمدەرى بار. وبلىسقا ينۆەستورلار تارتۋ ماقساتىندا قولايلى ينۆەستيسيالىق كليمات قالىپتاستىرۋعا، ناقتىراق ايتقاندا «قورعاس» حشىو مەن «قورعاس – شىعىس قاقپاسى» اەا بازالارىنا، سول سياقتى وبلىستاعى يندۋستريالدى ايماقتار مەن وندىرىستىك الاڭدارعا جوبالار تارتۋعا تالپىنىپ جاتىرمىز. اتاپ وتسەك، وڭىردە اسا ماڭىزدى ينۆەستيسيالىق جوبالار جۇزەگە اسىرىلا باستادى، سونىڭ 9-ى ءىرى ترانسۇلتتىق كومپانيالاردىڭ قاتىسۋىمەن اتقارىلۋدا، – دەدى ا. باتالوۆ. سونداي-اق ءوڭىر باسشىسى پولشا رەسپۋبليكاسىنىڭ ليۋبلين ۆويەۆودتىعىنىڭ دەلەگاسياسىمەن كەزدەسۋ بۇدان ءارى ەكىجاقتى ىنتىماقتاستىققا جاڭا سەرپىن بەرەتىنىنە سەنىم ءبىلدىردى. بايلانىستار بۇعان دەيىن باستالىپ، وتكەن جىلدان بەرى الماتى وبلىسىندا از قامتىلعان وتباسىنان شىققان 17 ستۋدەنت ءليۋبليننىڭ ەكونوميكا جانە يننوۆاسيا جوعارعى مەكتەبىندە تەگىن وقىپ جاتقانىن ءسوز ەتتى.
ءوز كەزەگىندە ليۋبلين ۆويەۆودتىعىنىڭ مالشالەگى ليۋبليندەگى ستۋدەنتتەردىڭ ساپالى ءبىلىم الۋلارىنا بارلىق جاعدايلار جاسالعانىن اتاپ ءوتتى.
مۇنان سوڭ سلاۆومير سوسنوۆسكي الداعى ىنتىماقتاستىق جولدارى، سونىڭ ىشىندە اۋىل شارۋاشىلىعىنداعى، ءبىلىم بەرۋ، مەديسينا، جيھاز جاساۋ سياقتى سالالاردا تاجىريبە جانە تەحنولوگيا الماسۋ تۋرالى ويىن ورتاعا سالدى.
جيىن سوڭىندا الماتى وبلىسى اكىمى مەن پولشا رەسپۋبليكاسى ليۋبلين ۆويەۆودتىعىنىڭ مارشالەگى اراسىندا ىنتىماقتاستىق تۋرالى مەموراندۋمعا قول قويىلدى. تاراپتار بۇل مەموراندۋمنىڭ ەكى ەل وڭىرلەرى اراسىنداعى تاجىريبە الماسۋدى جانداندىرىپ، كاسىپكەرلىك، مادەنيەت جانە جاستار ءىسى سالاسىندا ءساتتى جوبالاردى جۇزەگە اسىرۋعا نەگىز بولاتىنىن اتاپ ءوتتى.
كەزدەسۋدەن كەيىن رەسمي دەلەگاسيا تالدىقورعانداعى كورمە كەشەنىندە بولىپ، الماتى وبلىسى تاۋار وندىرۋشىلەرىنىڭ كورمەسىمەن تانىستى. قوناقتاردىڭ نازارىنا ەكونوميكانىڭ بارلىق سالالارىندا – قۇرىلىس، ونەركاسىپ، اۋىلشارۋاشىلىعى، فارماسيەۆتيكا، قوعامدىق تاماقتانۋ جانە باسقا دا سالالارىنداعى جەتىستىكتەر ۇسىنىلدى.
دەلەگاسيا مۇشەلەرى، اسىرەسە «قاينار اكب» زاۋىتىنىڭ ونىمدەرىنە ەرەكشە قىزىعۋشىلىق تانىتتى. پولشالىقتار ءوز ەلدەرىندە اۆتوكولىكتەرگە ارنالعان ەلەكترلى باتارەيالار ءوندىرۋدى قولعا الۋ ويلارىندا بار ەكەنىن، ەگەر وسى باعىتتا ءوندىرىس جولعا قويىلاتىن بولسا، تالدىقورعاندىقتارمەن تاجىريبە الماسۋعا نيەتتى ەكەندىكتەرىن جەتكىزدى.
وسى كۇنى پولياكتار تالدىقورعانداعى سالتانات سارايىندا وتكەن ينۆەستورلاردىڭ وڭىرلىك كەڭەسىنە قاتىستى. جيىندا قوس تاراپ تا ءوز مۇمكىندىكتەرىنە، دامۋ باعىتتارىنا كەڭىنەن توقتالدى.
وبلىستا الەۋەتتى ينۆەستورلارعا جاسالاتىن جاعدايلار تۋرالى وبلىس اكىمىنىڭ ورىنباسارى جەڭىس تۇياقوۆ ايتىپ بەردى. بيزنەس-قاۋىمداستىق وكىلدەرى دە ءسوز الىپ، ويلارىن ورتاعا سالدى. ولاردىڭ قاتارىندا «Apple word» كومپانياسىنىڭ باس ديرەكتورى ب. كۇنتايەۆ، «ابدي يبراحيم گلوبال فارم» كومپانياسىنىڭ باس ديرەكتورى ز. گاسانوۆ تا بار. «قورعاس» حشىو اۋماعىندا جۇزەگە اسىرىلىپ جاتقان جوبالار، اۋماقتى دامىتۋ جوسپارلارى تۋرالى «قورعاس» حشىو» اق پرەزيدەنتى قاھارمان جازين باياندادى.
پولشا دەلەگاسياسى اتىنان ليۋبلين ۆويەۆودتىعىنىڭ ەكونوميكا جانە حالىقارالىق ىنتىماقتاستىق دەپارتامەنتىنىڭ قىزمەتكەرى ماگدا وليفيروۆيچ سويلەپ، ءوڭىردىڭ الەۋمەتتىك-ەكونوميكالىق دامۋى تۋرالى ايتتى.
ءوزارا پىكىر الماسقان قوس تاراپ مۇنداي كەزدەسۋ جاڭا مۇمكىندىكتەرگە، جاڭا جوبالارعا، ىنتىماقتاستىقتى نىعايتۋعا جول اشاتىنىن جەتكىزدى. جيىن سوڭىندا تالدىقورعان قالاسىنداعى كوپ سالالى اۋرۋحانا مەن بيالا پودلياسكاداعى ۆويەۆودتىقتىڭ مامانداندىرىلعان اۋرۋحاناسى اراسىندا ءوزارا ىنتىماقتاستىق تۋرالى مەموراندۋمعا قول قويىلدى. كەڭەستى قورىتىندىلاعان وبلىس اكىمى ا. باتالوۆ:
– بۇگىنگى كەزدەسۋ بارىسىندا ەكى ءوڭىردىڭ اراسىندا ۇقساستىقتار وتە كوپ ەكەنىنە تاعى ءبىر رەت كوز جەتكىزدىك. ءوزارا ىنتىماقتاستىقتىڭ ناقتى باعىتتارى بەلگىلەندى. ءبىزدى اسىرەسە ۆويەۆودتىقتا وندىرىلەتىن اۋىل شارۋاشىلىعى تەحنيكالارى قىزىقتىردى. سونىمەن قاتار جەمىس-جيدەك وڭدەۋدەگى، جيھاز جاساۋداعى جاڭا تەحنولوگيالار دا نازار اۋدارۋعا تۇرارلىق. ال بىزدە «قورعاس» حشىو مەن «قورعاس – شىعىس قاقپاسى» اەا اۋماعىندا ينۆەستورلارعا قولايلى جاعدايلار جاسالعان. ماسەلەن، ليۋبلين ۆويەۆودتىعىنان ساۋدا ءۇيىن اشۋعا مۇمكىندىگىمىز بار. جالپى بۇگىنگى كەزدەسۋدە پايدالى پىكىر الماسۋ بولدى دەپ ويلايمىن، – دەدى.
