تۋرنير ادەتتەگىدەي قازاقستاننىڭ انۇرانىمەن باستالىپ، دودانى سالتاناتتى تۇردە اشىپ بەرگەن اۋدان اكىمى جامانتاي بەيسەنبايەۆ جارىسقا قاتىسۋشىلارعا اقجول تىلەدى. سونداي-اق، اۋدان باسشىسى ۇزاق جىلدار بويى دۇنيەجۇزىلىك قازاق كۇرەسى فەدەراسياسىن باسقارعان سەرىك توكەيەۆتى 60 جىلدىق مەرەي تويىنمەن قۇتتىقتاپ، ۇستىنە شاپان جاۋىپ، استىنا تۇلپار مىنگىزدى.
ءدۇبىرلى دوداعا قاتىسقان 121 سپورتشى 60، 70، 80، 90، +90 كەلى سالماقتار بويىنشا ءوز باقتارىن سىنادى. ناتيجەسىندە، 60 كەلى سالماق بويىنشا وڭتۇستىك قازاقستاندىق امانحان وسەنبايەۆ، 70 كەلى سالماق بويىنشا ماقتارالدىق داۆرون دادايەۆ، 80 كەلى جانە 90 كەلى سالماقتار بويىنشا وڭتۇستىك قازاقستاندىق بالۋاندار ەركىنبەك بولەن، ەرسۇلتان مۋزاپپاروۆتار ءبىرىنشى ورىندى الدى. سونداي-اق، +90 كەلى سالماقتى دا، تۇيە پالۋان سالماق دارەجەسىندە دە باس جۇلدەنى شىعىس قازاقستاندىق تالعات امرەنوۆ جەڭىپ الىپ، تۇيە پالۋاننىڭ باس جۇلەسىنە ارنالعان اۆتوكولىكتى قانجىعاسىنا بايلادى.
اۋدان اكىمى ءتۇرلى سالماقتار بويىنشا 1،2،3 ورىنداردى العان بالۋانداردىڭ بارلىعىن دا اقشالاي سىيلىقتارمەن ماراپاتتاپ، مويىندارىنا مەدال تاقتى. تۇيە پالۋان ت.امرەنوۆقا اۆتوكولىكتىڭ كىلتىن تابىستاپ، تەمىر تۇلپارىنا وتىرعىزدى.
ايتا كەتەيىك، ءداستۇرلى ب.جاڭبىربايەۆ اتىنداعى حالىقارالىق تۋرنير كەلەسى جىلى دا ءوز جالعاسىن تابادى.
ماقتارال اۋدانى اكىمىنىڭ باسپا ءسوز قىزمەتى
