جەتىسۋ پروكۋرورلارى مۇگەدەكتىگى بار ادامدار مەن كوپبالالى انالاردىڭ قۇقىقتارىن بۇزعان لاۋازىمدى تۇلعالاردى جاۋاپكەرشىلىككە تارتتى، دەپ حابارلايدى Dalanews.kz.
جەتىسۋ وبلىسىنىڭ اۋىلدىق وكرۋگ اكىمدەرى مەن مەكتەپ ديرەكتورلارى مۇگەدەكتىگى بار ادامداردىڭ، كوپبالالى انالاردىڭ، «التىن القا»، «كۇمىس القا»، «انا داڭقى» جانە باسقا دا ماراپاتتارعا يە بولعان انالاردىڭ جالاقىلارىنان مىندەتتى تولەم سومالارىن زاڭسىز ۇستاپ وتىرعان.
پروكۋراتۋرا "مىندەتتى الەۋمەتتىك مەديسينالىق ساقتاندىرۋ تۋرالى" زاڭنىڭ تالاپتارىنا سايكەس ازاماتتاردىڭ اتالعان ساناتى ءۇشىن مۇنداي جارنالاردى مەملەكەت تولەيتىنىن جەتكىزدى.
الايدا، سوعان قاراماستان، كەيبىر جۇمىس بەرۋشىلەر تاراپىنان قولداۋعا مۇقتاج 166 ازاماتتىڭ جالاقىسىنان 5،5 ميلليون تەڭگەدەن استام قارجى زاڭسىز ۇستالعانى بەلگىلى بولدى.
جەتىسۋ وبلىسى پروكۋراتۋراسىنىڭ قاداعالاۋ اكتىسى بويىنشا اتالعان ازاماتتاردىڭ بۇزىلعان قۇقىقتارى قالپىنا كەلتىرىلىپ، زاڭسىز ۇستالعان قارجىنى قايتارۋ ءراسىمى باستالدى.
كىنالى لاۋازىمدى تۇلعالار، ونىڭ ىشىندە ەكى اۋىلدىق وكرۋگتىڭ اكىمى مەن ءبىر مەكتەپ ديرەكتورى تارتىپتىك جاۋاپكەرشىلىككە تارتىلدى.
پروكۋراتۋرا ءاربىر ازاماتتىڭ قۇقىقتارىن ساقتاۋدىڭ ماڭىزدىلىعىن اتاپ ءوتىپ، زاڭبۇزۋشىلىقتاردىڭ كەز كەلگەن جاعدايىنا دەر كەزىندە ارەكەت ەتۋگە دايىن ەكەنىن مالىمدەدى.
