Jetisý prokýrorlary múgedektigi bar adamdar men kópbalaly analardyń quqyqtaryn buzǵan laýazymdy tulǵalardy jaýapkershilikke tartty, dep habarlaidy Dalanews.kz.
Jetisý oblysynyń aýyldyq okrýg ákimderi men mektep direktorlary múgedektigi bar adamdardyń, kópbalaly analardyń, «Altyn alqa», «Kúmis alqa», «Ana dańqy» jáne basqa da marapattarǵa ie bolǵan analardyń jalaqylarynan mindetti tólem somalaryn zańsyz ustap otyrǵan.
Prokýratýra "Mindetti áleýmettik meditsinalyq saqtandyrý týraly" Zańnyń talaptaryna sáikes azamattardyń atalǵan sanaty úshin mundai jarnalardy memleket tóleitinin jetkizdi.
Alaida, soǵan qaramastan, keibir jumys berýshiler tarapynan qoldaýǵa muqtaj 166 azamattyń jalaqysynan 5,5 million teńgeden astam qarjy zańsyz ustalǵany belgili boldy.
Jetisý oblysy prokýratýrasynyń qadaǵalaý aktisi boiynsha atalǵan azamattardyń buzylǵan quqyqtary qalpyna keltirilip, zańsyz ustalǵan qarjyny qaitarý rásimi bastaldy.
Kináli laýazymdy tulǵalar, onyń ishinde eki aýyldyq okrýgtiń ákimi men bir mektep direktory tártiptik jaýapkershilikke tartyldy.
Prokýratýra árbir azamattyń quqyqtaryn saqtaýdyń mańyzdylyǵyn atap ótip, zańbuzýshylyqtardyń kez kelgen jaǵdaiyna der kezinde áreket etýge daiyn ekenin málimdedi.
