جەتىسۋ وبلىسىنىڭ سارقان قالاسىنداعى مەكتەپتەردىڭ بىرىندە قىزمەتكەردەن اشىق تۇردەگى تۋبەركۋلەز دەرەگى تىركەلدى، دەپ حابارلايدى Dalanews.kz.
Stan.kz مالىمەتىنشە، بۇل جاعداي اتا-انالار اراسىندا ۇلكەن الاڭداۋشىلىق تۋعىزىپ وتىر.
اتا-انالاردىڭ ايتۋىنشا، ءقاۋىپتى دياگنوز راستالعانىنا قاراماستان، جەرگىلىكتى بيلىك ءتيىستى دەڭگەيدە ارەكەت ەتپەگەن. مەكتەپ عيماراتىندا تەك ءبىر مارتە سانيتارلىق وڭدەۋ جۇرگىزىلىپ، وقۋ پروسەسى ادەتتەگىدەي جالعاسۋدا. وسىعان بايلانىستى اتا-انالار بالالارىنىڭ دەنساۋلىعىنا قاتتى الاڭدايتىنىن جەتكىزدى.
جەتىسۋ وبلىستىق ءبىلىم باسقارماسىنىڭ مالىمەتىنشە، تۋبەركۋلەزبەن اۋىرعان قىزمەتكەر – مەكتەپتىڭ ەدەن جۋۋشىسى. وعان قاتىستى بارلىق قاجەتتى مەديسينالىق شارالار قولعا الىنعان.
“اقىن سارا اتىنداعى ورتا مەكتەپتە 187 وقۋشىعا مانتۋ سىناماسى جاسالىپ، 37 ادام (مۇعالىمدەر مەن تەحنيكالىق پەرسونال) تۋبەركۋلينگە رەاكسيا جانە فليۋوروگرافيالىق تەكسەرۋدەن ءوتتى. ناتيجەسىندە 50 وقۋشىدا مانتۋ سىناماسى بويىنشا بەيىمدىلىك بايقالدى. ءقازىر مەكتەپتە كۇندەلىكتى دەزينفەكسيالىق جۇمىستار جۇرگىزىلۋدە”، – دەپ مالىمدەدى ءبىلىم باسقارماسىنداعى ماماندار.
دەگەنمەن، اتا-انالار مەن قوعام بەلسەندىلەرى وقۋشىلاردىڭ قاۋىپسىزدىگىن قامتاماسىز ەتۋ ءۇشىن قوسىمشا شارالار قابىلداۋدى، سونىڭ ىشىندە ۋاقىتشا كارانتين ەنگىزۋدى تالاپ ەتۋدە.
