رەسمي دەلەگاسياعا تاتارستاننىڭ بيزنەس-قاۋىمداستىعىنىڭ وكىلدەرى، جەتىسۋ ايماقتىق كاسىپكەرلەر پالاتاسى، تاتارستان پرەزيدەنتى رۋستام ميننيحانوۆ، تاتارستان رەسپۋبليكاسى پرەمەر-مينيسترىنىڭ ورىنباسارى ۆاسيليي شايحرازييەۆ، تاتارستان يندۋستريا جانە ساۋدا ءمينيسترى البەرت كاريموۆ قاتىستى.
تاتارستاننىڭ ۆيسە-پرەمەرى ۆاسيليي شايحرازييەۆتىڭ قولداۋىنىڭ ارقاسىندا جەتىسۋدان كەلگەن دەلەگاسيا كورشى ەلدەگى الەۋمەتتىك ينۆەستيسيالىق جانە تۋريستىك سالانىڭ دامۋىنا نازار اۋدارىپ، ءبىرقاتار نىسانداردى ارالادى. ينۆەستيسيالاردى دامىتۋ اگەنتتىگىنە بارۋدان باستالعان ساپاردا تالليا مينۋللينا مەملەكەتتىڭ ينۆەستيسيالىق جانە ەكونوميكالىق الەۋەتىن كەڭىنەن تانىستىردى.
قازاقستاندىق دەلەگاسيا قازانداعى ىت-پارك جانە «يننوپوليس» ينۆەستيسيالىق دامۋ اگەنتتىگىنىڭ Smart city، «ەيدوس-روبوتوتەحنيكا» جانە «ەيدوس-مەديسينا» جوبالىق ورتالىقتارىن ارالاپ، روبوتتاندىرىلعان وندىرىستەگى روبوت-مانيپۋلياتورلاردىڭ پايدالانىلۋىن تاماشالادى.
«قازان» قالاسىنىڭ بىرەگەي نىسانىنا اينالعان اگروونەركاسىپ ساياباعىنا اگروپروماركتىڭ باس ديرەكتورى ولەگ ۆلاسوۆ نىسان الاڭىنا ەكسكۋرسيا جاساپ، پاركتىڭ جالپى اۋدانى 50 مىڭ شارشى مەتردى قۇرايتىنىن ايتىپ ءوتتى. پارك ءبىر مەرزىمدە بىرنەشە فۋنكسيانى، اتاپ ايتقاندا، قويما، وڭدەۋ، دايىن ءونىمدى ساتۋ سياقتى ىستەردى قاتار اتقاراتىنىمەن ەرەكشەلەنەدى ەكەن. بۇل رەتتە كاسىپكەرلەرگە قولايلىلىق ءۇشىن بارلىق ينفراقۇرىلىمدار جاسالعان.
وبلىس اكىمى اماندىق باتالوۆ باستاعان دەلەگاسيا پاركتىڭ وندىرىستىك جانە قاپتاۋ سەحتارىندا، جابىق بازارىندا بولىپ، تاتارستاندا وندىرىلگەن ونىمدەردىڭ كوپتەگەن تۇرلەرىمەن تانىستى.
سونىمەن قاتار وبلىس دەلەگاسياسى وندىرىستىك-ونەركاسىپتىك تيپتەگى «الابۇعا» ەرەكشە ەكونوميكالىق ايماعىندا جانە «كاماز» جاق-دا بولدى.
بۇگىندە «الابۇعا» ايماعى وندىرىستىك قالاشىققا اينالعان. مۇنداعى 4 گەكتار اۋماقتا 56 وندىرىستىك جانە لوگيستيكالىق كاسىپورىندار تىركەلگەن. ولاردىڭ 24ء-ى ءقازىردىڭ وزىندە تولىققاندى جۇمىس ىستەپ، ماڭايىنداعى ەلدى مەكەندەردەن 6 جارىم مىڭعا جۋىق ادامدى ەڭبەكپەن قامتىپ وتىر.
سالىستىرمالى تۇردە ايتقاندا، 74 مىڭ تۇرعىنى بار شاعىن ەلابۇعا ەلدى مەكەنىنە ەرەكشە ەكونوميكالىق ايماق ءوزى جۇمىس ىستەگەن 12 جىل ىشىندە 114 ملرد سوم ينۆەستيسيا تارتىپ ۇلگەرگەن.
مۇنداي قوماقتى قارجى ەلدىڭ ءال-اۋقاتىن كوتەرۋمەن قاتار، تاريحي قۇندى جادىگەرلەرىن كۇتىپ-ساقتاۋعا ۇلكەن مۇمكىندىك بەرىپ وتىر. تاريحي ەسكەرتكىشتەردىڭ قاتارىندا مارينا سۆەتايەۆانىڭ، يۆان شۋكشيننىڭ جانە باسقا دا مادەنيەت، ونەر قايراتكەرلەرىنىڭ مۋزەي-ۇيلەرى بار.
قازان كرەملى گۋبەرناتورلىق سارايىندا وتكەن تاتارستان پرەزيدەنتى رۋستام ميننيحانوۆپەن كەزدەسۋىندە وبلىس اكىمى ا.باتالوۆ:
– ءبىز، الماتى وبلىسى قازاقستانداعى ەڭ ءىرى اۋىل شارۋاشىلىعى تاۋارلارىن ءوندىرۋشىنىڭ ءبىرى رەتىندە مۇنداعى اۋىل شارۋاشىلىعى سالاسىنىڭ تىڭ جوبالارىنا قىزىعۋشىلىق تانىتىپ وتىرمىز. «قازان» اگروپاركى جۇمىسىنىڭ ءتيىمدى ۇيىمداستىرىلۋى بىزگە قاتتى ۇنادى. وندا ۇستەمە باعاسىز ءوز ونىمدەرىن تىكەلەي تۇتىنۋشىعا جەتكىزۋ مۇمكىندىكتەرى قولايلى قاراستىرىلعان ەكەن. سول سياقتى وندىرىستىك الاڭداردى دامىتۋداعى تاجىريبەلەرىڭىز دە ءبىز ءۇشىن ماڭىزدى، – دەدى.
ءوز كەزەگىندە ر.ميننيحانوۆ قازاقستان اۋماعىندا بىرنەشە ءىرى جوبالار جۇزەگە اسىپ جاتقانىن، سونىڭ ىشىندە «قورعاس – شىعىس قاقپاسى» اەا-نىڭ ماڭىزى ەرەكشە ەكەنىنە توقتالدى:
– «قورعاس» جوباسى – ۇلكەن قىزىعۋشىلىق تۋعىزاتىن جانە زور الەۋەتى بار جوبا. ونى الەمدىك دەڭگەيدەگى ءىرى كولىك-لوگيستيكالىق حاب رەتىندە كوردىك. ءبىز ءوز تاراپىمىزدان وسى باعىتتا ارىپتەستىك بايلانىس ورناتۋعا، بيزنەس-بايلانىستارىمىزدىڭ اۋقىمىن كەڭەيتۋگە دايىنبىز، – دەدى ول.
سونداي-اق قازاقستاندىق دەلەگاسيا ساپار بارىسىندا 200 جىلدان استام تاريحى بار قازان (پريۆولجەلىك) فەدەرالدى ۋنيۆەرسيتەتىنە اتباسىن تىرەدى. ۋنيۆەرسيتەت رەكتورى يلشات گافۋروۆ ءبىلىم ورداسىن ارالاتىپ، وسى شاڭىراقتان شىققان اتاقتى تۇلەكتەردى دە ماقتانىشپەن اتاپ ءوتتى. ولاردىڭ قاتارىندا الەم ادەبيەتىنىڭ كلاسسيگى، كورنەكتى ورىس جازۋشىسى ليەۆ تولستوي، تاماشا ماتەماتيك نيكولاي لوباچيەۆسكيي جانە باسقا دا تانىمال تۇلعالار بولعان. ي.گافۋروۆتىڭ ايتۋىنشا، قارا شاڭىراق ۋنيۆەرسيتەت جوعارى ءبىلىم بەرۋ داستۇرلەرىن ساقتاي وتىرىپ، كەڭ اۋقىمدى عىلىمي-زەرتتەۋ باعىتىنا ەرەكشە دەن قويعانىن العا تارتتى.
كۇننىڭ ەكىنشى جارتىسىندا دەلەگاسيا 45 379 مىڭ كورەرمەنگە لايىقتاپ جاسالىنعان «قازان ارەنا» فۋتبول ستاديونىنىڭ ينفراقۇرىلىمىمەن دە تانىستى. 2013 جىلدىڭ مامىر ايىندا پايدالانۋعا بەرىلگەن ستاديوندا بيىلعى جىلى فۋتبولدان الەم چەمپيوناتى وتكەنىن دە ايتا كەتۋ كەرەك.
سول سياقتى قازانداعى بۇكىلالەمدىك جازعى XXVII ۋنيۆەرسيادانىڭ اشىلۋى مەن جابىلۋ سالتاناتىن دا وسى ستاديوننان تاماشالاعان بولاتىن.
وسى ساپارى بارىسىندا وبلىس اكىمى اماندىق باتالوۆ تاتار باۋىرلارعا جەتىسۋدىڭ تۋريستىك الەۋەتى جايىندا كەڭىنەن بايانداپ بەردى.
وبلىس باسشىسى تاتارستان پرەزيدەنتى رۋستام ميننيحانوۆپەن رەسمي كەزدەسۋىندە جەتىسۋ جەرىندەگى سۋى شيپالى الاكول كولىنىڭ ينفراقۇرىلىمىن دامىتۋ ءىسىن مەملەكەت باسشىسى نۇرسۇلتان نازاربايەۆتىڭ ءوزى ايرىقشا باقىلاپ وتىرعانىن تىلگە تيەك ەتتى. وندا اۋەجاي ىسكە قوسىلعانىن، جاڭا تەمىرجول ۆوكزالى سالىنعانىن ايتتى.
ماسەلەن، وتكەن جىلى الاكولدە 750 مىڭ تۋريست دەمالسا، بيىلعى جىلى ولاردىڭ سانى ميلليونعا جەتەدى دەپ كۇتىلۋدە. جالپى، الدىن الا بولجامدار بويىنشا الماتى وبلىسىنا 2 ميلليوننان استام تۋريست كەلەدى دەپ جوسپارلانۋدا. ءسوزىن تاتارستانمەن ءوزارا بايلانىس تۇرعىسىندا جالعاعان وبلىس اكىمى اماندىق باتالوۆ تر پرەزيدەنتىنىڭ ءبىلىم مەن عىلىم، زەرتتەۋ ورتالىقتارى اراسىنداعى بايلانىستى نىعايتۋ تۋرالى ۇسىنىستارىنا قاتىستى ءوز ويىن ءبىلدىردى:
– تاتارستاننىڭ بالالارى الماتى وبلىسىنداعى ساۋىقتىرۋ لاگەرلەرىنە، سونىڭ ىشىندە الاكولگە كەلۋىنە بولادى. ستۋدەنتتەر الماسۋ جايلى ايتقانىڭىز دا – جاقسى ۇسىنىس. وڭىردە ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتى مەن س.دەميرەل اتىنداعى ۋنيۆەرسيتەت بار. ءبىزدى، اسىرەسە، زاماناۋي تەحنولوگيالاردى دامىتۋ سالالارىنداعى تاجىريبە الماسۋ قاتتى قىزىقتىرىپ وتىر، – دەدى ول. سول سياقتى وبلىس باسشىسى تاتاردىڭ ۇلتتىق سابان توي مەرەكەسىن الماتى وبلىسىندا وتكىزۋدى ۇسىندى.
ەستەرىڭىزگە سالا كەتەيىك، وتكەن جىلدىڭ تامىز ايىندا تاتارستان رەسپۋبليكاسىنىڭ پرەزيدەنتى رۋستام ميننيحانوۆ باستاعان دەلەگاسيا الماتى وبلىسىندا مادەني بايلانىستار، ىسكەرلىك سەرىكتەستىك جانە تاجىريبە الماسۋ ماقساتىندا بولىپ قايتقان ەدى.
بالجان قايرات قىزى، الماتى وبلىسى.
