الماتى وبلىسىندا سەيسميكالىق بەلسەندىلىكتەن زارداپ شەككەن مەكتەپتەر مەن كوللەدجدە كۇردەلى جوندەۋ جۇرگىزىلەدى،-دەپ حابارلايدى Dalanews.kz.
سەيسميكالىق بەلسەندىلىكتىڭ ناتيجەسىندە 2024 جىلدىڭ اقپانىندا وبلىستىڭ 8 مەكتەبى مەن 1 كوللەدجىندە ءارتۇرلى اۋىرلىق دارەجەسىندەگى زاقىمدانۋلار، سونىڭ ىشىندە قابىرعاداعى جارىقتار مەن ىرگەتاستىڭ ءىشىنارا بۇزىلۋى تىركەلدى.
اتاپ ايتساق، ىلە اۋدانى تۇيمەبايەۆ اۋىلىندا №20، بورالداي اۋىلىندا №40 ورتا مەكتەپتەر، ەڭبەكشىقازاق اۋدانى قايپوۆ اۋىلى قازاقستان ورتا مەكتەبى، جامبىل اۋدانى ەڭبەكشىارال ورتا مەكتەبى، قاينازار №2 ورتا مەكتەبى، ۇيعىر اۋدانى حامرايەۆ اتىنداعى، شىرىن، داردامتى ورتا مەكتەپتەرى، شونجى پوليتەحنيكالىق كوللەدجىنىڭ شەبەرحاناسى.
قازىرگى ۋاقىتتا بارلىق زارداپ شەككەن ءبىلىم بەرۋ وبەكتىلەرى ءۇشىن تەحنيكالىق قورىتىندىلار مەن جوبالاۋ-سمەتالىق قۇجاتتامالار دايىندالۋدا، ولاردىڭ نەگىزىندە كۇردەلى جوندەۋ جۇرگىزىلەتىن بولادى.
جوندەۋ جۇمىستارىن قارجىلاندىرۋ توتەنشە جاعدايلارعا ارنالعان رەزەرۆ قاراجاتى ەسەبىنەن جۇزەگە اسىرىلادى.
