3 اقپاندا سولتۇستىك قازاقستان وبلىسىنىڭ پوليسيا دەپارتامەنتىنىڭ قىزمەتكەرلەرى «تيولاين» كومپانياسىنىڭ يەلەرىنىڭ ءبىرى ۆيكتور دولگاليەۆتى جەر قويناۋىن رۇقساتسىز پايدالانعانى ءۇشىن ۇستاپ، سوت سانكسياسىمەن قاماۋعا الىندى، – دەپ حابارلايدى Dalanews.kz.

قىلمىستىق ءىس ودان ءارى تەرگەۋ ءۇشىن قما سولتۇستىك قازاقستان وبلىسى بويىنشا دەپارتامەنتىنە جىبەرىلدى. سونداي-اق، ۆ.دولگاليەۆكە قاتىستى اسا ءىرى كولەمدە كىرىس الۋ ارقىلى زاڭسىز كاسىپكەرلىكپەن اينالىسقانى ءۇشىن تەرگەۋ جۇرگىزىلۋدە.

تەرگەۋ مالىمەتتەرى بويىنشا، 2021 جىلدىڭ ناۋرىز ايىندا يندۋستريا جانە ينفراقۇرىلىمدىق دامۋ مينيسترلىگى كومپانيانىڭ 38 ملرد تەڭگەگە قارجىلىق جانە ينۆەستيسيالىق مىندەتتەمەلەرىن ورىنداماۋىنا بايلانىستى «وبۋحوۆسكوە» كەن ورنىندا جەر قويناۋىن پايدالانۋ بويىنشا كەلىسىمشارتتى مەرزىمىنەن بۇرىن توقتاتقان.

جوعارعى سوت قۇزىرەتتى ورگاننىڭ ءىس-قيمىلدارىنىڭ زاڭدىلىعىن راستادى.

سونىمەن قاتار، 2020 جىلدىڭ 1 ماۋسىمىندا سوت شەشىمىمەن ۆ.دولگاليەۆكە «تيولاين» كومپانياسىنىڭ مۇلكىن باسقارۋعا تىيىم سالىندى.

وسىعان قاراماستان، ۆ.دولگاليەۆ ءوزىنىڭ باقىلاۋىنداعى قۇرىلىمدار ارقىلى زاڭسىز تاۋ-كەن ءوندىرىسىن جالعاستىرىپ، قىتايعا جانە باسقا ەلدەرگە زاڭسىز جولدارمەن ەكسپورتتاعان. تەك ءۇش جىل ىشىندە (2021-2023 جج.) 113 مىڭ تونناعا جۋىق كەن ەكسپورتتالىپتى.

ماماننىڭ قورىتىندىسى بويىنشا قىلمىستىق تابىستىڭ جالپى سوماسى 26 ملرد تەڭگەدەن استى. بۇل قاراجاتقا ەنشىلەس تۇلعالار ارقىلى كەن ورنىنا ىرگەلەس جاتقان 7،5 مىڭعا جۋىق گەكتار اۋىل شارۋاشىلىعى ماقساتىنداعى جەرلەر ساتىپ الىنىپ، ول جەردە دە زاڭسىز كەن ءوندىرۋ جۇرگىزىلگەن. سونىمەن قاتار، 2 ملرد تەڭگەگە بيۋدجەتكە تولەنەتىن سالىقتار مەن تولەمدەردەن جالتارۋ فاكتىلەرى انىقتالدى.

قازىرگى ۋاقىتتا جاسالعان قىلمىستىڭ بارلىق ءمان-جايلارىن انىقتاۋعا باعىتتالعان تەرگەۋ ارەكەتتەرى جۇرگىزىلۋدە.

ق ر قپك-نىڭ 201-بابى تارتىبىندەگى وزگە دە اقپارات جاريا ەتۋگە جاتپايدى.