جەلبىرەي بەر، كوك تۋى قازاعىمنىڭ!

Dalanews 04 ماۋ. 2024 15:21 1596

مەملەكەت باسشىسى قاسىم-جومارت توقايەۆتىڭ باستاماسىمەن ەلىمىزدىڭ بارلىق وڭىرىندە تۋ كوتەرۋ ءراسىمى ءوتىپ كەلەدى. بۇگىن تۇركىستان قالاسىنداعى «رامىزدەر الاڭىندا» 4 ماۋسىم – ق ر مەملەكەتتىك رامىزدەر كۇنىنە ارنالعان مەملەكەتتىك تۋدى كوتەرۋ ءراسىمى ءوتتى، دەپ حابارلايدى Dalanewskz.

مەرەكەلىك شاراعا تۇركىستان وبلىسىنىڭ اكىمى دارحان ساتىبالدى، ءماسليحات دەپۋتاتتارى، ارداگەرلەر، مەملەكەتتىك ورگان باسشىلارى، زيالى قاۋىم، بەلگىلى سپورتشىلار، قوعامدىق پىكىر كوشباسشىلارى، جاستار، قالا تۇرعىندارى قاتىستى.


– 1992 جىلىتاۋەلسىز قازاق ەلىنىڭ رامىزدەرى رەسمي تۇردە بەلگىلەنىپ، 4 ماۋسىم – رامىزدەر كۇنى بولىپ بەكىتىلدى. بارشاڭىزدى وسى ايتۋلى مەرەكەمەن شىن جۇرەكتەن قۇتتىقتايمىن! مەملەكەتتىك تۋ، ءانۇران جانە ەلتاڭبا – تاۋەلسىزدىگىمىزدىڭ دالەلى. مەملەكەتىمىزدىڭ ايبارى. ۇلتىمىزدىڭ رۋحىن وياتاتىن رامىزدەرىمىزدى كۇللى الەم مويىندايدى جانە قۇرمەت كورسەتەدى. تاۋەلسىز قازاقستاننىڭ مەملەكەتتىك تۋى ەكونوميكالىق جانە دوستىق قارىم-قاتىناس ورناتقان كوپتەگەن مەملەكەتتەردە بيىكتە جەلبىرەپ تۇر. جەڭىمپاز سپورتشىلارىمىز تۋىمىزدى كوككە كوتەرىپ، ءانۇراندى اسقاقتاتۋدا. ال ەلتاڭبامىز ەلدىگىمىزدىڭ بەلگىسىندەي جارقىراپ تۇر. بۇل ءاربىرىمىز ءۇشىن زور ماقتانىش، باقىت ەكەنى داۋسىز! بۇگىنگىدەي كەرەگەمىز كەڭ، تەرەزەمىز تەڭ زاماندا كۇن كەشۋىمىز – تاۋەلسىزدىك سىيلاعان تىنىشتىق پەن تۇراقتىلىقتىڭ ارقاسى. ال تاۋەلسىزدىكتى ساقتاۋ، قادىر-قاسيەتىنە جەتۋ مەملەكەتتىك رامىزدەرىمىزگە دەگەن قۇرمەتتەن باستالاتىنى ايقىن. بۇل رەتتە تۇركىستان وڭىرىندە وتانشىل، نامىستى ازاماتتار، جالىندى جاستار ءوسىپ وتە كوپ ەكەنىن اتاپ وتكىم كەلەدى. ولار رامىزدەردى قۇرمەتتەيدى جانە قادىرلەيدى. ەلىمىز ءۇشىن كوك بايراعىمىزدىڭ، ەلتاڭبامىز بەن ءانۇرانىمىزدىڭ ءمان-ماڭىزى ايرىقشا. بۇل قۇندىلىقتار بويىمىزعا زور ماقتانىش جانە جاۋاپكەرشىلىك سەزىمىن ۇيالاتادى. مەملەكەتتىك رامىزدەردى قادىرلەۋ – ءار ازاماتتىڭ قاستەرلى پارىزى! سوندىقتان ءبىز جاس ۇرپاققا مەملەكەتتىك رامىزدەردىڭ ءمانىن ۇقتىرىپ، ماڭىزىن تۇسىندىرە ءبىلۋىمىز كەرەك. ءار قازاق ءانۇرانىن شىرقاپ، كوك تۋىن قادىرلەسە، ەلىمىزدىڭ ەڭسەسى بيىك بولاتىنى انىق. اسپان ءتۇستى تۋى، اسقاق ءانۇرانى، ايبىندى ەلتاڭباسى بار قازاق ەلى جاساي بەرسىن! – دەدى دارحان ساتىبالدى.


وسى كۇنى «كەرۋەن ساراي» كەشەنىنەن «رامىزدەر الاڭىنا» دەيىن ق ر مەملەكەتتىك رامىزدەر كۇنىنە ارنالعان اۆتوشەرۋ وتكىزىلدى.
تۋ كوتەرۋ ءراسىمى مەرەكەلىك باعدارلاماعا جالعاستى. مەرەكەدە تۇركىستان جۇرتشىلىعى، «Jana Lep» شىعارماشىلىق ۇجىمى مەن تالانتتى جاسوسپىرىمدەر مەملەكەتتىك ءانۇراندى ءبىر مەزگىلدە ورىندادى.

بۇدان بولەك پاتريوتتىق اندەر شىرقالىپ، كوپشىلىككە جىگەر سىيلادى. تۇركىستاندىقتار ماڭىزدى مەرەكەنى جوعارى دەڭگەيدە اتاپ ءوتىپ، مەملەكەتتىك رامىزدەر دارىپتەلدى.
ايتا كەتەيىك، تۋ تۇعىردىڭ بيىكتىگى 62،5 مەتردى قۇرايدى. بايراقتىڭ ەنى 12 مەتر بولسا، ۇزىندىعى – 24 مەتر. جالپى 1992 جىلدىڭ قاڭتارىندا مەملەكەتتىك تۋ، ەلتاڭبا جانە گيمننىڭ جوباسىن دايىنداۋ تۋرالى بايقاۋ جاريالاندى. تاۋەلسىز قازاقستاننىڭ ءانۇرانى سول جىلى بەكىتىلدى. ال 2006 جىلى جاڭا ءانۇران قابىلدانعان بولاتىن.




ۇسىنىلعان
سوڭعى جاڭالىقتار