Memleket basshysy Qasym-Jomart Toqaevtyń bastamasymen elimizdiń barlyq óńirinde tý kóterý rásimi ótip keledi. Búgin Túrkistan qalasyndaǵy «Rámizder alańynda» 4 maýsym – QR Memlekettik rámizder kúnine arnalǵan Memlekettik týdy kóterý rásimi ótti, dep habarlaidy Dalanewskz.
Merekelik sharaǵa Túrkistan oblysynyń ákimi Darhan Satybaldy, máslihat depýtattary, ardagerler, memlekettik organ basshylary, ziialy qaýym, belgili sportshylar, qoǵamdyq pikir kóshbasshylary, jastar, qala turǵyndary qatysty.
– 1992 jylyTáýelsiz Qazaq eliniń rámizderi resmi túrde belgilenip, 4 maýsym – Rámizder kúni bolyp bekitildi. Barshańyzdy osy aitýly merekemen shyn júrekten quttyqtaimyn! Memlekettik Tý, Ánuran jáne Eltańba – táýelsizdigimizdiń dáleli. Memleketimizdiń aibary. Ultymyzdyń rýhyn oiatatyn rámizderimizdi kúlli álem moiyndaidy jáne qurmet kórsetedi. Táýelsiz Qazaqstannyń memlekettik Týy ekonomikalyq jáne dostyq qarym-qatynas ornatqan kóptegen memleketterde biikte jelbirep tur. Jeńimpaz sportshylarymyz Týymyzdy kókke kóterip, Ánurandy asqaqtatýda. Al Eltańbamyz eldigimizdiń belgisindei jarqyrap tur. Bul árbirimiz úshin zor maqtanysh, baqyt ekeni daýsyz! Búgingidei keregemiz keń, terezemiz teń zamanda kún keshýimiz – Táýelsizdik syilaǵan tynyshtyq pen turaqtylyqtyń arqasy. Al Táýelsizdikti saqtaý, qadir-qasietine jetý Memlekettik rámizderimizge degen qurmetten bastalatyny aiqyn. Bul rette Túrkistan óńirinde otanshyl, namysty azamattar, jalyndy jastar ósip óte kóp ekenin atap ótkim keledi. Olar rámizderdi qurmetteidi jáne qadirleidi. Elimiz úshin Kók bairaǵymyzdyń, Eltańbamyz ben Ánuranymyzdyń mán-mańyzy airyqsha. Bul qundylyqtar boiymyzǵa zor maqtanysh jáne jaýapkershilik sezimin uialatady. Memlekettik rámizderdi qadirleý – ár azamattyń qasterli paryzy! Sondyqtan biz jas urpaqqa Memlekettik rámizderdiń mánin uqtyryp, mańyzyn túsindire bilýimiz kerek. Ár qazaq Ánuranyn shyrqap, kók Týyn qadirlese, elimizdiń eńsesi biik bolatyny anyq. Aspan tústi Týy, asqaq Ánurany, aibyndy Eltańbasy bar Qazaq eli jasai bersin! – dedi Darhan Satybaldy.
Osy kúni «Kerýen sarai» kesheninen «Rámizder alańyna» deiin QR Memlekettik rámizder kúnine arnalǵan avtosherý ótkizildi.
Tý kóterý rásimi merekelik baǵdarlamaǵa jalǵasty. Merekede Túrkistan jurtshylyǵy, «Jana Lep» shyǵarmashylyq ujymy men talantty jasóspirimder Memlekettik Ánurandy bir mezgilde oryndady.
Aita keteiik, tý tuǵyrdyń biiktigi 62,5 metrdi quraidy. Bairaqtyń eni 12 metr bolsa, uzyndyǵy – 24 metr. Jalpy 1992 jyldyń qańtarynda Memlekettik tý, Eltańba jáne Gimnniń jobasyn daiyndaý týraly baiqaý jariialandy. Táýelsiz Qazaqstannyń Ánurany sol jyly bekitildi. Al 2006 jyly jańa Ánuran qabyldanǵan bolatyn.
