الماتى وبلىسى تالعار قالاسىندا ءبىر توپ ازاماتتىڭ قولىنان اجال قۇشقان 16 جاستاعى شەرزاتتىڭ وقيعاسى كوپشىلىكتىڭ نازارىن اۋداردى. قازىرگى تاڭدا مارقۇمنىڭ تۋىستارى بيلىكتەن ادىلدىك سۇراپ، قىلمىسكەرلەرگە اۋىر جازا بەرىلۋىن تالاپ ەتىپ وتىر، دەپ حابارلايدى Dalanews.kz.
مارقۇمنىڭ اناسى گۇلبارا بيشمبييەۆا قايعىلى وقيعانى ەسكە الىپ، جاعدايعا بايلانىستى پىكىر ءبىلدىردى.
“مەنى جۇلقىپ لاقتىرىپ جىبەردى. ەكەۋى قولىمنان ۇستاپ وتىردى. ءتىپتى كوگەرگەن جەرلەرى دە بار. ارى قاراي ۇلىمدى قورعاۋعا ۇمتىلعان قايىن ىنىمە دە پىشاق سۇقتى. بالامدى ارتىنان كەپ پىشاقتاعان ەدى. ونى قۇلاپ جاتقان جەرىنەن تاعى تەپكىلەپ ۇردى. بۇل ءساتتى ۆيدەودان كورگەن شىعارسىزدار. وسى ىسكە بايلانىستى ادىلدىك سۇرايمىن. 13 ادامنىڭ ءبارى ۇستالىپ، ءارقايسى ءوز جازاسىن السا دەيمىن. بالامدى ولتىرگەن ادامدى 20-25 جىل باس بوستاندىعىنان ايىرۋدى تالاپ ەتەمىن”، - دەيدى مارقۇمنىڭ اناسى.
كۇدىكتىلەردى كورۋ ءۇشىن مارقۇمنىڭ جاقىندارى يزولياتوردىڭ ىشىنە كىرگەن.
شەرزاتتىڭ اپكەسىنىڭ ايتۋىنشا، قاماۋدا وتىرعانداردىڭ جاعدايى جاقسى، قارىندارى توق.
“قىلمىسكەرلەردىڭ ناقتى ۇستالعان-ۇستالماعانىن كورۋ ءۇشىن ىشكە كىردىك. بۇل ءبىزدىڭ تالاپ-ارىزىمىز بولدى. جەتەۋىن جەتى كامەراعا وتىرعىزعان. ءبىراق ولاردان 16 جاستاعى بالانى ولتىردىك-اۋ دەگەن وكىنىش سەزىمىن بايقامادىم. جەپ وتىرعاندارى قازى، استىلارىنداعى توسەك ورىندارى دا جايلى. ءبارى ءماز بوپ وتىر. ۇزاق قاراي المادىم. بۇل ءالى تۇرمە ەمەس. جاي عانا يزولياتوردىڭ وزىندە ولار كەرەمەت جاعدايدا ءومىر ءسۇرىپ جاتىر.
نەگە جەتى ادامدى عانا ۇستاپ وتىر؟! مەن بۇلاردى بۇل جاقتا دا تىنىش قويمايمىن. كەرەك دەسەڭىزدەر جوعارى جاققا بارامىن. بۇلاردىڭ قازى تۇرماق تۇگىلى ءبىر ۇرتىم سۋ ىشۋگە ەش قۇقىعى جوق”، - دەيدى مارقۇمنىڭ اپكەسى باقىت رەيموۆا.
ەسكە سالايىق، بۇعان دەيىن تالعاردا جاپپاي توبەلەس بولىپ، سالدارىنان 16 جاستاعى ءجاسوسپىرىم كوز جۇمدى. جانجال جىگىتتىڭ وتباسى جالعا الاتىن دۇكەننەن باستالعان. تۋىستارىنىڭ ايتۋىنشا، ساۋدا نۇكتەسىنە كەلگەن ساتىپ الۋشى سىرا الىپ، اقشاسىن تولەۋدەن باس تارتقان. وسى جاعدايدان كەيىن توبەلەس باستالعان.
كامەلەتكە تولماعان بالانى ءولتىرۋ فاكتىسى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى.
رەسمي اقپاراتقا سۇيەنسەك، بارلىق كىنالى ادام ۇستالىپ، ۋاقىتشا ۇستاۋ يزولياتورىنا قاماۋعا الىنعان.
“قىلمىستىق ءىستى تەرگەۋ ىشكى ىستەر مينيسترلىگىنىڭ ەرەكشە باقىلاۋىنا الىنىپ، ونىڭ نۇسقاۋى بويىنشا ارنايى جەدەل-تەرگەۋ توپ جۇمىس اتقارۋدا. بارلىق جينالعان دالەلدەر، سونىڭ ىشىندە بەينەباقىلاۋ كامەرالارىنان الىنعان جازبالار زەرتتەلۋدە. قازىرگى ۋاقىتتا جەتى ادامنىڭ قىلمىس جاساۋعا قاتىسى بار ەكەنى انىقتالدى”، - دەيدى الماتى وبلىسىنىڭ پوليسيا دەپارتامەنتى.
مالىمەتكە سايكەس، جابىرلەنۋشى تاراپتىڭ دالەلدەرى بويىنشا باسقا تۇلعالاردىڭ قاتىسىن انىقتاۋ ءۇشىن تەرگەۋ شەڭبەرىندە تەكسەرۋ جۇرگىزىلۋدە.
“ءارقايسىنا جەكە قۇقىقتىق باعا بەرىلەتىن بولادى. قايتىس بولعان ءجاسوسپىرىمنىڭ زاڭدى وكىلدەرى تەرگەۋ بارىسى تۋرالى حابارلانىپ جاتىر. تەرگەۋ مۇددەسى ءۇشىن وزگە دە اقپارات جاريا ەتۋگە جاتپايدى”، - دەپ مالىمدەدى پوليسيا وكىلدەرى.
