Almaty oblysy Talǵar qalasynda bir top azamattyń qolynan ajal qushqan 16 jastaǵy Sherzattyń oqiǵasy kópshiliktiń nazaryn aýdardy. Qazirgi tańda marqumnyń týystary bilikten ádildik surap, qylmyskerlerge aýyr jaza berilýin talap etip otyr, dep habarlaidy Dalanews.kz.
Marqumnyń anasy Gúlbara Bishmbieva qaiǵyly oqiǵany eske alyp, jaǵdaiǵa bailanysty pikir bildirdi.
“Meni julqyp laqtyryp jiberdi. Ekeýi qolymnan ustap otyrdy. Tipti kógergen jerleri de bar. Ary qarai ulymdy qorǵaýǵa umtylǵan qaiyn inime de pyshaq suqty. Balamdy artynan kep pyshaqtaǵan edi. Ony qulap jatqan jerinen taǵy tepkilep urdy. Bul sátti videodan kórgen shyǵarsyzdar. Osy iske bailanysty ádildik suraimyn. 13 adamnyń bári ustalyp, árqaisy óz jazasyn alsa deimin. Balamdy óltirgen adamdy 20-25 jyl bas bostandyǵynan aiyrýdy talap etemin”, - deidi marqumnyń anasy.
Kúdiktilerdi kórý úshin marqumnyń jaqyndary izoliatordyń ishine kirgen.
Sherzattyń ápkesiniń aitýynsha, qamaýda otyrǵandardyń jaǵdaiy jaqsy, qaryndary toq.
“Qylmyskerlerdiń naqty ustalǵan-ustalmaǵanyn kórý úshin ishke kirdik. Bul bizdiń talap-aryzymyz boldy. Jeteýin jeti kameraǵa otyrǵyzǵan. Biraq olardan 16 jastaǵy balany óltirdik-aý degen ókinish sezimin baiqamadym. Jep otyrǵandary qazy, astylaryndaǵy tósek oryndary da jaily. Bári máz bop otyr. Uzaq qarai almadym. Bul áli túrme emes. Jai ǵana izoliatordyń ózinde olar keremet jaǵdaida ómir súrip jatyr.
Nege jeti adamdy ǵana ustap otyr?! Men bulardy bul jaqta da tynysh qoimaimyn. Kerek deseńizder joǵary jaqqa baramyn. Bulardyń qazy turmaq túgili bir urtym sý ishýge esh quqyǵy joq”, - deidi marqumnyń ápkesi Baqyt Reimova.
Eske salaiyq, buǵan deiin Talǵarda jappai tóbeles bolyp, saldarynan 16 jastaǵy jasóspirim kóz jumdy. Janjal jigittiń otbasy jalǵa alatyn dúkennen bastalǵan. Týystarynyń aitýynsha, saýda núktesine kelgen satyp alýshy syra alyp, aqshasyn tóleýden bas tartqan. Osy jaǵdaidan keiin tóbeles bastalǵan.
Kámeletke tolmaǵan balany óltirý faktisi boiynsha Almaty oblysynyń politsiia departamenti qylmystyq is qozǵady.
Resmi aqparatqa súiensek, barlyq kináli adam ustalyp, ýaqytsha ustaý izoliatoryna qamaýǵa alynǵan.
“Qylmystyq isti tergeý Ishki ister ministrliginiń erekshe baqylaýyna alynyp, onyń nusqaýy boiynsha arnaiy jedel-tergeý top jumys atqarýda. Barlyq jinalǵan dálelder, sonyń ishinde beinebaqylaý kameralarynan alynǵan jazbalar zerttelýde. Qazirgi ýaqytta jeti adamnyń qylmys jasaýǵa qatysy bar ekeni anyqtaldy”, - deidi Almaty oblysynyń politsiia departamenti.
Málimetke sáikes, jábirlenýshi taraptyń dálelderi boiynsha basqa tulǵalardyń qatysyn anyqtaý úshin tergeý sheńberinde tekserý júrgizilýde.
“Árqaisyna jeke quqyqtyq baǵa beriletin bolady. Qaitys bolǵan jasóspirimniń zańdy ókilderi tergeý barysy týraly habarlanyp jatyr. Tergeý múddesi úshin ózge de aqparat jariia etýge jatpaidy”, - dep málimdedi politsiia ókilderi.
