جاستار مەن كولىك جۇرگىزۋشىلەردىڭ سۇيىكتى سۋسىنى Gorilla قازاقستاندا ءوندىرىستى توقتاتۋى مۇمكىن، دەپ حابارلايدى Dalanews.kz.

Gorilla - تمد كەڭىستىگىندەگى ءىرى سۋسىن وندىرۋشىلەردىڭ ءبىرى. كومپانيا جىلىنا 60 ميلليون ليتردەن اسا ءونىمدى شەتەلگە شىعارادى جانە جۋىردا "جىلدىڭ ۇزدىك ەكسپورتتاۋشىسى" اتانعان. الايدا جاڭا سالىق تالاپتارىنا بايلانىستى ءوندىرىستى وزبەكستانعا كوشىرۋى مۇمكىن دەگەن اقپارات تارادى.

مالىمەتكە سۇيەنسەك، بۇعان 2026 جىلدان باستاپ كۇشىنە ەنەتىن سالىق كودەكسى سەبەپ بولىپ وتىر. قۇجاتقا سايكەس ەنەرگەتيكالىق سۋسىندار اكسيزدەلەتىن ءونىم قاتارىنا قوسىلادى. ءبىراق ەكسپورت كەزىندە بۇل الىمنان بوساتۋ ءتارتىبى قاراستىرىلماعان. اسىرەسە، تاپسىرىس بەرۋشىنىڭ شيكىزاتىنان وندىرىلگەن ونىمدەرگە جەڭىلدىك جوق. ماماندار مۇنى ەلەۋلى سالدارى بار تەحنيكالىق ولقىلىق دەپ باعالاپ وتىر.

ەل ەكونوميكاسىنا اسەرى

ەگەر كومپانيا كەتسە:

• جىلىنا 60 ملن ليتر ەكسپورت كولەمى قىسقارادى؛

• 100 ملن دوللار كولەمىندەگى شەتەل ۆاليۋتاسىنىڭ ءتۇسىمى ازايادى؛

• سالاداعى 4 مىڭعا جۋىق ادام جۇمىسسىز قالۋى مۇمكىن؛

• بيۋدجەتكە تۇسەتىن سالىق 5-6 ملرد تەڭگەگە كەميدى.

جالپى احۋال

كەيبىر دەرەكتەر بويىنشا ءبىرقاتار ءىرى ءوندىرۋشى دە ەلدەن كەتۋ ماسەلەسىن قاراستىرىپ جاتىر. بۇل ءبىر جاعىنان وزبەكستان ورتالىق ازيادا كاسىپكەرلىككە قولايلى ەلگە اينالعانىن كورسەتەدى.

ساراپشىلاردىڭ پىكىرىنشە، ماسەلە شەشىلمەسە، قازاقستان ينۆەستيسيادان، جۇمىس ورىندارىنان جانە سالىق تۇسىمدەرىنەن ايىرىلىپ، ايماقتاعى ەكونوميكالىق باسىمدىق پوزيسياسىن السىرەتۋى مۇمكىن.