شارۋا قوجالىعى ەكى جىلدىڭ ىشىندە 156 گەكتار جەرگە ىلعال ساقتاۋ تەحنولوگياسىن ەنگىزىپ، وعان جالپى سوماسى 270 ملن تەڭگە ينۆەستيسيا قۇيعان. بۇعان دەيىن جۇگەرىنىڭ ءار گەكتارىنان 70 سەنتنەردەن ءونىم السا، تامشىلاتىپ سۋارۋدى قولدانۋدىڭ ناتيجەسىندە ءار گەكتارىنا 150 سەنتنەرگە دەيىن ءونىم الىپ وتىر.
«ايگەرىم» شارۋا قوجالىعىنىڭ باسشىسى ۇلان سارپەكوۆتىڭ ايتۋىنشا، ول جۇگەرى وسىرۋمەن 11 جىلدان بەرى اينالىسىپ كەلەدى.
– شارۋاشىلىقتا مال ازىعىنا جانە تۇقىمعا ارنالعان جۇگەرى تۇرلەرى، سول سياقتى پوپكورن جۇگەرىسىن وسىرەمىز. جۇگەرى وسىرۋدە ىلعال ساقتاۋ تەحنولوگياسىن ەنگىزۋدىڭ ماڭىزى زور.
وسى رەتتە 2022 جىلى الدىمەن 55 گەكتارعا تامشىلاتىپ سۋارۋ جۇيەسىن ەنگىزىپ، ءار گەكتارىنان 150 سەنتنەرگە دەيىن ءونىم جينادىق. بيىل تاعى 101 گەكتارعا وسىنداي قۇرىلعىلار قويدىق.
بۇل رەتتە سۋ ۇنەمدەۋ تەحنولوگياسىن ورناتۋعا جۇمسالعان شىعىننىڭ ءبىر بولىگى مەملەكەتتەن سۋبسيديالاناتىنى ەداۋىر كومەك. ءقازىر كۇزگى جيىن-تەرىن ناۋقانى قىزۋ ءجۇرىپ جاتىر. ونىمدىلىك بىلتىرعى شامادا بولادى دەپ جوسپارلاپ وتىرمىز، – دەيدى ۇلان سارپەكوۆ.
تامشىلاتىپ سۋارۋدىڭ يزرايلدىك تەحنولوگياسىن الماتىلىق «يرريگاتور كازاحستان» ج ش س ورناتقان جانە وسى كومپانيا جۇيەنىڭ دۇرىس جۇمىس ىستەۋىنە ءتيتىستى سۇيەمەلدەۋ جاساپ كەلەدى. سونىمەن قاتار كومپانيا ماماندارى سۋ سورعى ستانسىسىندا قالاي جۇمىس ىستەۋ كەرەكتىگىن شارۋاشىلىقتاعى ەكى جۇمىسشىعا ارنايى ۇيرەتتى.
قوجالىقتا جۇگەرى شارۋاشىلىعىمەن قاتار، قازاقتىڭ بيازى ءجۇندى قويىن ءوسىرۋ جولعا قويىلعان. بۇگىندە شارۋاشىلىقتا 15 ادام تۇراقتى جۇمىس ىستەيدى. ماۋسىمدىق كەزەڭدە جۇمىسشىلار سانى 40-قا جۋىقتايدى.
جالپى جاركەنت وڭىرىندە جۇگەرىنى كەپتىرۋ، ساقتاۋ جانە وتكىزۋ ماسەلەسى دە وزەكتى. بۇدان بىرنەشە جىل بۇرىن شارۋالاردىڭ وتىنىشىنە وراي پەنجىم اۋىلىندا وبلىس اكىمدىگىنىڭ قولداۋىمەن جۇگەرىگە ارنالعان 2 قىرمان سالىنعان بولاتىن. ەكى قىرمان دا بۇگىنگى كۇنى حالىقتىڭ يگىلىگىنە جۇمىس ىستەپ تۇر.
جالپى ءبىرىنشى قىرماندا ءبىر اۋىسىمدا 1200 توننا، ال ەكىنشى قىرماندا ءبىر اۋسىمدا 1500 توننا كەپتىرىلەدى. سول سياقتى «ورازبايەۆ ب.ز.» شارۋا قوجالىعى وتكەن جىلى تاۋلىگىنە 800 توننا ءدان كەپتىرەتىن سىيىمدىلىعى 10 مىڭ توننالىق جۇگەرى كەپتىرۋ جانە ساقتاۋ زاۋىتىن سالعان بولاتىن. بۇل نىساننىڭ ءوڭىر شارۋاشىلىقتارى ءۇشىن دە تيىمدىلىگى مول بولدى. شارۋاشىلىق باسشىسى بەرىك ورازبايەۆتىڭ ايتۋىنشا، قويمادا 2022 جىلى 5 مىڭ تونناعا جۋىق جۇگەرى ءدانى ساقتالعان. بيىل دا جۇمىس قارقىنى ودان كەم بولمايدى دەيدى ول. زاۋىتتا 25 ادام جۇمىس ىستەيدى.
اۋدان اكىمى مارات ساعىنبەكتىڭ سوزىنە قاراعاندا، بۇگىنگى كۇندە اۋداندا 30 مىڭداي ءونىم جۇگەرى وڭدەۋ كاسىپورنىنا وتكىزىلگەن. شارۋالار ونىمدەرىن نەگىزىنەن جاركەنت كراحمال-سىرنە زاۋىتىنا تاپسىرادى. ال جالپى اۋداندا 4 مىڭعا جۋىق شارۋاشىلىق جۇگەرى وسىرۋمەن اينالىسىپ وتىر.
– الەمدىك نارىقتاعى باعالارعا سايكەس بۇگىنگى كۇنى جۇگەرى ىلعالدىق دەڭگەيىنە قاراي 70-80 تەڭگەنىڭ اراسىندا باعالانۋدا. بۇل وتكەن جىلعى قۇنىنان ەدىاۋىر تومەن. سوندىقتان ءبىز ءقازىر جۇگەرىنى بەلگىلى ءبىر كولەمدە جۇڭگو نارىعىنا دا لايىقتى باعادا وتكىزۋ تۋرالى كەلىسىمدەر جاساۋدى جوسپارلاپ وتىرمىز، – دەدى اۋدان اكىمى مارات ساعىمبەك. بۇل رەتتە ول جۇگەرى وسىرۋشىلەرگە زاۋىتقا وتكىزگەن ءونىمىنىڭ ءار تونناسىنا 6 مىڭ تەڭگەدەن سۋبسيديا بەرىلىپ وتىرعانىن دا اتاپ ءوتتى.
جالپى بيىل جەتىسۋ وبلىسى كولەمىندە 57 مىڭ گەكتارعا جۇگەرى سەبىلسە، سونىڭ 47% پانفيلوۆ اۋدانىنىڭ ۇلەسىندە. بۇگىنگى كۇنگە جەتىسۋلىق شارۋالار 32،3 مىڭ گەكتاردى جيناپ الدى. وبلىس كولەمىندە جۇگەرىنىڭ ورتاشا شىعىمى 63،3 سەنتنەردەن اينالسا، بۇل كورسەتكىش پانفيلوۆ اۋدانىندا 66،1 سەنتنەردەن كەلىپ وتىر. پانفيلوۆ اۋداندىق اكىمدىگىنىڭ مالىمەتىنشە، اۋدان بيىل 180 مىڭ توننا جۇگەرى جيناۋدى جوسپارلانىپ وتىر. مۇندا ازىرگە جۇگەرى القابىنىڭ 13،2 مىڭ گەكتارى جينالعان.
