ءورىستىلدى قاۋىمنىڭ ار-نامىسىن اياققا تاپتاعان شەتەل ازاماتتارىن رەسەيگە كىرگىزبەۋ كەرەك.

وسىنداي ۇسىنىستى ورتاعا سالعان مەملەكەتتىك دۋما سپيكەرى ۆيچيسلاۆ ۆولودين، بۇل يدەيانى زاڭ جۇزىندە بەكىتۋگە اسىعىپ وتىر دەپ حابارلايدى Dalanews.kz.   

ءۆولوديننىڭ ءبۇي دەۋىنە قىرعىزستانداعى ءبىرقاتار وقيعالار سەبەپ بولعان. وسىنىڭ الدىندا الەمجەلىدە  كليەنتتىڭ كاسساداعى قىزمەتكەردى ۇرعان ۆيدەوسى تاراعان.

وقيعا 2 تامىزدا بىشكەكتەگى ساۋدا جانە ويىن-ساۋىق ورتالىقتارىنىڭ بىرىندە بولعان. بەلگىلى بولعانداي، كليەنت ويىنحانا قىزمەتكەرلەرىنىڭ بىرىنە تيىسكەن.

"ول سورەگە جاقىنداپ، كاسسير قىزعا جۇگىنگەن كەزدە، ول وعان ورىس تىلىندە قىزمەت كورسەتكەن. ول ونىمەن تەك قىرعىز تىلىندە سويلەسۋدى اگرەسسيۆتى تۇردە تالاپ ەتتى"، – دەگەن بولاتىن ويىنحانا باسشىلىعى.

بۇعان رەسەيدىڭ قىرعىزستانداعى ديپوكىلدىگى بىردەن ءۇن قاتىپ، قىزعا قول جۇمساعان ازاماتتىڭ ارەكەتىن ايىپتاعان.



كرەملدىڭ پروپاگاندا قۇرالدارى قىرعىزستانداعى ورىس ءتىلىنىڭ رەسمي مارتەبەگە يە ەكەنىن ەسكە سالىپ، ورتا ازيا ەلدەرىندە ورىس تىلىمەن بايلانىستى كونفليكتىلەردىڭ تىم-تىم جيىلەپ كەتكەنىن جارىسا جازعان.

بىشكەكتەگى رەسەي ەلشىلىگى كليەنتپەن ورىسشا سويلەگەن قىزعا اراشا ءتۇسىپ، وسىناۋ وقيعاعا قاتىستى دەربەس تەرگەۋ جۇرگىزبەك.

"ءبىز بۇزاقىنىڭ سازايىن بەرەمىز. قىرعىزستانداعى ۇلتشىلدىق پەن ءورىستىلدى اۋديتورياعا باعىتتالعان اگرەسسيا ەلدەگى تۇراقتىلىق پەن تاتۋلىققا سىنا قاعادى. ءبىز قىرعىز بيلىگىنىڭ جاعدايدى ءادىل باعالارىنا سەنىمدىمىز"، – دەيدى ەلشىلىك وكىلدەرى.

ال ۆيچيسلاۆ ۆولودين بۇل وقيعا ءورىستىلدى اۋديتورياعا قوقان-لوقى كورسەتكەن العاشقى جاعداي ەمەسىن ەسكە سالۋدا.

"جازدىڭ ورتاسىندا ىستىقكولگە شومىلۋعا بارعان دزيۋدوشى بالالاردىڭ اراسىندا 9 جاسار ۆانيا دا بولدى. ول وسى توپتاعى جالعىز ورىس ەدى. ۇيىنە ورالعاندا اتا-اناسى ونىڭ دەنەسىنەن سوققىنىڭ، تەپكىنىڭ ىزدەرىن كوردى. لاگەردەگى بالالار ارالارىنداعى جالعىز تال ورىسقا تيىسكەن، ورتادان وقشاۋلاعان..."، – دەيدى ول.

ونىڭ پايىمداۋىنشا ۇرىپ-سوعۋ مەن مازاق ەتۋدىڭ نەگىزگى سەبەبى – ەكەۋىنىڭ دە ورىس تىلىندە سويلەۋى بولعان.

"ءبىز بۇعان كوز جۇما قاراساق، ەرتەڭ بۇدان دا سوراقى جاعدايعا كۋا بولامىز. دەپۋتاتتار دەرەۋ شارا قولدانۋى كەرەك. ءورىستىلدى اۋديتورياعا قارسى وسىنداي وسپادار ارەكەتكە بارعانداردى رەسەيگە كىرۋىنە تىيىم سالۋ قاجەت"، – دەدى ۆولودين ءوزىنىڭ Telegram كانالىندا.

بۇعان دەيىن رف پرەزيدەنتى جانىنداعى ادام قۇقىقتارى جونىندەگى كەڭەستىڭ (اقك) حالىقارالىق ىنتىماقتاستىق جونىندەگى كوميسسياسى قىرعىزستانداعى ورىستاردى قورعاۋ جونىندەگى شارالاردى كۇشەيتۋگە شاقىرعان.

تمد ەلدەرىمەن ارىپتەستىك جونىندەگى اگەنتتىك ءتوراعاسى ەۆگەنيي پريماكوۆ پوليسەيلەردىڭ كاسسير قىزدىڭ قىرعىزشا سويلەۋىن تالاپ ەتكەن ازاماتتى بوساتا سالعانىنا اڭ-تاڭ.

"مۇندايلار وڭباعانداردى ورنىنا قويۋعا مىندەتتەمىز. بۇزاقىنى بوساتا سالعان پوليسەيلەردىڭ ارەكەتىنە قايرانمىن. سوندا ورىسشا سويلەگەن قىزدى ۇرىپ-سوعۋ قىرعىز قوعامى ءۇشىن قالىپتى دۇنيە مە؟"، – دەيدى پريماكوۆ.

https://www.youtube.com/watch؟v=ZyzRAkDe2tQ