ورتالىقتىڭ جۇمىسى ءبىر تەرەزە قاعيداتى بويىنشا جۇزەگە اسىرىلۋدا. «جانۇيا» ماماندارى الەۋمەتتىك جاعدايى تومەن وتباسىلاردى الەۋمەتتىك باعدارلامالار تۋرالى اقپاراتتاندىرادى، قاجەتتى قۇجاتتاردى دايىنداۋعا كومەكتەسەدى. سونداي-اق زاڭگەرلىك جانە پسيحولوگيالىق كەڭەس، وڭالتۋ كومەگىن جانە باسقا دا قىزمەت تۇرلەرىن ۇسىنادى.
– «جانۇيا» از قامتىلعان جانە كوپ بالالى وتباسىلارعا ارنالعان الەۋمەتتىك ورتالىق تالدىقورعان قالاسىنىڭ جۇمىسپەن قامتۋ، الەۋمەتتىك باعدارلامالار جانە ازاماتتىق حال اكتىلەرىن تىركەۋ ءبولىمىنىڭ باستاماسىمەن قۇرىلعان. ورتالىقتى قۇرۋداعى ماقساتىمىز تالدىقورعان قالاسىندا تۇراتىن الەۋمەتتىك ءالسىز وتباسىلاردىڭ ءومىر ءسۇرۋ ساپاسىن ارتتىرۋ، ەكونوميكالىق دەربەستىكتى نىعايتۋ جانە ازاماتتاردىڭ ومىرلىك قيىن جاعدايدان شىعۋ ءۇشىن جەكە ۋاجدەمەسىن نىعايتۋ بولىپ تابىلادى، – دەيدى الماتى وبلىستىق ايەلدەردى قولداۋ ورتالىعىنىڭ پرەزيدەنتى جانار نۇرمۇحانوۆا.
بۇگىنگى تاڭدا «جانۇيا» ورتالىعى بالالى وتباسىلاردى جەكە-باعدارلى سۇيەمەلدەۋدى قامتاماسىز ەتەدى. بۇعان پسيحولوگيالىق-بىلىم بەرۋ، قۇقىقتىق، الەۋمەتتىك-مەديسينالىق، ەڭبەك جانە مادەني سيپاتتاعى ءىس-شارالار كىرەدى.
«جانۇيا» از قامتىلعان جانە كوپ بالالى وتباسىلارعا ارنالعان الەۋمەتتىك ورتالىقتىڭ وكىلى مادينا بەلگىبايەۆانىڭ ايتۋىنشا، كوپ بالالى انالار مۇندا تىگىن ءىسى، بەت ارلەۋ، كومپيۋتەرلىك ساۋاتتىلىق جانە اسپازدىق بويىنشا وقىتۋ كۋرستارىنان وتەدى.
وسى كەزەڭدە ورتالىققا 2000-نان استام وتباسى كومەك سۇرادى. ونىڭ 175-ىنە پسيحولوگيالىق كومەك كورسەتىلسە، 190 وتباسىعا «جانۇيا» ورتالىعىنىڭ زاڭگەرلىك قىزمەتى كورسەتىلدى.
