كەزدەسۋدە وبلىس اكىمى ءوڭىرىمىزدىڭ ەكونوميكالىق الەۋەتىن ايتا كەلە، كورشى ەلمەن الىس-بەرىستى كۇشەيتۋ باعىتىندا ءبىرقاتار ۇسىنىس پىكىرلەرىن جەتكىزدى.
«مەنىڭشە بۇل كەزدەسۋ ەكى تاراپ ءۇشىن دە ءتيىمدى بولادى. سەبەبى ءبىزدىڭ وڭىردە كاسىپكەرلىكپەن اينالىسۋ ءۇشىن ىڭعايلى جاعداي جاسالعان. ول قىتايلىق كاسىپكەرلەردى قىزىقتىرادى دەپ ويلايمىن. بۇعان دەيىن دە ەكى ەل اراسىندا بايلانىس جاقسى بولىپ كەلدى. ەلىمىزدەگى قىتايلىق كومپانيالارمەن بىرلەسىپ جۇزەگە اسىرىلعان 50-دەن استام جوبامەن، قوس تاراپ اراسىنداعى تاۋار اينالىمنىڭ 10،4 ملرد-قا اقش دوللارىنا جەتكەنى وسىنىڭ دالەلى. الداعى ۋاقىتتا ارىپتەستىك قارىم-قاتىناستى تۋريزم جانە ينۆاسيالىق دامۋ باعىتىندا دا نىعايتا تۇسەمىز دەگەن سەنىمدەمىن»، – دەدى جانسەيىت قانسەيىت ۇلى.
وڭتۇستىك ءوڭىرى جايلى اقپاراتقا قانىققان قوناقتار دا بىرلەسىپ جۇمىس ىستەۋگە مۇددەلى ەكەندىكتەرىن جەتكىزدى. ولار قىتايدا ءبىلىم سالاسىنا قاتىستى جاڭا باستاما ىسكە اسىرىلعالى جاتقانىن ايتا كەلە، قازاقستاندىقتاردى ءوز ەلدەرىنە وقۋعا شاقىردى.
«نەگىزىندە قوس تاراپ اراسىندا قاتىناستى نىعايتۋ ەكى ەلگە دە وتە ءتيىمدى. وسى رەتتە ءبىز عىلىم مەن ءبىلىمدى دامىتۋعا كۇش سالىپ كەلەمىز. اتالعان سالانى دامىتا وتىرىپ، كورشى ەلدەرمەن قاتىناستى نىعايتۋدى كوزدەپ وتىرمىز. ماسەلەن، وسى جوبا اياسىندا قازاقستاندىق مەكتەپ بىتىرۋشىلەردى وقۋعا شاقىرامىز. سونداي-اق، وقۋ اياقتالعان سوڭ ولاردى جۇمىسقا ورنالاستىرۋ ماسەلەسىن دە شەشىپ بەرۋگە اتسالىسامىز»، – دەدى قحر ينۆەستيسيا جانە دامۋ كوميتەتىنىڭ دەپارتامەنت باسشىسى چين يۋيساي.
ايتا كەتەيىك، جۇڭگو ەلىندە ءقازىردىڭ وزىندە 15 مىڭعا تارتا قازاقستاندىق جاس ءبىلىمىن جەتىلدىرىپ ءجۇر. ەكى ەل اراسىنداعى جوبالار وڭ شەشىمىن تاپسا، بۇل كورسەتكىش ەسەلەپ ارتۋى مۇمكىن. ويتكەنى، قىتايلىق وقۋ ورىندار بيىل تاعى گرانت ءبولىپ وتىر.
وقو اكىمىنىڭ باسپا ءسوز قىزمەتى
