"قازاقتەلەكوم" ءۇش اپتانىڭ ىشىندە Sapa+ جوباسى اياسىندا تاعى 100 مىڭ روۋتەردى اۋىستىردى. وسىلايشا، جالپى سانىن 200 مىڭعا جەتكىزدى، دەپ حابارلايدى Dalanews.kz. 

قازاقستاننىڭ ەڭ ءىرى بايلانىس وپەراتورى Sapa+ جوباسىن قارقىندى تۇردە جۇزەگە اسىرىپ كەلەدى. ايدىڭ باسىندا كومپانيا 100 مىڭ روۋتەردىڭ ورناتىلعانى تۋرالى ەسەپ بەرسە، 20 كۇننىڭ ىشىندە بۇل كورسەتكىش ەكى ەسەلەنىپ، 200 مىڭعا جەتتى. بۇگىندە "قازاقتەلەكومعا" كۇن سايىن ءارتۇرلى بايلانىس ارنالارى ارقىلى جۇزدەگەن تۇتىنۋشى جاڭا روۋتەر ورناتۋعا ءوتىنىش بىلدىرۋدە. كومپانيا ماماندارى قويماعا جاڭا جابدىقتار تۇسكەن سايىن ولاردى دەرەۋ ورناتىپ جاتىر.

"جوبانىڭ باسىندا لوگيستيكا مەن بيزنەس-پروسەستەر تولىعىمەن رەتكە كەلمەگەندىكتەن، ناتيجەلەر سالىستىرمالى تۇردە قاراپايىم بولدى. ءبىراق ۋاقىت وتە كەلە ارىپتەستەرىمىز قاجەتتى قارقىن مەن جىلدامدىقتى مەڭگەرىپ، ەلىمىزدىڭ تۇكپىر-تۇكپىرىندەگى تۇتىنۋشىلارىمىزعا كۇن سايىن مىڭداعان جاڭا روۋتەردى ورناتۋدا. ءقازىردىڭ وزىندە 200 مىڭ روۋتەر ورناتىلىپ، بۇل سان ساعات سايىن ارتىپ كەلەدى. جالپى، مەن ايتقانداي، Sapa+ ۇزاق مەرزىمدى جوبا، ونىڭ اياسىندا ەلىمىزدىڭ بارلىق وڭىرىندە كليەنتتەرىمىزگە جاڭا جابدىق ورناتۋدى جالعاستىرامىز"، – دەپ اتاپ ءوتتى "قازاقتەلەكوم" اق باسقارما ءتوراعاسى باعدات مۋسين.

جوبا ەل اۋماعىندا، سونىڭ ىشىندە وبلىس ورتالىقتارى مەن شاعىن قالالاردا قاتار جۇزەگە اسىرىلىپ جاتىر. Sapa+ جوباسىنا قاتىسۋ مۇمكىندىگىن تەكسەرۋ جانە جاڭا روۋتەر ورناتۋعا ءوتىنىم بەرۋ ءۇشىن "قازاقتەلەكوم" كليەنتتەرى iOS جانە Android قۇرىلعىلارىنا ارنالعان telecom kz ءموبيلدى قوسىمشاسىن جۇكتەي الادى. سونداي-اق كومپانيانىڭ رەسمي سايتىندا نەمەسە 160 نومىرىنە قوڭىراۋ شالۋ ارقىلى ءوتىنىم قالدىرا الادى.

ورناتىلىپ جاتقان روۋتەرلەر 5 GHz جيىلىگىندە 2402 مبيت/س، ال 2.4 GHz جيىلىگىندە 574 مبيت/س جىلدامدىقتى قولدايدى. ولار كومپيۋتەرلەر، نوۋتبۋكتەر جانە زاماناۋي گادجەتتەر ءۇشىن Wi-Fi نەمەسە كابەل ارقىلى سەنىمدى قوسىلىمدى قامتاماسىز ەتەدى. سونىمەن قاتار روۋتەرلەر جەلىنىڭ ساپاسىن، ءتىپتى كەدەرگىلەر مەن اقاۋلار بولعان جاعدايدا دا، باقىلاپ، وڭتايلاندىراتىن ينتەللەكتۋال فۋنكسيالارعا دا يە.