"Qazaqtelekom" úsh aptanyń ishinde Sapa+ jobasy aıasynda taǵy 100 myń roýterdi aýystyrdy. Osylaısha, jalpy sanyn 200 myńǵa jetkizdi, dep habarlaıdy Dalanews.kz. 

Qazaqstannyń eń iri baılanys operatory Sapa+ jobasyn qarqyndy túrde júzege asyryp keledi. Aıdyń basynda kompanıa 100 myń roýterdiń ornatylǵany týraly esep berse, 20 kúnniń ishinde bul kórsetkish eki eselenip, 200 myńǵa jetti. Búginde "Qazaqtelekomǵa" kún saıyn ártúrli baılanys arnalary arqyly júzdegen tutynýshy jańa roýter ornatýǵa ótinish bildirýde. Kompanıa mamandary qoımaǵa jańa jabdyqtar túsken saıyn olardy dereý ornatyp jatyr.

"Jobanyń basynda logıstıka men bıznes-prosester tolyǵymen retke kelmegendikten, nátıjeler salystyrmaly túrde qarapaıym boldy. Biraq ýaqyt óte kele áriptesterimiz qajetti qarqyn men jyldamdyqty meńgerip, elimizdiń túkpir-túkpirindegi tutynýshylarymyzǵa kún saıyn myńdaǵan jańa roýterdi ornatýda. Qazirdiń ózinde 200 myń roýter ornatylyp, bul san saǵat saıyn artyp keledi. Jalpy, men aıtqandaı, Sapa+ uzaq merzimdi joba, onyń aıasynda elimizdiń barlyq óńirinde klıentterimizge jańa jabdyq ornatýdy jalǵastyramyz", – dep atap ótti "Qazaqtelekom" AQ basqarma tóraǵasy Baǵdat Mýsın.

Joba el aýmaǵynda, sonyń ishinde oblys ortalyqtary men shaǵyn qalalarda qatar júzege asyrylyp jatyr. Sapa+ jobasyna qatysý múmkindigin tekserý jáne jańa roýter ornatýǵa ótinim berý úshin "Qazaqtelekom" klıentteri iOS jáne Android qurylǵylaryna arnalǵan telecom kz mobıldi qosymshasyn júkteı alady. Sondaı-aq kompanıanyń resmı saıtynda nemese 160 nómirine qońyraý shalý arqyly ótinim qaldyra alady.

Ornatylyp jatqan roýterler 5 GHz jıiliginde 2402 Mbıt/s, al 2.4 GHz jıiliginde 574 Mbıt/s jyldamdyqty qoldaıdy. Olar kompúterler, noýtbýkter jáne zamanaýı gadjetter úshin Wi-Fi nemese kabel arqyly senimdi qosylymdy qamtamasyz etedi. Sonymen qatar roýterler jeliniń sapasyn, tipti kedergiler men aqaýlar bolǵan jaǵdaıda da, baqylap, ońtaılandyratyn ıntellektýal fýnksıalarǵa da ıe.