قازاقستاننىڭ تۇڭعىش پرەزيدەنتى نۇرسۇلتان نازاربايەۆ «بەس الەۋمەتتىك باستاما» اتتى حالىققا ۇندەۋىندە: «2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاڭا جاتاقحانا سالۋدى تاپسىرامىن» دەگەن ەدى. وبلىس ورتالىعىندا بوي كوتەرگەن جاڭا ستۋدەنتتەر ءۇيى بەرىلگەن پارمەننىڭ ورىندالعانىنا دالەل.
بۇگىندە جاتاقحانانىڭ قۇرىلىس جۇمىسى اياقتالدى. 96 بولمەدەن تۇراتىن عيمارات بولاشاق جاس مامانداردىڭ ءبىلىم الۋىنا مول مۇمكىندىك بەرەدى. جوبا قۇنى – 2،3 ملرد تەڭگە. ايتا كەتۋ كەرەك، نىساننىڭ قۇرىلىسىنا جاۋاپتى باس مەردىگەر كومپانيا «استانا قۇرىلىس» ج ش س بولعان. ال، مۇنارى كوكپەن تالاسىپ تۇرعان عيماراتتىڭ سۇلباسىن سىزعان ساۋلەتشى مارقۇم، اقمىرزا رۇستەمبەكوۆ.
– ەسكى عيماراتتى مەملەكەت مەنشىگىنە وتكىزىپ العاننان كەيىن قانداي ماقساتتا جۇمىس جۇرگىزەمىز دەگەن وي بولدى. سول ارالىقتا ەلباسى نۇرسۇلتان نازاربايەۆ جاتاقحانا قۇرىلىسىن جانداندىرۋعا تاپسىرما بەردى. سودان ىسكە كىرىستىك. ەندىگى دە ءبىلىم ورداسىمەن ەكى ورتاعا ۆەلوسيپەد جولى سالىنادى. جاستارعا جاساعان جاقسىلىقتىڭ ناتيجەسى وڭىنان بولادى. ولاردان ەشتەڭەنى ايانىپ قالمايمىز، – دەدى وبلىس اكىمى اماندىق باتالوۆ.
نىساننىڭ كورىنىسى كوز تارتارلىق. بالكوندار اينەكپەن جابىلىپ، سالقىنداتقىش جۇيەسى ورناتىلعان.
جاڭا جاتاحانانىڭ پوشىمى دا بولەك. دوڭگەلەك ءپىشىندى. نىساننىڭ كولوننالارى مەن قابىرعالارى تەمىر بەتوندى مونوليتتەن قۇيىلعان. قالاشىق اۋماعىن اباتتاندىرۋعا دا باسا نازار اۋدارىلعان. جوبا بويىنشا مۇندا كوگالدى ساياباق، ۆولەيبول، فۋتبول، باسكەتبول مەن ۇستەل ءۇستى تەننيسى ءۇشىن الاڭدار سالىنعان. ءتىپتى، جەڭىل اۆتوكولىكتەر ءۇشىن ارنايى تۇراقجاي مەن ورىندار قاراستىرىلعان.
نىساننىڭ نەگىزگى يەلەرى جاستاردىڭ قۋانىشىندا شەك جوق. «مۇنداي جاتاقحانانى ەش جەردەن كەزدەستىرمەدىم. ساۋلەتى كەلىسكەن عيمارات قالاعا كورىك بەرىپ تۇر. قوعامنىڭ قوزعاۋشى كۇشى-جاستارعا ۇلكەن كوڭىل بولىنۋدە. ول ءۇشىن مەملەكەت باسشىلىعىنا ايتار العىسىمىز زور»، – دەيدى «بولاشاق» پرەزيدەنتتىك ستيپەندياسى قاۋىمداستىعىنىڭ اتقارۋشى ديرەكتورى لاۋرا دەمەسىنوۆا.
بىلىمگەرلەردىڭ شاڭىراعىنا اينالاتىن جاتاقحانانىڭ ەسىگىن ايقارا اشقانى تەك جاستاردى عانا ەمەس، ءبىلىم ورداسىنىڭ باسشىلىعىندا قۋانتىپ وتىر.
– جەتىسۋ ۋنيۆەرسيتەتىنىڭ جاستارى ءوز قالاشىقتارىندا، باقىتتى ستۋدەنتتىك شاقتارىن وتكىزىپ، الاڭسىز ءبىلىم الىپ، ەلىمىزدىڭ كوركەيۋى جولىندا ايانباي ەڭبەك ەتەتىن بولادى. قالامىزدىڭ كوركەم شاعىن اۋداندارىنىڭ بىرىنە اينالاتىن ستۋدەنتتەر قالاشىعى جارقىن بولاشاعىمىزدىڭ كەپىلى دەپ بىلەمىز، – دەدى ءى. جانسۇگىروۆ اتىنداعى ۋنيۆەرسيتەتىنىڭ رەكتورى قۋات مارات ۇلى.
ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ ستۋدەنتتەرىنە ارنالعان جاتاقحانا ەلىمىز بويىنشا العاشقى سالىنعان ارحيتەكتۋرالىق جاعىنان كۇردەلى، ساۋلەتتى نىساننىڭ ءبىرى.
عيماراتتىڭ جانىندا قالالىق جاعاجاي، سيتي پليۋس ءىرى ساۋدا ورتالىعى بار. ستۋدەنتتەردىڭ قاراتال جاعالاۋىنا شىعىپ سەرۋەندەۋىنە بولادى. ىرگەسىندە ارداگەرلەر ساياباعى سىندى ماڭىزدى نىساندار تۇر. زاماناۋي ۇلگىدەگى عيماراتتا ستۋدەنتتەرگە بار جاعداي قاراستىرىلعان. كىتاپحانا، وقۋ زالى، شاعىن كينوزال، سپورتتىق الاڭى مەن جاتتىعۋ بولمەلەرى بار.
بۇل نىساندى جاتاقحانا دەپ ايتۋ قيىن. ويتكەنى، جوعارى كلاسستاعى قوناق ۇيگە ۇقسايدى. مۇندا بارلىق قاجەتتى ينفراقۇرىلىم تولىعىمەن جاساقتالعان. بۇل قالاشىق تالدىقورعاننىڭ شىعىس بولىگىنە ءسان بەرىپ تۇر.
الىستان مەن مۇندالاپ كورىنەتىن جاتاقحانانىڭ اسەمدىگىنە تاڭداڭعانداردىڭ اراسىندا «قازاقستان ستۋدەنتتەر اليانسىنىڭ» پرەزيدەنتى ءىلياس تۇستىكبايەۆتا بار.
– ەلوردا مەن وڭتۇستىك استانامىز الماتى قالالارىندا بولدىم. ءىرى ماگاپوليستەردە ءدال وسىنداي ستۋدەنتتەر ءۇيى جوقتىڭ قاسى. ءوزىمىزدىڭ تۋعان ولكەمىزدە جاعىمدى جايىتتاردىڭ ورىن الىپ جاتقانى قۋانتادى. ستۋدەنتتەرگە كورسەتىلگەن قولداۋ ەرەن. مۇنى جاستار ەستەن شىعارماۋى كەرەك، – دەپ ءوز ويىن ءبىلدىردى ءىلياس تۇستىكبايەۆ.
ايتا كەتەرلىگى، وبلىستا تاعى دا ءۇش بىردەي جاتاقحانانىڭ قۇرىلىس جۇمىستارى ءجۇرىپ جاتىر. الداعى تاڭدا مۇنداي اقجولتاي حابارلاردىڭ لەگى جالعاسىن تاپپاق.
انار سابىروۆا، الماتى وبلىسى.
