Qazaqstannyń tuńǵysh Prezidenti Nursultan Nazarbaev «Bes áleýmettik bastama» atty halyqqa úndeýinde: «2022 jyldyń sońyna deiin stýdentterge arnap keminde 75 myń oryndyq jańa jataqhana salýdy tapsyramyn» degen edi. Oblys ortalyǵynda boi kótergen jańa stýdentter úii berilgen pármenniń oryndalǵanyna dálel.
Nysannyń kórinisi kóz tartarlyq. Balkondar áinekpen jabylyp, salqyndatqysh júiesi ornatylǵan.
Jańa jatahananyń poshymy da bólek. Dóńgelek pishindi. Nysannyń kolonnalary men qabyrǵalary temir betondy monolitten quiylǵan. Qalashyq aýmaǵyn abattandyrýǵa da basa nazar aýdarylǵan. Joba boiynsha munda kógaldy saiabaq, voleibol, fýtbol, basketbol men ústel ústi tennisi úshin alańdar salynǵan. Tipti, jeńil avtokólikter úshin arnaiy turaqjai men oryndar qarastyrylǵan.
Nysannyń negizgi ieleri jastardyń qýanyshynda shek joq. «Mundai jataqhanany esh jerden kezdestirmedim. Sáýleti kelisken ǵimarat qalaǵa kórik berip tur. Qoǵamnyń qozǵaýshy kúshi-jastarǵa úlken kóńil bólinýde. Ol úshin memleket basshylyǵyna aitar alǵysymyz zor», – deidi «Bolashaq» prezidenttik stipendiiasy qaýymdastyǵynyń atqarýshy direktory Laýra Demesinova.
Bilimgerlerdiń shańyraǵyna ainalatyn jataqhananyń esigin aiqara ashqany tek jastardy ǵana emes, bilim ordasynyń basshylyǵynda qýantyp otyr.
– Jetisý ýniversitetiniń jastary óz qalashyqtarynda, baqytty stýdenttik shaqtaryn ótkizip, alańsyz bilim alyp, elimizdiń kórkeiýi jolynda aianbai eńbek etetin bolady. Qalamyzdyń kórkem shaǵyn aýdandarynyń birine ainalatyn Stýdentter qalashyǵy jarqyn bolashaǵymyzdyń kepili dep bilemiz, – dedi I. Jansúgirov atyndaǵy ýniversitetiniń rektory Qýat Maratuly.
Ǵimarattyń janynda qalalyq jaǵajai, Siti Pliýs iri saýda ortalyǵy bar. Stýdentterdiń Qaratal jaǵalaýyna shyǵyp serýendeýine bolady. Irgesinde ardagerler saiabaǵy syndy mańyzdy nysandar tur. Zamanaýi úlgidegi ǵimaratta stýdentterge bar jaǵdai qarastyrylǵan. Kitaphana, oqý zaly, shaǵyn kinozal, sporttyq alańy men jattyǵý bólmeleri bar.
Bul nysandy jataqhana dep aitý qiyn. Óitkeni, joǵary klasstaǵy qonaq úige uqsaidy. Munda barlyq qajetti infraqurylym tolyǵymen jasaqtalǵan. Bul qalashyq Taldyqorǵannyń shyǵys bóligine sán berip tur.
Alystan men mundalap kórinetin jataqhananyń ásemdigine tańdańǵandardyń arasynda «Qazaqstan Stýdentter aliansynyń» prezidenti Iliias Tústikbaevta bar.
– Elorda men ońtústik astanamyz Almaty qalalarynda boldym. Iri magapolisterde dál osyndai stýdentter úii joqtyń qasy. Ózimizdiń týǵan ólkemizde jaǵymdy jaiyttardyń oryn alyp jatqany qýantady. Stýdentterge kórsetilgen qoldaý eren. Muny jastar esten shyǵarmaýy kerek, – dep óz oiyn bildirdi Iliias Tústikbaev.
Aita keterligi, oblysta taǵy da úsh birdei jataqhananyń qurylys jumystary júrip jatyr. Aldaǵy tańda mundai aqjoltai habarlardyń legi jalǵasyn tappaq.
Anar SABYROVA, Almaty oblysy.
