كولىك ءمينيسترى قىزمەتىنە جاڭادان تاعايىندالعان نۇرلان ساۋرانبايەۆ ۇكىمەت وتىرىسىندا انت بەردى، دەپ حابارلايدى Dalanews.kz.
"حالقىم مەن پرەزيدەنتىمنىڭ الدىندا سالتاناتتى تۇردە انت ەتەمىن: بار كۇش-جىگەرىم مەن ءبىلىمىمدى وتانىمنىڭ ەكونوميكالىق جانە رۋحاني دامۋىنا ارنايمىن، كونستيتۋسيا مەن ەلىمىزدىڭ زاڭدارىن قاتاڭ ساقتايمىن، بارلىق ىس-ارەكەتىمدە زاڭدىلىق پەن ادىلەتتىلىك، ازاماتتىق، ۇلتارالىق جانە كونفەسسياارالىق كەلىسىم قاعيداتتارىن باسشىلىققا الامىن، قازاقستان حالقىنا ادال قىزمەت ەتىپ، ەلىمىزدىڭ مەملەكەتتىلىگى مەن حالىقارالىق بەدەلىن نىعايتۋعا ۇلەس قوسامىن. انت ەتەمىن!"، – دەدى نۇرلان ساۋرانبايەۆ.
ەسكە سالايىق، 30 ماۋسىمدا نۇرلان ساۋرانبايەۆ قازاقستان رەسپۋبليكاسىنىڭ كولىك ءمينيسترى لاۋازىمىنا تاعايىندالدى.
نۇرلان ساۋرانبايەۆ 1967 جىلى جامبىلدا دۇنيەگە كەلگەن. س.م. كيروۆ اتىنداعى قازاق مەملەكەتتىك ۋنيۆەرسيتەتىن، مۇناي ونەركاسىبىن وقىتۋ ورتالىعىن (يتاليا) بىتىرگەن. ماماندىعى بويىنشا ەكونوميست، مۇناي اكىمشىلەندىرۋ ماگيسترى. ەڭبەك جولىن 1991 جىلى جەكە كوممەرسيالىق كومپانيانىڭ باسشىسى بولىپ باستاعان.
