الەۋمەتتىك جەلىلەردە جامبىل وبلىسى بويىنشا قۇقىقتىق ستاتيستيكا جانە ارنايى ەسەپكە الۋ كوميتەتى دەپارتامەنتى قىزمەتكەرى ءاليا قوجابەكوۆانىڭ تاعى ءبىر بەينەۇندەۋى تارادى، - دەپ حابارلايدى Dalanews.kz.

بۇل جولى دا ول پرەزيدەنتتەن كومەك سۇراعان. قوجابەكوۆانىڭ سوزىنشە، باس پروكۋراتۋرانىڭ قىزمەتكەرلەرى تەكسەرگەننەن كەيىن كوپتەگەن زاڭبۇزۋشىلىق انىقتالعان. ول بۇل جايتقا بەي-جاي قاراماعانى ءۇشىن پرەزيدەنتكە العىس ايتتى.

دەگەنمەن، جامبىلدىق پروكۋروردىڭ سوزىنشە، تەكسەرىس كەزىندە 2022-2025 جىلدار ارالىعى قامتىلعان، بۇعان دەيىنگى جايتتار اشىلماعان.

"سەبەبى باس پروكۋراتۋرادان كەلگەن قىزمەتكەرلەر اقپاراتتاندىرۋ، اقپاراتتىق تەحنولوگيالار سالاسىنداعى ماماندار ەمەس. مەنىڭ ويىمشا، ولاردا ارنايى داعدى بولماعاندىقتان، جامبىل وبلىسى بويىنشا دەپارتامەنتتە قالىپتاسقان بۇكىل جۇيەنى انىقتاي المادى"، - دەدى ول.

ول مۇنداي دەرەكتەر سدتبت دەرەكقورىنداعى زاڭبۇزۋشىلىقتاردى تولىق انىقتاي الماعاندارى ءۇشىن جابۋلى كۇيىندە قالماۋى كەرەك ەكەنىن جەتكىزدى. ول بۇل ىسكە اقپاراتتىق تەحنولوگيا سالاسىنداعى مامانداردى، مىسالى، سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ ۆەدومستۆولارى جانە باسقالارىن تارتۋ كەرەك ەكەنىن مالىمدەدى.

"تەكسەرىس ناتيجەلەرى، تەكسەرىس انىقتامالارى، قورىتىندىلار، مالىمەتتەر ماعان بەرىلمەدى. سوندىقتان باس پروكۋراتۋرادان تەكسەرىستىڭ باستاماشىسى ەكەنىمدى جانە بۇل زاڭناماعا قايشى كەلمەيتىنىن ەسكەرە وتىرىپ، تەكسەرىس ماتەريالدارىنىڭ كوشىرمەلەرىن ماعان جولداۋدى سۇرايمىن"، - دەدى ول.

بۇعان دەيىنگى جاعداي

ەسكە سالايىق، بۇعان دەيىن ءاليا قوجابەكوۆا 2024 جىلى باس پروكۋرور بەرىك اسىلوۆقا، كوميتەت ءتوراعاسى نۇرلىباي سابيتكە، سونداي-اق، پرەزيدەنت اكىمشىلىگىنە بىرنەشە رەت رەسمي تۇردە حات جازىپ، جامبىل وبلىسى بويىنشا دەپارتامەنتتەگى زاڭبۇزۋشىلىقتار تۋرالى مالىمدەگەنىن ايتتى. سونىمەن قاتار، ۇقك مەن سىبايلاس جەمقورلىققا قارسى اگەنتتىككە دە رەسمي تۇردە جۇگىنگەن.

كەيىنىرەك باس پروكۋراتۋرا بۇل ىسكە قاتىستى جاۋاپ قاتتى.

"باس پروكۋروردىڭ تاپسىرماسى بويىنشا ايتىلعان ۋاجدەردى تەكسەرۋ ءۇشىن جامبىل وبلىسىنا باس پروكۋراتۋرانىڭ ىشكى قاۋىپسىزدىك دەپارتامەنتى مەن ءتيىستى قۇرىلىمدىق بولىمشەسىنىڭ قىزمەتكەرلەرى، سونداي-اق، كوميتەت ءتوراعاسىنىڭ ورىنباسارى كىرەتىن جۇمىس توبى جىبەرىلدى"، دەدى ۆەدومستۆو وكىلدەرى بۇعان دەيىن.