الەۋمەتتىك جەلىدە جامبىل وبلىسىندا ۇيىمداستىرىلعان قىزعالداقتار مەرەكەسى جۇرتتىڭ نارازىلىعىن تۋعىزدى، - دەپ حابارلايدى Dalanews.kz.
جامبىل وبلىسىندا وتكەن سەنبىدە، 3 مامىردا "قىزعالداق مۇرا" اتتى فەستيۆال ءوتتى. ءىس-شاراعا 5000-نان اسا ادام جينالعان. الەۋمەتتىك جەلىدە تۇرعىنداردىڭ شاعىمى پايدا بولدى. نەگىزگى ماسەلە تاسىمالداۋعا بايلانىستى.
"جولداعى بالالاردىڭ جارتىسىن الىپ كەتۋدى سۇراعانىمىزدا پوليسەيلەر قاتىسى جوق ەكەنىن ايتىپ، ءبىزدى اينالىپ ءوتتى"، - دەدى جەرگىلىكتى تۇرعىندار.
اكىمدىك وكىلدەرى ءىس-شاراعا تىركەلمەي كەلگەندەردىڭ قاراسى كوپ بولىپ، تاسىمال تۇرعىسىندا ماسەلە بولعانىن مالىمدەدى.
"وڭىرىمىزدە قاراتاۋ بوكتەرىندە ۇيىمداستىرىلعان "قىزعالداق مۇرا" فەستيۆالى ۇلكەن اۋقىمدا ءوتتى. الدىن الا حابارلانعانداي، "قىزعالداق مۇرا" سايتىندا 3232 ادام تىركەلگەن بولسا، 2000 ادام تىركەلمەي باردى. جالپى ادام سانى 5000-نان استى. جەكە كولىكپەن كەلگەندەر سانى 4000 ادامعا جۋىقتادى. 700-دەن اسا جەكە كولىك، ونىڭ ىشىندە جەكە سپرينتەرلەر بولدى. ازاماتتاردى تاسىمالداۋداعى باستى كەدەرگى – جولدىڭ ءبىر جولاقتى بولۋى جانە تاسىمالداۋشى كولىكتەردىڭ بىر-بىرىنە كەدەرگى كەلتىرۋى.
اكىمدىك وكىلىنىڭ ايتۋىنشا، حالىق فەستيۆالدان ەرتە قايتا باستاعان.
"14:00-15:00 ارالىعىندا ادام لەگى كوبەيە ءتۇستى. مەن ءوزىم بارلىق ازاماتتى 17:20-دە وتىرعىزىپ جىبەردىم. بارلىعى جاۋاپكەرشىلىكپەن ءوتتى. زارداپ شەككەندەر بولعان جوق. ارينە، بۇل باعىتتاعى اۋقىمدى شارا وڭىردە العاش رەت ۇيىمداستىرىلعاندىقتان، كەيبىر كەلەڭسىزدىكتەر بولدى. ول الداعى ۋاقىتتا ساباق ءارى ۇلكەن تاجىريبە بولارى ءسوزسىز. دەگەنمەن قوناقتار مەن شەتەلدىكتەردىڭ، عالىمداردىڭ بەرگەن وڭ باعاسى مەن جاقسى پىكىرى فەستيۆالدىڭ ءوز دەڭگەيىندە وتكەنىن كورسەتەدى"، - دەدى ول.
