Áleýmettik jelide Jambyl oblysynda uiymdastyrylǵan qyzǵaldaqtar merekesi jurttyń narazylyǵyn týǵyzdy, - dep habarlaidy Dalanews.kz.
Jambyl oblysynda ótken senbide, 3 mamyrda "Qyzǵaldaq mura" atty festival ótti. Is-sharaǵa 5000-nan asa adam jinalǵan. Áleýmettik jelide turǵyndardyń shaǵymy paida boldy. Negizgi másele tasymaldaýǵa bailanysty.
"Joldaǵy balalardyń jartysyn alyp ketýdi suraǵanymyzda politseiler qatysy joq ekenin aityp, bizdi ainalyp ótti", - dedi jergilikti turǵyndar.
Ákimdik ókilderi is-sharaǵa tirkelmei kelgenderdiń qarasy kóp bolyp, tasymal turǵysynda másele bolǵanyn málimdedi.
"Óńirimizde Qarataý bókterinde uiymdastyrylǵan "Qyzǵaldaq mura" festivali úlken aýqymda ótti. Aldyn ala habarlanǵandai, "Qyzǵaldaq mura" saitynda 3232 adam tirkelgen bolsa, 2000 adam tirkelmei bardy. Jalpy adam sany 5000-nan asty. Jeke kólikpen kelgender sany 4000 adamǵa jýyqtady. 700-den asa jeke kólik, onyń ishinde jeke sprinterler boldy. Azamattardy tasymaldaýdaǵy basty kedergi – joldyń bir jolaqty bolýy jáne tasymaldaýshy kólikterdiń bir-birine kedergi keltirýi.
Ákimdik ókiliniń aitýynsha, halyq festivaldan erte qaita bastaǵan.
"14:00-15:00 aralyǵynda adam legi kóbeie tústi. Men ózim barlyq azamatty 17:20-de otyrǵyzyp jiberdim. Barlyǵy jaýapkershilikpen ótti. Zardap shekkender bolǵan joq. Árine, bul baǵyttaǵy aýqymdy shara óńirde alǵash ret uiymdastyrylǵandyqtan, keibir keleńsizdikter boldy. Ol aldaǵy ýaqytta sabaq ári úlken tájiribe bolary sózsiz. Degenmen qonaqtar men sheteldikterdiń, ǵalymdardyń bergen oń baǵasy men jaqsy pikiri festivaldiń óz deńgeiinde ótkenin kórsetedi", - dedi ol.
