مەركى اۋدانىنىڭ پروكۋراتۋراسى ۇن تارتۋ زاۋىتىن سوعۋدى جوسپارلاعان ينۆەستوردىڭ قۇقىعىن قورعادى، دەپ حابارلايدى Dalanews.kz. 

مەركى اۋدانىنىڭ پروكۋراتۋراسى ينۆەستورعا ۇن تارتۋ زاۋىتىن ىسكە قوسۋدى قامتاماسىز ەتەتىن، ءداندى داقىلداردى سەبۋ ءۇشىن جەر ۋچاسكەسىن ءبولۋ ماسەلەسىن شەشتى، دەپ مالىمدەدى جامبىل وبلىسىنىڭ پروكۋراتۋراسى.

«مەراگرو حولدينگ» جشس-گى جامبىل وبلىسى اكىمىنىڭ 2021 جىلعى 12 مامىرداعى №108 قاۋلىسىنىڭ نەگىزىندە قۋاتى 3000 توننا ۇن ءوندىرۋ زاۋىتىن سالۋ ءۇشىن ينۆەستيسيالىق جوبا رەتىندە تانىلىپ، وبلىستىڭ كاسىپكەرلىكتى قولداۋ كارتاسىنا ەنگىزىلگەن. وسى جوبانى جۇزەگە اسىرۋ شەڭبەرىندە اسىل تۇقىمدى ءىرى قارا مال ءوسىرۋ دە جوسپارلانىپ وتىر. بۇل ينۆەستيسيالاردى تارتۋعا جانە 40-تان استام جاڭا جۇمىس ورنىن اشۋعا مۇمكىندىك بەرەدى، – دەپ قوستى ۆەدومستۆو.

ۇن ءوندىرۋ زاۋىتىنىڭ قۇرىلىسىن 2024 جىلدىڭ سوڭىندا اياقتاۋ جوسپارلانعان. وسىعان وراي، ينۆەستور زاۋىتتى ىسكە قوسۋ ءۇشىن ءداندى داقىل ەگۋگە جەر ۋچاسكەلەرى قاجەتتىگىن كورسەتىپ، مەركى اۋدانى اكىمدىگىنە اۋىل شارۋاشىلىق ماقساتتاعى جەر سۇراپ، 2021 جىلعى بەرىلگەن وتىنىشىنە جاۋاپ الماي جۇرگەندىگى تۋرالى شاعىمدانعان.

اۋدان پروكۋراتۋراسى تالداۋ بارىسىندا جەرگىلىكتى اتقارۋشى ورگاننىڭ بۇگىنگە دەيىن اتالعان ءوتىنىشتى قاراماي، ءتيىستى جاۋاپ بەرمەگەنىن انىقتادى.

پروكۋراتۋرانىڭ ارالاسۋىنان كەيىن ينۆەستور تالاپتارى قاناعاتتاندىرىلىپ، 2024 جىلعى 31 قازاندا 200 گەكتار اۋىل شارۋاشىلىق ماقساتتاعى جەر راسىمدەلىپ، ونىڭ بۇزىلعان قۇقىعى قالپىنا كەلتىرىلدى.