«حح عاسىردىڭ گومەرى»، جىر دۇلدىلىنە ارنالعان كەشتىڭ شىمىلدىعى، عاسىر اقىنىنىڭ ەسكەرتكىشىنە الماتى وبلىسىنىڭ اكىمى مارات سۇلتانعازييەۆتىڭ گۇل شوقتارىن قويۋىنان باستاۋ الىپ، سوڭى ايماق باسشىسىنىڭ قاتىسۋىمەن قونايەۆ قالاسىنداعى مادەنيەت ۇيىندەگى ۇلكەن مەرەكەلىك كونسەرتكە ۇلاستى.
سالتاناتتى شارادا قازاقتىڭ قارا ولەڭىن كيە تۇتقان، جۇرەگىنىڭ تۇبىنەن قايناپ شىققان اسىل جىرلارىمەن، قالىڭ جۇرتشىلىقتىڭ ماحابباتىنا بولەنگەن ساڭلاق تۋرالى «ۇلى دالانىڭ جىر جولبارىسى» تەاترلاندىرىلعان پرولوگ ساحنا تورىندە كورىنىس تاپتى.
حالىق پوەزياسىنىڭ الىبى اتانعان جامبىلدىڭ ەسىمى ءار ادامنىڭ جادىندا جاتتالعان. ول راسىندا، «ولەڭ كىرگەن تۇسىنە – جورگەگىندە مەن بولام»، – دەپ ءوزى ايتقانداي، ومىرگە ولەڭ بولىپ تۋعان سيرەك قۇبىلىس.
ايتىس ونەرىنىڭ مايتالمانى ءسۇيىنبايدىڭ باتاسىن العان، قازاق ادەبيەتىنىڭ كلاسسيك جازۋشىسى مۇحتار اۋەزوۆتىڭ ءوزى «جامبىل-اقىل ويدىڭ العىرى، وزگەگە ۇقسامايتىن دارا، وقشاۋ. ونىڭ ءبىر ءوزى ءارى ەپيك، ءارى ايتىس اقىنى، ءارى ازاماتتىق اۋەننىڭ دە اقىنى» دەپ باعا بەرگەن الىپ تۇلعانىڭ ادامزاتتىڭ ومىرىندە الار ورنى ايرىقشا.
ارتىندا قالاعان مۇراسى تالاي جانعا ازىق بولىپ قالعان دالا دارىنىن ۇلىقتاۋ بۇگىنگى ۇرپاققا پارىز.
شارادا ءوزىنىڭ قۇتتىقتاۋ سوزىندە وبلىس اكىمى مارات ەلەۋسىز ۇلى عاسىر جاساعان اقىن جاۋھار جىرلارىمەن تۋعان ەلىنىڭ قوشەمەتىنە بولەنگەنىن تىلگە تيەك ەتىپ، جامبىلدىڭ بالالىق پەن دانالىقتىڭ اراسىندا ءومىردىڭ اقيقات شىندىعىن، ەلىنىڭ اسىل ارمانىن، ىزگى مۇراتىن جىرلاعانىن اتاپ ءوتتى.
– ەلدىكتى، ادىلدىكتى، ەرلىكتى دارىپتەدى. ءسويتىپ ءوزىنىڭ ءمولدىر گاۋھار جىرلارىمەن ءوز حالقىنىڭ ىستىق ىقىلاسىنا بولەندى. ەسىمى الەمگە اڭىز بولىپ تارادى. سوڭعى 2 جىل ىشىندە اقىننىڭ مۇرالارىن ناسيحاتتايتىن «جامبىل الەمى» اتتى 30 تومدىق كىتاپ جارىق كوردى. تانىمال عالىمداردىڭ ەڭبەكتەرىمەن تاعى 10 تومدىق جيناق وقىرمان قاۋىمعا جول تارتقان بولاتىن.
انكارا قالاسىندا «جامبىل جابايەۆ» اتتى كىتاپتىڭ تۇساۋى «تۇرىكسوي» ۇيىمىنىڭ باسقارما باسشىسى سانجار ءمۇلازىم ۇلىنىڭ قاتىسۋىمەن كەسىلگەن ەدى. وت اۋىز وراق ءتىلدى اقىننىڭ مۇرالارى بولاشاقتا تەرەڭىنەن زەرتتەلىپ، كەيىنگى ۇرپاققا اسىل قازىنا بولىپ قالارى ءسوزسىز. ءبىز جامبىل جابايەۆتىڭ مول مۇراسىن تەك مەرەيتويدا عانا ەمەس، ءار جىل سايىن جۇيەلى تۇردە جاس ۇرپاقتىڭ ساناسىنا ءسىڭىرۋىمىز قاجەت، – دەدى مارات سۇلتانعازييەۆ.
سالتاناتتى جيىندا وبلىس اكىمىنەن بولەك، اقىن، دراماتۋرگ، قازاقستاننىڭ ەڭبەك سىڭىرگەن قايراتكەرى، مەملەكەتتىك سىيلىقتىڭ لاۋرەاتى نۇرلان ورازالين مەن بەلگىلى جازۋشى، قوعام قايراتكەرى، قازاقستاننىڭ ەڭبەك سىڭىرگەن قايراتكەرى، جامبىلتانۋشى، الماتى وبلىسىنىڭ «قۇرمەتتى ازاماتى» ناعاشىبەك قاپالبەك ۇلى دا ءسوز مارجانىن تەرگەن تۋما تالانتتىڭ عازيز جىرلارىنا توقتالىپ، ونىڭ شىعارماشىلىعىنىڭ ماڭىزى تۋرالى وي ءوربىتتى.
