قازاقستاندا ۆەنچۋرلىق ينۆەستيسيالار قورلارى قورى قۇرىلماق. ونىڭ اياسىندا ورتامەرزىمدى پەرسپەكتيۆادا 1 ملرد دوللار جەكە ينۆەستيسيالاردى تارتۋ جوسپارلانىپ وتىر، دەپ جازادى Dalanews.kz.

بۇگىن ۇكىمەت باسشىسى ولجاس بەكتەنوۆ ۆەنچۋرلىق قارجىلاندىرۋ سالاسىنداعى جەتەكشى ساراپشىلار، قازاقستاندىق بيزنەس-قوعامداستىق وكىلدەرى جانە حالىقارالىق ارىپتەستەرمەن كەزدەسۋ وتكىزدى. تالقىلاۋدىڭ باستى تاقىرىبى جاھاندىق كاپيتالدى تارتۋعا، ستارتاپ-ەكوجۇيەنى دامىتۋعا جانە قازاقستاننىڭ وڭىرلىك تەحنولوگيالار مەن يننوۆاسيالار ورتالىعى رەتىندەگى ۇستانىمىن نىعايتۋعا باعىتتالعان ۆەنچۋرلىق ينۆەستيسيالار قورلارى قورىن قۇرۋ بولدى، دەپ جازادى ۇكىمەت باسشىسىنىڭ باسپا ءسوز قىزمەتى.

ديالوگقا شاقىرىلعان ستەنفورد ۋنيۆەرسيتەتىنىڭ پروفەسسورى جانە ۆەنچۋرلىق ينۆەستيسيا بويىنشا تانىمال ساراپشى يليا سترەبۋلايەۆ، Andreessen Horowitz سەرىكتەسى ماليكا اۋباكيروۆا جانە Lightspeed Venture Partners سەرىكتەسى عالىم يمانبايەۆ، سونداي-اق DCVC ينۆەستيسيالار جونىندەگى ديرەكتورى اننا فوكينا يننوۆاسيالاردى دامىتۋداعى ءوز تاجىريبەلەرىمەن ءبولىستى.

ساراپشىلار قازاقستانعا ەلەۋلى پروگرەسكە قول جەتكىزۋ ءۇشىن الەمدىك جەتەكشى ۆەنچۋرلىق ينۆەستيسيالار قورلارىمەن ىنتىماقتاستىقتى نىعايتۋ ماڭىزدى ەكەنىن اتاپ ءوتتى، بۇل ينۆەستيسيالاردى باسقارۋدىڭ وزىق تەحنولوگيالارى مەن وزىق تاجىريبەلەرىنە قول جەتكىزۋدى قامتاماسىز ەتۋگە مۇمكىندىك بەرەدى. ولار جاھاندىق كاپيتالدى تارتۋ ءۇشىن قۇقىقتىق ينفراقۇرىلىمدى نىعايتىپ، ستارتاپتاردى دامىتۋدىڭ كەيىنگى كەزەڭدەرىندە قولداۋعا جاعداي جاساۋ قاجەتتىگىن اتاپ ءوتتى.

سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ قازاقستان ءوڭىردىڭ بارلىق ۆەنچۋرلىق مامىلەلەرىنىڭ 70%-دان استامىن قامتاماسىز ەتىپ، ورتالىق ازيادا كوشباسشىلىق ۇستانىمدى يەلەنىپ وتىرعانىن اتاپ ءوتتى. سوڭعى بەس جىلدا ەلىمىزدەگى ۆەنچۋرلىق كاپيتال كولەمى التى ەسەدەن استام ءوسىپ، 80 ملن دوللارعا جەتتى.

قوردىڭ قۇرىلۋى قازاقستاننىڭ ينۆەستيسيالار مەن تەحنولوگيالاردىڭ حالىقارالىق ەكوجۇيەسىنە ينتەگراسيالانۋىنا باعىتتالعان ەلدىڭ ۆەنچۋرلىق كاپيتال نارىعىن دامىتۋدىڭ جاڭا كەزەڭىن بىلدىرەدى. 

ۆەنچۋرلىق ينۆەستيسيالار قورلارى قورى ورتا مەرزىمدى پەرسپەكتيۆادا جەتەكشى الەمدىك، وڭىرلىك جانە قازاقستاندىق ۆەنچۋرلىق قورلارعا باعىتتالاتىن 1 ملرد دوللار جەكە ينۆەستيسيالاردى تارتۋعا باعىتتالعان. بۇل ءتيىمدى ءارتاراپتاندىرۋدى، ەكونوميكانى ترانسفورماسيالاۋ ءۇشىن قاجەتتى جاھاندىق قۇزىرەتتەر مەن اسا ماڭىزدى تەحنولوگيالارعا بارىنشا قول جەتكىزۋدى قامتاماسىز ەتۋگە مۇمكىندىك بەرەدى. بۇگىنگى تاڭدا قوردىڭ باستاپقى كاپيتالىن قالىپتاستىرۋعا قازاقستاندىق ءىرى بيزنەس وكىلدەرىنەن 100 ملن دوللاردان استام سوماعا وتىنىمدەر جينالدى.

قور جۇمىسىندا جاساندى ينتەللەكت، سيفرلىق دەنساۋلىق ساقتاۋ جانە باسقا دا نەگىزگى تەحنولوگيالىق سالالاردى قوسقاندا، پەرسپەكتيۆالى باعىتتارعا ەرەكشە نازار اۋدارىلاتىن بولادى. 2030 جىلعا قاراي الەمدىك جاساندى ينتەللەكت نارىعى 827 ملرد دوللارعا دەيىن وسەدى دەپ بولجانۋدا، بۇل سالانى ينۆەستيسيالار ءۇشىن باسىم باعىتتاردىڭ بىرىنە اينالدىرادى. 

پرەمەر-مينيستر ولجاس بەكتەنوۆ ۆەنچۋرلىق ينۆەستيسيالار قورلارى قورىن قۇرۋ وزىق تەحنولوگيالارعا قولجەتىمدىلىكتى اشىپ قانا قويماي، قازاقستاننىڭ حالىقارالىق ستارتاپتار مەن تەحنولوگيالار حابى رەتىندەگى ۇستانىمىن نىعايتادى دەپ اتاپ ءوتتى.

"پرەزيدەنت قاسىم-جومارت توقايەۆ اتاپ وتكەندەي، ءبىز ءبىلىم مەن يننوۆاسياعا نەگىزدەلگەن ەكونوميكا قۇرىپ جاتىرمىز. بۇگىندە قازاقستاندا IT سەكتورى بەلسەندى دامىپ كەلەدى، سيفرلىق قىزمەتتەر ەكسپورتى ارتىپ، جاس ماماندار ەل ىشىندە دە، شەتەلدە دە سۇرانىسقا يە بولىپ وتىر. ءبىزدىڭ باستى مىندەتىمىز – ءوزىمىزدىڭ تالانتتارىمىزدى ساقتاپ قالۋعا جانە جاڭا دارىنداردى تارتۋعا جاعداي جاساۋ، ستارتاپتاردى دامىتۋدىڭ بارلىق كەزەڭىندە قولداۋ جانە قازاقستانعا جاھاندىق قۇزىرەتتەردى تارتۋ"، — دەپ اتاپ ءوتتى ولجاس بەكتەنوۆ.