بيىل 4 قازاندا اقتوبەدە تۇركىتىلدەس جۋرناليستەر قورى مەن «HALYK BANK» بىرگە ۇيىمداستىرعان «ىسكەرلىك جۋرناليستيكا: قارجىلىق ساۋاتتىلىق» اتتى سەمينار-ترەنينگ ءوتتى.
«تۇركىتىلدەس جۋرناليستەر قورى» ەلىمىزدىڭ مەديا سالاسىنىڭ ماماندارىنا ۇدايى سەمينار-ترەنينگتەر ۇيىمداستىرىپ كەلەدى. قور ءوز جۇمىسىن 2014 جىلى باستاعان بولاتى. بۇگىندە قور باسشىسى ءنازيا جويامەرگەن قىزىنىڭ باستاماسىمەن باسپا ءسوز قىزمەتكەرلەرىنىڭ بىلىكتىلىگىن ارتتىرىپ، قازاق جۋرناليستەرىنىڭ قالامىن قۋاتتى قىلۋدا اتقارىلعان شارۋا از ەمەس.
بيىل قوعامدىق قور 11 قاراشادا 10 جىلدىعىن اتاپ وتپەك. قوردىڭ جانىنان قازاقستانداعى ايەل جۋرناليستەر كلۋبى، جاس جۋرناليستەر مەكتەبى، مەديا ترەنەرلەر مەكتەبى جۇمىس ىستەيدى. قوردىڭ ماقساتى — قازاق تىلىندە حابار تاراتاتىن ب ا ق وكىلدەرىنىڭ كاسىبي بىلىگىن ارتتىرىپ، شەبەرلىگىن شىڭداۋ. سونىمەن قاتار قور جۋرناليستتەردى شەتەلدەرگە، اتاپ وتسەك تۇركيا، ەۋروپا ەلدەرىنە تەگىن ءىس ساپارلارعا اپارىپ، جۋرناليستتەرگە قولداۋ ءبىلدىرىپ ءجۇر. ايتالىق، وسى جىلى اقتوبە قالاسىندا وتكەن سەمينارعا بارلىعى 42 ادام قاتىستى. سەمينار بارىسىندا ەڭ العاشقى بولىپ ايتىلعان ماسەلە — ول حالىقتىڭ وسال تۇسىن پايدالانىپ، سان سوقتىرعان ينتەرنەتتەگى الاياقتىق تاقىرىبى بولدى. بۇل تاقىرىپتا Halyk Bank اقتوبە قالاسىنىڭ فيليالىنىڭ باسشىسى گۇلجاحان بايتەرەكوۆا بايانداما جاسادى. ول الاياقتار ادامداردى الداپ، ارباۋ تاسىلدەرىن جاڭاشا تۇرلەندىرىپ وتىراتىنىن ەسكەرتتى. سوندىقتان قوڭىراۋ شالعان ابونەنتكە ەشقانداي قۇپيا ءسوزدى، جەكەڭىزگە كەلگەن كودتى جاريالاماۋ قاجەتتىگىنە ەگجەي-تەگجەيلى توقتالدى. سەبەبى بانك قىزمەتكەرلەرى ەشبىر جاعدايدا «نەسيە راسىمدەيسىز بە، شوتىڭىزدى بىرەۋ بۇزدى. جاسىرىن كودتى ايتىڭىز» دەگەن سىندى مالىمەتپەن حابارلاسۋعا قۇقىعى جوق. وسىنداي وقيعاعا تاپ بولساڭىز، ەش جاۋاپ قايتارماي، دەرەۋ بانككە بارۋ جانە رەسمي بايلانىس نومىرلەرگە حابارلاسۋ قاجەت»، دەپ وتىر.
سونداي-اق الاياقتار مەملەكەتتىك ءتىل ەمەس ورىس تىلىندە حابارلاسادى دەپ ەسكەرتتى، الايدا بولاشاقتا قازاق تىلىندە دە حابارلاسۋى مۇمكىن.«قازاقستان حالىق بانكى» اق نارىقتا 100 جىلدان اسا تابىستى جۇمىس ىستەيتىن جانە نەگىزگى كورسەتكىشتەر بويىنشا ەلدەگى كوشباسشى سانالاتىن ءىرى كوممەرسيالىق بانك بولىپ سانالادى.
ال «ىسكەرلىك جۋرناليستيكا: اشىق دەرەككوزدەرمەن جۇمىس» تۋرالى ايتقان تۇركىتىلدەس جۋرناليستەر قورىنىڭ پرەزيدەنتى، مەديا ترەنەر ءنازيا جويامەرگەن قىزى جۋرناليستەرگە توپتىق زەرتتەۋ جاساتىپ، ونداعى كەم تۇستارى مەن اقپاراتتى قايدان الۋ جولدارىن ناقتى ءتۇسىندىردى. سونىمەن قاتار جاساندى ينتەللەكت، Chat GPT قولدانۋ تۋرالى، «AI: ينفوگرافيكا تۋراسىندا ءبىلىمدى ءارى جاس مەديا ترەنەرلەر وتە كەرەمەت ەتىپ ايتىپ ءتۇسىندىردى. جۋرناليستەرگە پايدالى قوسىمشالاردىڭ قانداي ماڭىزى بارىن كورسەتتى. جۋرناليستتەر جاڭا دۇنيەلەردى نوۋتبۋك جانە تەلەفون ارقىلى قولدانۋدىڭ قانشالىقتى كەرەك ەكەنىن بايقاپ عانا قويماي، ۋاقىت ۇتاتىندارىن جانە جۇمىستارىنىڭ جەڭىلدەيتىنى تۋرالى ءتۇسىندى. بۇدان بولەك، YouTube. الەۋمەتتىك جەلى تۋرالى، رەيتينگ جانە مونەتيزاسيا تاقىرىبىندا مەديا ترەنەرلەر قىزىقتى ءارى پايدالى ينسايتتار مەن اقپاراتتاردى جەتكىزدى.
قالام ۇستاعان قاۋىمنىڭ قارجى تاقىرىبىندا قالام تەربەپ قانا قويماي، حالىقتىڭ كوزىن اشىپ، قارجىلىق ساۋاتتىلىعىن ارتتىرۋعا باعىتتالعان سەمينار بيىل ەلىمىزدىڭ التى بىردەي قالاسىندا ۇيىمداستىرىلدى. ونىڭ ىشىندە اتىراۋ، اقتاۋ، اقتوبە، قىزىلوردا،شىمكەنت قالالارى مەن تۇركىستان وبلىسىنداعى مەديامامانداردىڭ بىلىكتىلىگىن ارتتىرىپ، زامان تالابىنا ساي جاساندى ينتەللەكتىنى قولدانۋدىڭ تىڭ تاسىلدەرىن ۇيرەتتى. شىندىعى سول، بۇل سەمينار-ترەنينگ جۋرناليستەرگە جاڭا سەرپىلىس بەردى. ترەنينگ سوڭىندا قاتىسۋشىلارعا ارنايى سەرتيفيكاتتار مەن سىيلىقتار تابىستالدى. ايتا كەتۋ كەرەك، مۇنداي تەگىن ءارى ساپالى ءبىلىم بەرەتىن سەمينار ترەنينگتەر الاياقتارعا الدانىپ، سان سوعىپ جاتقان اڭقاۋ حالىقتىڭ دا ساۋاتىن اشۋعا سەرپىن بەرەرى انىق.
ايتپاقشى، بيىل 11-12 قاراشاسىندا «تۇركىتىلدەس جۋرناليستەر قورى» «شيەۆرون» كومپانياسىنىڭ سەرىكتەستىگىندە قازاقستاننىڭ الماتى قالاسىندا وتەتىن IV حالىقارالىق تۇركىتىلدەس جۋرناليستەر مەديا فورۋمىن ۇيىمداستىرادى. مەديا فورۋمعا قازاقستان، ەۋروپا ەلدەرى، تۇركيا، ورتالىق ازيانىڭ ب ا ق باسشىلارى، جۋرناليستەر، اقپارات جانە تۋريزم سالاسىنا قاتىستى مەملەكەتتىك ورگاندار، دەپۋتاتتار PR مەنەدجەرلەر، مەديا سالاسىنداعى ۇكىمەتتىك ەمەس ۇيىم وكىلدەرى، تۋريزم سالاسىنىڭ ماماندارى، جوو جۋرناليستيكا فاكۋلتەتتەرىنىڭ دەكاندارى، وقىتۋشىلارى مەن ستۋدەنتتەرى، قوعام قايراتكەرلەرى قاتىسادى.
تۇركى الەمىنىڭ مەديا سالاسىنداعى ماڭىزدى ماسەلەلەردى تالقىعا سالاتىن حالىقارالىق الاڭ – «TURKTIME: تۇركى ەلدەرىنىڭ مەديا جانە تۋريزم بىرلىگى» تاقىرىبىنداعى مەديا فورۋمدا ءداستۇرلى جۋرناليستيكا مەن الەۋمەتتىك مەديانىڭ جاڭا تەندەنسيالارى، جاساندى ينتەللەكتتىڭ مەديا كەڭىستىككە اسەرى، جاساندى ينتەللەكتتى اقپارات جيناۋ، ساراپتامالىق مالىمەتتەر، كونتەنت قالىپتاستىرۋدا پايدالانۋ، باق-تا جاساندى ينتەللەكتتى قولدانۋدىڭ ەتيكالىق قىرى، بولاشاقتا ۇستەمدىك قۇراتىن كونتەنتتىڭ ءتيىمدى فورماتى، VR/AR، ينتەراكتيۆتىك مەديا، مەديا كومپانيالار مەديا نارىقتاعى جاڭا فورماتتار مەن پلاتفورمالار، كونتەنتتى مونەتيزاسيالاۋ، تۋريزم سالاسىنداعى ءوزارا ءتيىمدى ىنتىماقتاستىقتى كۇشەيتۋ ماقساتىندا تۇركى مەملەكەتتەرىندە PR جانە ماركەتينگ قۇرالدارىن ءتيىمدى پايدالانۋ ارقىلى تۋريزم سەكتورىنىڭ دامۋىنا ىقپال ەتۋ، مەملەكەتتىك جانە جەكەمەنشىك قۇرىلىمداردىڭ تۋريستىك PR-دى دامىتۋداعى ءرولىن ناقتىلاۋ، تۋريستىك ماركەتينگ سالاسىنداعى مامانداردى وقىتۋ جانە كاسىبي بىلىگىن ارتتىرۋ سەكىلدى تاقىرىپتاردا پىكىر الماسپاق.
ەڭ ماڭىزدىسى سول، حالىقارالىق جيىننىڭ سوڭىندا «تۇركىتىلدەس جۋرناليستەر قورى» قق «شيەۆرون» كومپانياسى مەن Halyk Bank سەرىكتەستىگىندە وتكىزگەن «الەۋمەت – قوعام ايناسى»-2024، «ەركىن ءسوز»-2024، «تۋعان جەرىم – تۇعىرىم»-2024 شىعارماشىلىق بايقاۋلارىنىڭ جەڭىمپازدارى ماراپاتتالاتىن بولادى.
