ىلە اۋدانىنىڭ تۇرعىندارى الماتى وبلىسىنىڭ اكىمى مارات سۇلتانعازييەۆپەن وتكەن ەسەپتىك كەزدەسۋدە ءوڭىردىڭ وزەكتى ماسەلەلەرىن كوتەردى. ءىس شارا 17 قازاندا وتەگەن باتىر اۋىلىنداعى مادەنيەت ۇيىندە ءوتتى، دەپ حابارلايدى Dalanews.kz.
الماتى وبلىسى تۇراقتى ەكونوميكالىق ءوسىم كورسەتىپ، ەلىمىزدەگى كوشباسشى ايماقتاردىڭ قاتارىنا ەندى. سوڭعى ءۇش جىلدا ءوڭىردىڭ جالپى ىشكى ءونىمى ەكى ەسەگە جۋىق ءوسىپ، 3،4 ترلن تەڭگەدەن 6 ترلن تەڭگەگە جەتتى. ناتيجەسىندە وبلىس رەسپۋبليكا بويىنشا ۇزدىك بەستىككە كىرىپ وتىر.
«ءبىز ەلىمىز بويىنشا جالپى ىشكى ونىمگە قوسقان ۇلەس جاعىنان 10-ورىننان 5-ورىنعا كوتەرىلدىك. ءوڭىر ەكونوميكاسى 10 پايىزدان استام ءوسىم كورسەتىپ وتىر. قۇرىلىس سالاسىندا رەكوردتىق كورسەتكىشكە قول جەتكىزىلدى. 900 مىڭ شارشى مەتردەن استام تۇرعىن ءۇي پايدالانۋعا بەرىلدى. ينۆەستيسيالار كولەمى 16 پايىزعا ارتسا، ونەركاسىپ ءوندىرىسى شامامەن 1،9 ترلن تەڭگەگە جەتتى. بۇل – مەملەكەت باسشىسىنىڭ وڭىرلەردى دامىتۋ جونىندەگى ستراتەگياسىنىڭ ناقتى ناتيجەسىن ايقىندايتىن كورسەتكىش»، - دەپ اتاپ ءوتتى الماتى وبلىسىنىڭ اكىمى مارات سۇلتانعازييەۆ.
كەزدەسۋگە اۋداننىڭ ءتۇرلى سالاسىندا ەڭبەك ەتەتىن ازاماتتار - كاسىپكەرلەر، فەرمەرلەر، پەداگوگتار، دەپۋتاتتار، مادەنيەت جانە كىتاپحانا قىزمەتكەرلەرى، سونداي-اق بەلسەندى تۇرعىندار قاتىستى. اكىم مەن تۇرعىندار اراسىنداعى ديالوگ مازمۇندى ءارى كونسترۋكتيۆتى ءوتتى.
كەزدەسۋ بارىسىندا 40-تان استام سۇراق قويىلدى. ونىڭ ىشىندە:
•20%–ى جولدار مەن كوشە جارىعىنا قاتىستى؛
•18%–ى ءبىلىم سالاسى، ءۇش اۋىسىمدى مەكتەپتەر مەن وقۋ كابينەتتەرىنىڭ جەتىسپەۋشىلىگى تۋرالى؛
•15%-ى تۇرعىن ۇي-كوممۋنالدىق شارۋاشىلىعى؛
•10%-ى دەنساۋلىق ساقتاۋ جانە سانيتارلىق قاۋىپسىزدىك؛
•قالعان 37%-ى اباتتاندىرۋ، قوعامدىق كولىك جانە ەكولوگيا ماسەلەلەرىن قامتىدى.
جەرگىلىكتى حالىق ناقتى ۇسىنىستارىن دا جەتكىزدى. اتاپ ايتقاندا، «سوكول» ساياجاي الابىندا مەكتەپ سالۋ، وتەگەن باتىر اۋىلىندا مۋزىكالىق مەكتەپ اشۋ، بورالداي كەنتىندە جاڭا مادەنيەت ءۇيىن تۇرعىزۋ جانە ءبىرقاتار اۋىلدىق وكرۋگتەردە دارىگەرلىك امبۋلاتوريا اشۋ ۇسىنىلدى.
سونداي-اق، قاراوي اۋىلدىق وكرۋگىنىڭ تۇرعىندارى ءسىبىر جاراسى وشاعى انىقتالعان جاعداي بويىنشا سانيتارلىق-ەپيدەميولوگيالىق باقىلاۋ شارالارى جايىندا ءتۇسىندىرۋ جۇمىستارىن سۇرادى.
مارات سۇلتانعازييەۆ ءاربىر كوتەرىلگەن ماسەلەگە جەكە توقتالىپ، تولىققاندى جاۋاپ بەردى.
«كەزدەسۋ قورىتىندىسى بويىنشا ناقتى مەرزىمى مەن جاۋاپتى تۇلعالارى كورسەتىلگەن ءىس-شارالار جوسپارى ازىرلەنەدى. تۇرعىنداردىڭ بارلىق وتىنىشتەرى اۋدان مەن وبلىس اكىمدىكتەرىنىڭ باسىم باعىتىنا ەنگىزىلەدى»، - دەدى وبلىس اكىمى.
سونداي-اق ول مۇنداي كەزدەسۋلەردىڭ بارلىق اۋدانداردا ءوتىپ جاتقانىن اتاپ ءوتتى.
«مۇنداي كەزدەسۋلەر حالىقتىڭ وتىنىش-تىلەكتەرىنە جەدەل جاۋاپ بەرۋگە، ولاردىڭ پىكىرىن تىكەلەي ەستۋگە جانە ءوڭىردى دامىتۋ جوسپارلارىن ناقتىلاۋعا مۇمكىندىك بەرەدى»، - دەدى مارات سۇلتانعازييەۆ.
كەزدەسۋدەن كەيىن وتكەن جەكە قابىلداۋدا 12 تۇرعىننىڭ ءوتىنىشى تىڭدالدى. بارلىعى 24 الەۋمەتتىك، ينفراقۇرىلىمدىق جانە كوممۋنالدىق سيپاتتاعى ماسەلە قارالدى.
