ءبىز تەحنولوگيالىق وزگەرىستەر ءداۋىرىنىڭ تابالدىرىعىندا تۇرمىز. جاساندى ينتەللەكت (جي) ءبىلىم بەرۋ جۇيەسىنىڭ اجىراماس بولىگىنە اينالۋدا. جي وقىتۋشىنى الماستىرمايدى، تەك ونىڭ ءرولىن كۇشەيتەدى. ول وقىتۋشىنى ءبىلىم تاسىمالداۋشىسى عانا ەمەس، ءبىلىم بەرۋ پروسەسىندەگى مودەراتور، تالىمگەر، ستراتەگ رەتىندە كورسەتەدى. وسى ورايدا، جي تەك تەحنولوگيانى قولدانۋ عانا ەمەس، ەڭ الدىمەن جاڭا مادەنيەتتى مەڭگەرۋ – يننوۆاسياعا اشىقتىق، ۇزدىكسىز ۇيرەنۋگە دايىن بولۋدى تالاپ ەتەتىن جاڭا مادەنيەت ەكەنىن ءتۇسىنۋ ماڭىزدى. ءبىزدىڭ باستى ماقساتىمىز — جاساندى ينتەللەكتتى قولدانۋ عانا ەمەس، جي ءبىلىم بەرۋ ۇدەرىسىنىڭ ءاربىر قاتىسۋشىسىمەن وداقتاسقان ەكوجۇيە قۇرۋ.
بۇل باعىتتا ۋنيۆەرسيتەت ماڭىزدى قادامدار جاساۋدا.
اتاپ ايتساق، ۋنيۆەرسيتەت بازاسىندا جاساندى ينتەللەكت جانە ۆيرتۋالدى شىندىق زەرتحاناسى، فيزيكا-ماتەماتيكا فاكۋلتەتىندە اقپاراتتىق تەحنولوگيالار جانە جاساندى ينتەللەكت كافەدراسى قۇرىلدى.
ۋنيۆەرسيتەتتىڭ نەگىزگى پروسەستەرىن سيفرلاندىرۋعا، اۆتوماتتاندىرۋعا جانە وڭتايلاندىرۋعا باعىتتالعان LMS جۇيەسى – «Smart جەتىسۋ» سيفرلىق پلاتفورماسى جۇمىس ىستەيدى. «Huawei» كومپانياسىمەن جاساسقان ىنتىماقتاستىق اياسىندا ۋنيۆەرسيتەت بازاسىندا زاماناۋي تەحنيكالارمەن جابدىقتالعان Huawei اكادەمياسى اشىلدى.
2024-2025 وقۋ جىلىندا جۇزەگە اسىرىلاتىن بارلىق باكالاۆريات باعدارلامالارىنا «جاساندى ينتەللەكت نەگىزدەرى» ءپانى، ماگيستراتۋرا مەن دوكتورانتۋراعا ارنالعان ءبىلىم بەرۋ باعدارلامالارىنا «جاساندى ينتەللەكتپەن وقىتۋدىڭ زاماناۋي تاسىلدەرى»، «باسقارۋداعى ساندىق تەحنولوگيالار»، «بيزنەس زەرتتەۋلەرىندەگى جاساندى ينتەللەكت جانە دەرەكتەردى تالداۋ»، «جاساندى ينتەللەكت جانە زياتكەرلىك مەنشىك»، «جاساندى ينتەللەكتتىڭ ەكونوميكالىق ۇدەرىستەرگە اسەرى» سياقتى پاندەر مەن مودۋلدەر ەنگىزىلدى.
ۋنيۆەرسيتەتىشىلىك «Jas Galym – 2025» بايقاۋىندا جاس عالىمدار «كىرىكتىرىلگەن جاساندى ينتەللەكت (جي) بار داۋىستىق كومەكشى ازىرلەۋ» تاقىرىبىنداعى جوباسىمەن جەڭىسكە جەتىپ، 2 000 000 تەڭگە كولەمىندەگى قارجىلاندىرۋعا يە بولدى. ستارتاپ جوبالار بايقاۋىندا ستۋدەنتتەر «جاساندى ينتەللەكت كومەگىمەن مۋلتيپليكاسيالىق فيلمدەر جاساۋ» اتتى ازىرلەمە ۇسىندى. ۋنيۆەرسيتەت وقىتۋشىسى رايگۇل جەلدىبايەۆا «جاس عالىم» بايقاۋىندا «تىلدىك ەمەس ماماندىق ءبىلىم الۋشىلارىنىڭ اكادەميالىق اعىلشىن ءتىلىن مەڭگەرۋدەگى كومەكشىسى رەتىندە جاساندى ينتەللەكت: راندوميزاسيالانعان سىناق»تاقىرىبىنداعى جوباسىمەن جەڭىمپاز اتاندى.
عىلىم جانە جوعارى ءبىلىم مينيسترلىگىنىڭ AI-Sana فلاگماندىق جوباسىنىڭ باستاماسىن جۇزەگە اسىرۋ بارىسىندا «ءى.جانسۇگىروۆ اتىنداعى جەتىسۋ ۋنيۆەرسيتەتى» كەاق رەسمي تۇردە زاكىرلىك ۋنيۆەرسيتەت بولىپ تانىلدى. جوبا جاساندى ينتەللەكتتى (جي) دامىتۋعا جانە ەلدەگى سيفرلىق ەكونوميكانى قالىپتاستىرۋعا باعىتتالعان.
AI-Sana جوباسىنا قاتىسۋ - ۋنيۆەرسيتەتتىڭ عىلىمي الەۋەتىن ارتتىرىپ قانا قويماي، جەتىسۋ ءوڭىرىنىڭ تۇرعىندارىنا الدىڭعى قاتارلى سيفرلىق داعدىلاردى يگەرۋگە مۇمكىندىك اشادى. بۇل جەرگىلىكتى كادرلاردىڭ ەڭبەك نارىعىنداعى باسەكەگە قابىلەتتىلىگىن ارتتىرىپ، ءوڭىردىڭ دامۋىنا ىقپال ەتەدى.
AI-Sana باعدارلاماسى اياسىندا مىڭداعان ستۋدەنت پەن جاس كاسىپكەر ءجي-دىڭ قىر-سىرىن مەڭگەرىپ، ونى ءوز كاسىبىندە قولدانۋعا مۇمكىندىك الادى. بولاشاقتا جي-مەن جۇمىس ىستەۋ – باعدارلاماشىلاردىڭ عانا ءىسى ەمەس، ول ەكونوميستەر، زاڭگەرلەر، اگرونومدار، دارىگەرلەر، باسقا دا ماماندار ءۇشىن دە پايدالى قۇرالعا اينالماق. الەمنىڭ جەتەكشى ساراپشىلارىنىڭ قاتىسۋىمەن ازىرلەنگەن باعدارلامانى وزىق ءبىلىم بەرۋ باستاماسى دەپ ايتا الامىز. جەتىسۋ ۋنيۆەرسيتەتى وسى جوباعا قوسىلۋ ارقىلى جاساندى ينتەللەكتىنى تەرەڭ مەڭگەرگەن ساپالى مامان دايارلاۋعا كۇش سالامىز.
جوبا ءۇش كەزەڭ بويىنشا جۇزەگە اسىرىلۋدا. ءبىرىنشى دايىندىق كەزەڭىندە 5400 ۋنيۆەرسيتەت ستۋدەنتى Huawei پلاتفورماسىن پايدالانىپ جاساندى ينتەللەكت سالاسىنداعى نەگىزگى داعدىلار بويىنشا وقۋدى ءساتتى اياقتادى.
ەكىنشى كەزەڭدە ءبىز ءبىلىم الۋشىلارعا كاسىپكەرلىك داعدىلاردى، باعدارلامالاۋ جانە ماشينالىق وقىتۋ نەگىزدەرىن ۇيرەتۋدى جوسپارلانىپ وتىر.
جاساندى ينتەللەكت جانە ۆيرتۋالدى شىندىق زەرتحاناسىنىڭ نەگىزىندە ءبىلىم الۋشىلار جي تەحنولوگيالارىن قولدانا وتىرىپ، بەس باعدارلامالىق قوسىمشانى ازىرلەيدى: ولار ءارتۇرلى تاپسىرمالاردى ورىنداي الاتىن داۋىستىق كومەكشى ، ءبىلىم الۋشىلارعا ەدۆايزەرلىك جانە كۋراتورلىق كومەك كورسەتۋگە مۇمكىندىك بەرەتىن جي اگەنتى، تالاپكەرلەر مەن ءبىلىم الۋشىلارعا ارنالعان چات-بوت، انيماسيالىق جانە بەينە كونتەنت، بەينە ويىن ازىرلەۋشىسى. سوڭعى كەزەڭ جي سالاسىنداعى ستارتاپتاردى دامىتۋعا جانە ىسكە قوسۋعا باعىتتالعان ستۋدەنتتىك كوماندالاردى قۇرۋ. بۇل تەحنولوگيالىق كاسىپكەرلىكتى، يننوۆاسيالاردى دامىتۋ جانە جاساندى ينتەللەكت ارقىلى ايماقتىڭ باسەكەگە قابىلەتتىلىگىن ارتتىرۋعا نەگىز بولماق.
